އޭޕްރިލް 4 ގައި ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި ހދ.ހިރިމަރަދޫގެ ރައްޔިތުން ވޯޓުލާނީ އެ އަތޮޅުގެ ހަނިމާދޫގައި ކަމަށް އިލެކްޝަންސް ކޮމިޝަނުން ބުނެފިއެވެ.
ރައީސުލްޖުމްހޫރިއްޔާވަނީ ޑރ.މުޙައްމަދު މުޢިއްޒު ހިރިމަރަދޫގެ ރައްޔިތުން ހަނިމާދޫއަށް ބަދަލު ކުރުމަށް ނިންމަވާފައެވެ. ދިވެހިރާއްޖޭގައި މީހުން ދިރިއުޅޭ ރަށްތައް ކަނޑައެޅުމާބެހޭ ޤަރާރަށް ރައީސް ގެންނެވި އިސްލާޙާ އެކު، ހިރިމަރަދޫގެ ރައްޔިތުން ހަނިމާދޫގައި އާބާދުކޮށް ރަޖިސްޓަރީކޮށް ނިމުމުން އެރަށް މީހުން ދިރިއުޅޭ ރަށެއްގެ ގޮތުގައި ބެލުން ހުއްޓާލެވޭނެއެވެ.
އިލެކްޝަންސް ކޮމިޝަނުން ބުނީ މި އިންތިޚާބުގައި ހިރިމަރަދޫގެ އާބާދީގައި ހިމެނޭ 588 މީހުންނަކީ ހަނިމާދޫގެ ރަށްވެހީން ކަމުގައި ބެލޭނެ ކަމަށެވެ. އެއީ ބަދަލުވާން ހަމަޖެހިފައިވާ ރައްޔިތުން އެ އަތޮޅުގެ ހަނިމާދޫގައި އާބާދުކޮށް ރަޖިސްޓަރީކުރުމުގެ މަސައްކަތް ސަރުކާރުން ކުރަމުންދާ މަރުޙަލާގެ ތެރޭގައި އިންތިޚާބު ބާއްވަން ހަމަޖެހިފައިވާ ތާރީޚު ހިމެނޭތީ ކަމަށްވެސް އެކޮމިޝަނުން ބުނެއެވެ.
ރައީސް ނިންމެވީ ހިރިމަރަދޫ ރައްޔިތުންގެ ދިރިއުޅުމުގެ ހާލަތު ރަނގަޅު ކުރުމަށާއި ޒަމާނީ ވަސީލަތްތައް ފޯރުކޮށްދިނުމަށްޓަކައި އެރަށު ރައްޔިތުން ހަނިމާދޫއަށް ބަދަލު ކުރުމަށެވެ. ސަރުކާރުން ކަށަވަރު ކޮށްދީފައިވާ ގޮތުގައި އެރަށުގެ އެއްވެސް ރައްޔިތަކު ގެދޮރުނެތި ނުތިބޭނެއެވެ.
ކޮމެންޓު ފޮނުވާ