އަންނަ ސީޒަނުގެ ޔުއެފާ ޗެމްޕިއަންސް ލީގުގައި ކުޅެން ބޭނުންވާތީ މެންޗެސްޓާ ޔުނައިޓެޑް ދޫކޮށްލަން ބޭނުންވާކަން ކްރިސްޓިއާނޯ ރޮނާލްޑޯ އެ ކްލަބަށް އަންގާފައިވާ ކަމަށް މީޑިއާ ރިޕޯޓްތައް ބުނެފިއެވެ.
މިދިޔަ ސީޒަނުގައި އޭނާއަކީ ޔުނައިޓެޑަށް އެންމެ ގިނަ ލަނޑު ޖެހި ކުޅުންތެރިޔާގެ އިތުރުން، ލީގުގައި ތިންވަނައަށް އެންމެ ގިނަ ލަނޑު ޖެހި ކުޅުންތެރިޔާއަށް ވީނަމަވެސް މިދިޔަ ސީޒަނަކީ ޔުނައިޓެޑާއި ރޮނާލްޑޯއަށް ކާމިޔާބު ސީޒަނެއް ނޫނެވެ.
އެގޮތުން މިދިޔަ ސީޒަން ޔުނައިޓެޑް ނިންމާލީ ތާވަލުގެ ހަވަނައިގައި އޮވެގެންނެވެ. އެއާއެކު އަންނަ ސީޒަނުގެ ޔުއެފާ ޗެމްޕިއަންސް ލީގުގައި ކުޅުމުގެ ފުރުސަތު އެ ކުލަބަށް ވަނީ ގެއްލިފައެވެ. އެހެންކަމުން ރޮނާލްޑޯ ޔުނައިޓެޑުގައި މަޑުކުރާނަމަ، އޭނާއަށް ފުރަތަމަ ފަހަރަށް ޔޫރޮޕާ ލީގުގައި ކުޅެން ޖެހޭނެއެވެ. މިއީ ރޮނާލްޑޯ އެންމެ ބޭނުންވާ ގޮތް ނޫން ކަމަށާއި، އަދި އޭނާގެ އުމުރު ހުރިގޮތުން ކުޅުން ހުއްޓާލާ ދުވަސް ގާތްވަމުން އަންނާތީ، އެގޮތަށް މަޑުކުރުމުގެ ބަދަލުގައި ރަނގަޅު ފުރުސަތެއް ލިބިއްޖެނަމަ އެކޮޅަށް ދިޔުމަށް އޭނާ ބޭނުންވާ ކަމަށް ރިޕޯޓުތައް ބުނެއެވެ.
ސްކައި ސްޕޯޓްސް އިން ރިޕޯޓްކުރާ ގޮތުގައި ރޮނާލްޑޯ ވަނީ ޔުނައިޓެޑްގެ މެނޭޖްމަންޓަށް އޭނާ ދޫކޮށްލައިދޭން އެދިފައެވެ. އެއީ މިދިޔަ ސީޒަނުގައި ޔުނައިޓެޑް ދިޔައީ ލީގުގެ ހަ ވަނަ އަށް ކަމަށްވާއިރު، އަންނަ ސީޒަނުގައި ޗެމްޕިއަންސް ލީގު ކުޅޭ ކްލަބަކަށް ބަދަލުވާން ބޭނުންވާތީއެވެ. ރޮނާލްޑޯ، ކްލަބް ބަދަލުކުރަން އެދޭ އެންމެ ބޮޑު ސަބަބަކީ، ކެރިއަރުގައި ދެން އޮތް އަހަރުތަކުގައި އެންމެ މަތީ ލެވަލްގެ މުބާރާތްތަކުގައި ކުޅެން ބޭނުންވުމެވެ.
ތޭރަ އަހަރަށް ފަހު ރޮނާލްޑޯ މިދިޔަ ސީޒަނުގައި ޔުނައިޓެޑާ ގުޅުނީ ދެ އަހަރުގެ ކޮންޓްރެކްޓެއްގަ އެވެ. ޔުނައިޓެޑުން ރޮނާލްޑޯ ގަންނަން، ޔުވެންޓަސް އަށް ފުރަތަމަ ދެއްކީ 17 މިލިއަން ޑޮލަރެވެ. އަދި ފަހުން ޔުވެންޓަސް އަށް އިތުރު ނުވަ މިލިއަން ޑޮލަރު ދޭން ވަނީ ކޮންޓްރެކްޓްގައި އެއްބަސްވެފައެވެ. މިދިޔަ ސީޒަނުގައި ރޮނާލްޑޯ ވަނީ ކުޅުނު 39 މެޗުން 24 ގޯލު ޖަަހައި، ތިން ގޯލު ޖަހަން ފުރުސަތު ތަނަވަސްކޮށްދީފައެވެ.
