މާލޭގެ ހުރިހާ މިސްކިތެއްގައި ސީސީޓީވީ ކެމެރާ ހަރުކޮށް ނިމިފައިވާ ކަމުގައި މާލޭ ސިޓީގެ މޭޔަރ ޑރ. މިއުއްޒު ވިދާޅު ވެއްޖެއެވެ.
މާލޭ ސިޓީ ކައުންސިލުން މިއަދު ބޭއްވި ނުސްވެރިންގެ ބައްދަލުވުމުގައި ޑރ. މުއިއްޒު ވިދާޅުވީ، މާލޭސިޓީގެ މިސްކިތްތަކުގައި ސީސީޓީވީ ކެމެރާތައް ހަރު ކޮށްފައިވަނީ ސިޓީ ކައުންސިލްގެ އާމްދަނީގެ ބަޖެޓުން ކަމުގައެވެ.
މުއިއްޒު ވިދާޅުވި ގޮތުގައި މުޅި މާލެ ސީސީޓީވީން ކަވަރު ކުރުމަކީ އެކައުންސިލް ކުރަން ރާވާފައިވާ މަސައްކަތަކަށް ވާއިރު، މިސްކިތްތަކުގައި ސީސީޓީވީ ހަރުކޮށް ނިންމާފައިވަނީ މި މަސައްކަތުގެ ފުރަތަ ފިޔަވަހީގެ ގޮތުގައި ކަމަށެވެ. އަދި މިސްކިތްތަކުގައި ސީސީޓީވީ ހަރުކުރުމަށް އާމްދަނީގެ ބަޖެޓުން ޚަރަދު ކުރަންޖެހުނީ ސަރުކާރުން އެމަސައްކަތައް ފައިސާ ދޫ ނުކުރުމުގެ ސަބަބުން ކަމަށްވެސް މުއިއްޒު ވިދާޅުވިއެވެ.
މާލޭސިޓީގެ މިސްކިތްތަކުގައި ސީސީޓީވީ ކެމެރާ ހަރުކުރެވި، އަދި ކޮންޓްރޯލް ރޫމްތައްވެސް މިހާރު ހަދާ ނިމިފައި ވުމާއެކު، ސިޓީ ކައުންސިލްގެ މުވައްޒަފުންގެ ބެލުމުގެ ދަށުން މިހާރު މިސްކިތްތައް 24 ގަޑިއިރު ބެލެހެއްޓެމުން ދާނެކަމުގައި މިއަދުގެ ނޫސްވެރިންގެ ބައްދަލުވުމުގައި މުއިއްޒު ވިދާޅުވެފައި ވެއެވެ.
މި ބަދަލާއެކު މިސްކިތްތަތަކުގައި ނޭދެވޭ އެއްވެސް އަމަލެއް ހިގާތޯ ބަލާ، މިފަދަ އަމަލެއް ހިންގައިފިނަމަ ވަގުތުން ފިޔަވަޅުއ އެޅުމުގެ ފުރުސަތު މިހާރު ތަނަވަސް ވެފައި ވާއިރު، ފުލުހުންގެ މުވައްސަސާއެކު ސިޓީ ކައުންސިލުން ސޮއިކޮށްފައިވާ ކޮންސްޓަބްލަރީ އެއްބަސްވުމުގެ ދަށުން، ސިޓީ ކައުންސިލްގެ ބަޖެޓުން ކޮންސްޓަބްލަރުންނަށް މުސާރަ ދިނުމަށް ހަމަޖެހިފައި ވާކަމުގައިވެސް މޭޔަރު ވިދާޅުވެފައި ވެއެވެ. މިގޮތުން މި ފުލުހުންނަށް ތަމްރީންވެސް ދެވިފައިވާއިރު، މިސްކިތްތަކާއި ޕާކްތައް ބެލެހެއްޓުމަށް 40 ވަރަކަށް ފުލުހުން މިހާރު މާލޭ ސިޓީގައި ތައްޔާރަށް ތިބިކަމަށްވެސް މުއިއްޒު ވިދާޅުވެފައި ވެއެވެ.
