ސައުތު އެފްރިކާގެ ނައިޓް ކުލަބެއްގައި 22 މީހަކު މަރުވެފައި ތިއްބާ ފެނިއްޖެއެވެ. ސައުތު އެފްރިކާގެ ދެކުނުގެ ސިޓީއެއް ކަމުގައިވާ އީސްޓް ލަންޑަންގެ އަވަށެއްގައި ހުންނަ ނައިޓް ކުލަބެއްގައި މިމީހުން މަރުވި ސަބަބެއް އެގިފައެއް ނުވެއެވެ.
ސައުތު އެފްރިކާގެ ފުލުހުންގެ ބްރިގޭޑިއަރ ޓެމްބިންކޮޝި ކިނާނާ ވިދާޅުވެފައިވާ ގޮތުގައި މި ނައިޓް ކުލަބުގައި މީހުންތަކެއް މަރުވެފައިވާކަން ފުލުހުންގެ ސަމާލުކަމަށް ގެނައީ އެސަރައްދުގައި ދިރުއުޅޭ އާންމުންނެވެ.
"މިމީހުން މަރުވެފައިވާ ސަބަބު ހޯދުމަށް މިހާރުދަނީ ތަހުގީގު ކުރެވެމުން،" ޕޮލިސް ބްރިގޭޑިއަރ ކިނާނާ ވިދާޅުވެފައި ވެއެވެ. އޭނާ ވިދާޅުވި ގޮތުގައި އުމުރުން 18 އަހަރާއި 20 އަހަރާއި ދެމެދުގެ މި ޒުވާނުން މަރުވާން މެދުވެރިވި ވަކި ސަބަބެއް ދަންނަވަން އަދި މާ އަވަހެވެ.
ސައުތު އެފްރިކާގެ އީސްޓާރން ކޭޕް ޕްރޮވިންޝަލް ހެލްތު ޑިޕާޓްމަންޓުގެ ތަރުޖަމާން ސިޔަންޑާ މަނާނާ ވިދާޅުވި ގޮތުގައި މަރުވެފައިވާ ޒުވާނުންގެ ހަށިތައް އެމީހުންގެ އާއިލާގެ މީހުން ވަކިކުރުމަށްޓާކާ ބޭތިއްބުމަށް ހަމެޖެހިފައިވަނީ ސްޓޭޓް މޯޗަރީތަކުގައެވެ.
"އަހަރެމެން މިދަނީ ވަގުތުން ވަގުތަށް، މަރުގެ ސަބަބު ދެނެގަތުމަށްޓަކާ އޮޓޮޕްސީ ހެދުމަށް ތައްޔާރު ވަމުން،" އޭނާ ވިދާޅުވިއެވެ. "22 މީހުންގެ އޮޓޮޕްސީ ވަގުތުން ވަގުތަށް ހެދުމަށް މިދަނީ ތައްޔާރު ވަމުން."
މި ނައިޓް ކުލަބު ހުންނަ ސަރަހައްދުގެ އާންމުން ބުނެފައިވާ ގޮތުގައި މި ހުރިހާ ޒުވާނުންނަކީވެސް އެމީހުން ހައި ސްކޫލް އެގްޒާމްތައް ނިންމުމަށްފަހު ޕާޓީ ބާއްވަމުން ދިޔަ ޒުވާނުން ކަމުގައެވެ.
"މަރުވި ޒުވާނުންގެ ގައިން އެއްވެސް އަނިޔާއެއް ފެންނާން ނެތުމުން، މިއީ ފިތި ބާރުވެގެން ހިނގި ހާދިސާއެއްކަމުގައި ގަބޫލުކުރަން ދަތި،" މި ސަރަހައްދުގެ އާންމުގެ މީހަކު ލޯކަލް މީޑިއާތަކަށް މައުލޫމާތު ދެމުން ބުނެފައި ވެއެވެ.
