އާޖެންޓީނާގެ ގައުމީ ޓީމަށް ކުޅޭ އެންމެ ފަހު މެޗަށް ތައްޔާރުވުމަށް، ޓީމުގެ ކެޕްޓަން ލިއޮނަލް މެސީ ހުކުރު ދުވަހު އާއިލާއާއެކު މައާމީން ޕްރައިވެޓް ޖެޓެއްގައި ގައުމަށް އެނބުރި ދަތުރުކޮށްފިއެވެ. އޭނާ ދަތުރުކުރި ބޯޓު ޖެހީ ބުއެނޮސް އައިރިސްގެ އުތުރުން ގާތްގަނޑަކަށް 300 ކިލޯމީޓަރު ދުރުގައިވާ، އޭނާގެ އުފަން ރަށް ރޮޒާރިއޯއަށެވެ.
މިދިޔަ އޯގަސްޓް 31 ގައި ބައިނަލްއަގުވާމީ ފުޓްބޯޅައިން ރިޓަޔާވާން ނިންމި މެސީ، ގައުމީ ޖާޒީ އަޅައިގެން އެންމެ ފަހުން ކުޅޭނީ އަންނަ އަންގާރަ ދުވަހު ބުއެނޮސް އައިރިސްގައި ބެނިންއާ ދެކޮޅަށް ބާއްވާ ރަހުމަތްތެރިކަމުގެ މެޗުގައެވެ. އޭއެފްއޭއިން ބުނީ މި މެޗު ބާއްވަނީ ދުނިޔޭގެ އެންމެ މޮޅު ކުޅުންތެރިޔާއަށް އަމިއްލަ ބިމުގައި ހައްގުވާ ފަދަ އަލްވަދާއެއް ކިޔުމަށް ކަމަށެވެ.
އަލްވަދާއު ހަރަކާތްތަކުގައި 2022 ވޯލްޑް ކަޕް ކާމިޔާބުކުރި ޓީމުގެ ބައެއް ކުޅުންތެރިން ބައިވެރިވާނެ ނަމަވެސް، ރޯމާއިން ދޫނުކުރާތީ ޕައުލޯ ޑީބަލާއާއި ނަހުއެލް މޮލީނާއަށް ބައިވެރިވެވޭކަށް ނެތެވެ.
21 އަހަރު ދިގު ބައިނަލްއަގުވާމީ ކެރިއަރުގައި ގައުމީ ޓީމަށް 125 ލަނޑު ޖަހާފައިވާ މެސީ، 2022 ގެ ވޯލްޑް ކަޕް ހޯދައިދިނުމުގެ އިތުރުން 2014 އާއި މިއަހަރުގެ ވޯލްޑް ކަޕް ފައިނަލަށް ވެސް އާޖެންޓީނާ ގެންގޮސްދީފައިވެއެވެ. މި ވިންޑޯގައި އާޖެންޓީނާ ކުޅޭ އެހެން މެޗުތަކުގައި މެސީ ބައިވެރިއެއް ނުވާނެއެވެ. ބުދަ ދުވަހު ބޮލީވިއާ 4-0 އިން ބަލިކުރި އާޖެންޓީނާ، ހޮނިހިރު ދުވަހު ކުޅޭނީ ބުރްކީނާ ފާސޯއާ ދެކޮޅަށެވެ.
ކޮމެންޓު ފޮނުވާ