ޔޫކުރެއިންގެ އިތުމަތީގައި، އަމިއްލައަށް މިނިވަންކަން އިއުލާން ކޮށްފައިވާ ލުހާންސްކު ސަރަަހައްދު ރަޝިއާއި ގުޅުވާލަން ބޭނުންތޯ ބެލުމަށް، ވަރަށް އަވަހަށް އާންމު ފެންނަ ނުފެންނަ ވޯޓެއް ނަގާނެ ކަމުގައި، އެ ސަރަހައްދުގައި ވަކިވެގަތުމަށް ހަނގުރާމަކުރާ ހަގުރާމަވެރިންގެ ލީޑަރު ވިދާޅުވެއްޖެއެވެ.
"އަހަރެންނަ ފެންނަ ގޮތުގައި، ވަރަށް އަވަހަށް ރިޕަބްލިކްގެ ސަރަހައްދުގައި، ރަޝިއާގެ ބައެއްގެ ގޮތުގައި އޮތުމަށް ބޭނުންވޭތޯ ބެލުމަށް ރައްޔިތުންގެ ނިންމާގޮތެއް ބެލުމަށް ވޯޓެއް ނެގިގެން ދާނެ.. ރަޝިއަން ފެޑެރޭޝަނާއި ގުޅޭން ބޭނުންތޯ ނުވަތަ ނޫންތޯ ނިންމާނީ ރައްޔިތުން،" ލިއޯނިޑް ޕެސެޝްނިކް އާއި ހަވާލާދީ ރަޝިއާގެ ނޫސް އޭޖެންސީން ރިޕޯޓު ކޮށްފައި ވެއެވެ.
"ކޮންމެ ސަބަބަކާހެދި ނަމަވެސް، މިކަން ވެގެންދާނީ މިގޮތަށް،" އޭނާ ވިދާޅުވެފައި ވެއެވެ.
ޔޫކުރެއިން މިލިޓަރީ އިންޓެލިޖެންސުން ބުނެފައި ވާގޮތުގައި، ރަޝިއާއިން ކުރިން އުއްމީދުކުރި ގޮތަށް މުޅި ޔޫކުރެއިން އެގައުމުގެ ބާރުގެ ދަށަށް ނުގެނެވުމުން، އެގައުމުގެ މިހާރުގެ އަމާޒަކީ، ޔޫކުރެއިންގެ އެއްބައި ރަޝިއާއިން ކޮންޓްރޯލް ކުރާގޮތަށް، މުޅި ޔޫކުރެއިން ދެބަޔަކަށް ބަހާލުމަށެވެ.
ޔޫކުރެއިންގެ މިލިޓަރީ އިންޓެލިޖެންސުގެ ވެރިއާ، ކިރީލޯ ބުޑަނޯވްއާއި ހަވާލާދީ، ރޮއިޓާސް ނިއުސް އޭޖެންސީން ރިޕޯޓު ކޮށްފައިވާ ގޮތުގައި، ރަޝިއާއިން ބޭނުންވަނީ، "އުތުރު ކޮރެއާއާއި ދެކުނު ކޮރެއާ" އޮންނަ ގޮތަށް، ޔޫކުރެއިން ދެބައި ކޮށްލުމަށް ކަމުގައެވެ. އަދި އޭނާ އިންޒާރު ދީފައިވާ ގޮތުގައި، ޔޫކުރެއިންގެ އަސްކަރިއްޔާއިން ވަރަށް އަވަހަށް، ރަޝިއާއިން ހިފާފައިވާ އެގައުމުގެ ސަރަހައްދު ތަކުގައި ގެރިއްލާ ހަނގުރާމަ ފަށާނެއެވެ.
ޔޫކުރެއިންއަށް އުދުވާނީ ހަމަލާ ދޭން ފެށުމުގެ ކުރިން، ފާއިތުވެދިޔަ ފެބްރުއަރީމަހު ރަޝިއާގެ ރައީސް ލާޑިމިރު ޕުޓިންވަނީ، ޔޫކުރެއިންގެ އިރު ދެކުނުގައި ވަކިވެގަތުމަށް ހަނގުރާމަ ކުރަމުންދާ ދެ ސަރަހައްދަކީ މިނިވަން ދެ ދައުލަތުގެ ގޮތުގައި ބަލައިގެންފައެވެ.
