އެމީހަކު އެންމެ ލޯބިވާ މީހަކު ދޫކޮށް ދިއުމަކީ ދިރިއުޅުމުގައި ދިމާވާނެ އެންމެ ހިތާމަވެރިކަން ކަމާއިމެދު ޝައްކެއް ނެތެވެ. އެމީހަކާ ނުލައި ދިރިއުޅެން އުނދަގޫވެއެވެ. އަބަދުވެސް ކައިރީގައި ހުންނާނެ ނަމައޭ ހިތަށް އަރާނެއެވެ.
އެހެން ނަމަވެސް ދޫކޮށް ދިޔަ މީހުންގެ މަތިން އަބަދު ހަނދާންކުރުމަކުން ވަކި ފައިދާއެއް ނުކުރެއެވެ. އެމީހާ އެނބުރި އަންނާނެ ކަމުގެ އުންމީދު ކޮށްގެން ހުރުމުން ވަކި ހިތްހަމަޖެހުމެއް ނުލިބެއެވެ. ގަބޫލު ކުރަންވީ ކަމަކީ ތިމާގެ ދިރިއުޅުމުގައި ހުންނަން ބޭނުންވާ މީހަކު އަބަދުވެސް އެގޮތުގައި ހުންނާނެ ކަމެވެ.
މީގެ މާނައަކީ އެމީހާ ދެކެ ރުޅިއަންނާށެކޭ ނޫނެވެ. ކޮންމެ މީހަކު ވެސް ވަކިވެގެންދާނީ ސަބަބުތަކެއް އޮތީމައެވެ. ނިކަން ގިނަ ފިލާވަޅުތަކެއް ދަސްކޮށް ވެސް ދީފައެވެ. އެމީހާ މަތިން ހަނދާންވާ ކޮންމެ ފަހަރަކު ބަދު ދުޢާ ކުރުމުގެ ބަދަލުގައި ހެޔޮ ދުޢާ ކުރާށެވެ. އަބަދުވެސް ރަނގަޅުގޮތް ވާން އެދޭށެވެ. އެހެން ނަމަވެސް ކިތަންމެ ހަނދާން ވިޔަސް އެނބުރި އަންނާނެ ކަމުގެ އުންމީދު ނުކުރާށެވެ.
ތިމާގެ ދިރިއުޅުމުން ދިޔަ މީހުންނާ ދޭތެރޭ ނުވިސްނައި، މިހާރު ތިބި މީހުންނާ ދޭތެރޭ ވިސްނާށެވެ. އެއީ ތިމާ އެމީހުންނަށްދޭ ލޯތްބަށްވުރެ ދެގުނަ ލޯބި ތިމާއަށްދޭ މީހުންނެވެ. އެމީހުންގެ ދިރިއުޅުމަށް ތިއީ މުހިއްމު މީހެކެވެ. އެކަން އަބަދުވެސް އިހުސާސް ކޮށްދޭނެއެވެ. ނެތް މީހުންނާ ދޭތެރޭ ވިސްނުމުގެ ބަދަލުގައި ތިބި މީހުންގެ މުހިއްމުކަން އަމިއްލަ އަށް ގަބޫލުކުރާށެވެ.
ގޯސްކޮށް ހިނގާދިޔަ މަދު ކަންކަމާމެދު ވިސްނަންޏާ ދިރިއުޅުމުގައި ހުރި ރަނގަޅު ގިނަ ކަންތައްތައް ނުފެންނާނެއެވެ. މާޒީގެ ހިޔަނި މިއަދަށް އެޅުނަ ނުދޭށެވެ. އޭގެ ބަދަލުގައި މީހުންނަށް ފުރުސަތު ދޭށެވެ. ދިރުއުޅުމުގައި ހުރި ހުސް ޖާގަތައް ރަނގަޅު މީހުންނާއި އުފާވެރި އިހުސާސުތަކުން ފުރާލާށެވެ. ދިޔަ މީހުންގެ މަތިން ހަނދާން ނައްތާލައި ތިބި މިހުންނާއެކު އާފެށުމަކުން ފަށާށެވެ.
