މުރަނގަފަތަކީ ދިވެހިން އެކި ގޮތްގޮތަށް ކެއުމުގައި އާންމުކޮށް ބޭނުންކުރާ ފަތުގެ ބާވަތެކެވެ. ރޮލާ ކެއުމުގެ އިތުރުން، ފެނުކައްކައިގެން ނުވަތަ ތެލުލައިގެން ބޭނުންކުރުމަކީ އާންމުކަމެކެވެ. ދިވެހިން މިބުނާ "ތެލުލި ފަތް" ވެސް އަންމުކޮށް ތައްޔާރުކުރަނީ މުރަނގަފަތުންނެވެ. ނަމަވެސް މަދުމަދުން އެހެން ބާވަތްތަކުގެ ފަތްވެސް ތެލުލިފަތުގެ ނަމުގައި ދިވެހިން ބޭނުން ކުރެއެވެ.
ޒަމާނުއްސުރެ ދިވެހިންގެ ކެއުންބުއިމުގައި މުރަނގަފަތް ބޭނުން ކުރަނީ މި ފަތުން ލިބިދޭ ފައިދާތައްވެސް ގިނަވީމައެވެ.
މުރަނގަ ފަތަކީ ޕްރޮޓީނުން މުއްސަނދި ބާވަތެކެވެ. 100 ގުރާމްގެ މުރަނގަފަތުގައި 9.8 ގްރާމްގެ ޕްރޮޓީން ހުރެއެވެ. މިއީ ދުވާލެއްގެ މައްޗަށް މީހަކަށް ބޭނުންވާ ޕްރޮޓީންގެ 17.5 އިންސައްތަ އެވެ. ހިއްކައިގެން މުގުރާފައި ހުންނަ މުރަނގަ ފަތުގައި އެތައް ބައިވަރު އެމިނޯ އެސިޑް ހުރެއެވެ.
މުރަނގަ ގަހުގައި ހުންނަ ޅަކުރިތަކުގެ ފަތްތަކަކީ ވިޓަމިން އޭ ގިނަ އަދަދަކަށް ހިމެނޭ އެއްޗެކެވެ. 100 ގްރާމުގެ މުރަނގަ ފަތުގައި 7564 އިންޓަނޭޝަނަލް ޔުނިޓްގެ ވިޓަމިން އޭ އެކުލެވިގެން ވެއެވެ. ވިޓަމިން އޭ އަކީ ތަފާތު އެތައް ފައިދާތަކެއް ހަށިގަނޑަށް ފޯރުކޮށްދޭ އެންޓިއޮކްސިޑެންޓެކެވެ. އެގޮތުން ވިޓަމިން އޭ އިން ލިބިދޭ ފައިދާތަކުގެ ތެރޭގައި، ހަށިގަނޑުގައިވާ ތެތް ދުލިފަށަލަތަކަށް ލިބޭ ގެއްލުންތައް މަރާމާތުކޮށް ރަގަޅުކުރުން، ދިފާއީ ނިޒާމު ރަގަޅުކޮށްދިނުން، ލޮލުގެ ފެނުން ރަގަޅުކޮށްދިނުން އަދި ހަމުގެ ދުޅަހެޔޮކަން ދެމެހެއްޓުން ފަދަ ކަންތައްތައް ހިމެނެއެވެ.
މީގެ އިތުރުން މުރަނގަ ފަތުގައި ވިޓަމިން ކޭ، ވިޓަމިން ޑީ، އަދި ވިޓަމިން އީ ވެސް ހުރެއެވެ.
ދިރާސާތަކުން ދައްކާ ގޮތުގައި މުރަނގަފަތަކީ ހަށިގަނޑުގައި ސަރުބީ ޖަހާ މިންވަރު ދަށްކޮށްދޭ ބާވަތެކެވެ. އަދި ހަށިގަނޑައި ހުންނަ ބޭކާރު ސަރުބީތައް ވިރުވާލާ މިންވަރުވެސް އިތުރުކޮށްދޭ ބާވަތަކެވެ. މީގެ އިތުރުން، މުރަނގަފަތަކީ ބަނޑުގައި ވައިހެދުމާއި، އެސިޑިޓީގެ އުނދަގޫތަކުންވެސް ދުރުކޮށްދޭ ބާވަތެކެވެ. މިއީ ބަރުދަން ލުއިކުރަން އުޅޭއިރުވެސް ބޭނުން ކުރަން ހަމަ އެންމެ ރަނގަޅު އެއް ބާވަތްކަމުގައި ދެންނެވިދާނެއެވެ.
މުރަނގަފަތުގެ އިތުރުން މުރަނގަތޮޅިއާއި ތޮޅީތެރޭގައިވާ އޮށްތަކަކީވެސަ ގިނަގުނަ ފައިދާތަކެއް އެކުލެވޭ ބާވަތްތައް ކަމަށް ދިރާސާކުރާ ފަރާތްތަކުން ބުނެއެވެ.
މުރަނގަފަތް ކިތަންމެ ފައިދާ ބޮޑުވެފައި ސިއްހަތަށް ރަނގަޅު ނަމަވެސް އެފަތަކީ ތެލުލައިގެން އެއްގޮތަކަށް ވެސް ކާން ހެޔޮވާވަރުގެ އެއްޗެއް ނޫނެވެ. ސަބަބަކީ ގިނަ ފަހަރަށް ފަތް ތެލުލާން ބޭނުންކުރާ ތެލަކީ ތަކުރާރުކޮށް ބޭނުންކޮށްފައި ހުންނަ، ނުރައްކާތެރި ތެޔޮގަނޑަކަށް ވުމާއި، ތެލުލުމުގެ ސަބަބުން ފަތުގެ އެންމެ މުހިންމު މާއްދާތައް ނެތިދި ދިއުމެވެ.
އެހެންކަމުން ތެލުލައިގެން ކާނަމަ މުރަނގަފަތުން ލިބެން ޖެހޭ ފައިދާތައް ހަށިގަނޑަށް އެންމެ ރަނގަޅަކަށް ނުލިބޭނެއެވެ.
