މުލަކަތޮޅު ރަތްމަންދޫ ރައްޔިތުން އެހެން ރަށަކަށް ހިޖުރަކުރުމަށް ބޭނުންވާނަމަ، ތިން ކޮޓަރީގެ ގެތައް އަޅައިދިނުމަށްފަހު އަހަރެއްގެ ތެރޭގައި ބަދަލުކޮށް ނިންމާނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. އެމަނިކުފާނު މި ވާހަކަ ވިދާޅުވީ މުލަކަތޮޅަށް ރައީސް ކުރައްވަމުން ގެންދަވާ ދަތުރުފުޅުގައި މިއަދު ރަތްމަންދޫ ރައްޔިތުންނާ ބައްދަލުކުރައްވައި ކުރެއްވި މަޝްވަރާގައެވެ.
ބައްދަލުވުމުގައި ރަތްމަންދޫ ކައުންސިލްގެ ރައީސް އިސްމާއީލް ނާހިދު ފާހަގަކުރެއްވި ގޮތުގައި، ރަށުން އެހެން ތަނަކަށް ހިޖުރަކުރުމަށް އެދި ރައްޔިތުން ސަރުކާރަށް ޕެޓިޝަނެއް ހުށަހަޅާފައިވެއެވެ. ނަމަވެސް ހިޖުރަކުރަން އެދޭ އާއިލާތަކުގެ އިތުރުން ރަށުގައި ދިރިއުޅެން ބޭނުންވާ ބައެއް އާއިލާތައްވެސް ތިބިކަމަށާއި، މިކަމާ ގުޅޭގޮތުން މަޝްވަރާކޮށް ގޮތެއް ނިންމުމުގެ މުހިންމުކަން ނާހިދު ފާހަގަކުރެއްވިއެވެ.
ރައީސް މުއިއްޒު ވިދާޅުވި ގޮތުގައި، ހިޖުރަކުރަން ބޭނުންވާ އާބާދީތަކަށް އެ ފުރުޞަތު ފަހިކޮށްދިނުމަށް ސަރުކާރުން އެދެނީ ރައްޔިތުންނަށް ފުދުންތެރި ލުއިފަސޭހަ ދިރިއުޅުމެއް ހޯދައިދިނުމަށެވެ. ރަތްމަންދޫ ރައްޔިތުން އެހެން ރަށަކަށް ބަދަލުކުރާނީ އާބާދީގެ 80 އިންސައްތަ ރައްޔިތުންގެ ރުހުން ލިބިއްޖެނަމަ ކަމަށާއި، އެކަމަށް ރައްޔިތުންގެ މެދުގައި ވޯޓެއް ނެގުމަށް ސަރުކާރުން ވިސްނާކަމަށް އެމަނިކުފާނު ވިދާޅުވިއެވެ. މި ވޯޓު ނެގުމުގައި ކައުންސިލާއި ކަމާގުޅުންހުރި ވުޒާރާތަކާއި އިދާރާތައް ޝާމިލުވާނެއެވެ.
ހިޖުރަކުރާ ކޮންމެ ރެޖިސްޓަރޑް ގެއަކަށް މިހާރުގެ ފެންވަރާ އެކަށޭނަ ތިން ކޮޓަރީގެ ގެއެއް ސަރުކާރުން އަޅައިދޭނެކަމަށް ރައީސް ޔަޤީންކަން ދެއްވިއެވެ. "ގެ އަޅާފައި ތަޅުދަނޑި ހަވާލުކުރާނީ" ރައީސް ވިދާޅުވިއެވެ. މީގެ އިތުރުން، ބަދަލުވާ އާއިލާތަކަށް މިހާރު ދެމުންދާ 50،000 ރުފިޔާގެ އެހީ ރިވައިޒްކޮށް، އެ އަދަދު ބޮޑުކުރާނެކަމަށްވެސް އެމަނިކުފާނު ވިދާޅުވިއެވެ.
ރަތްމަންދޫ ރައްޔިތުންނަށް މާލެ ކައިރި ސަރަޙައްދަކަށް ބަދަލުވުމުގެ ފުރުޞަތު ދެއްވާނެކަމަށް ރައީސް ވިދާޅުވެ، ތުލުސްދޫ ފަދަ ރަށްތަކާ މި ކަމާ ގުޅޭގޮތުން ވާހަކަދައްކާނެކަމަށް ފާހަގަކުރެއްވިއެވެ. "ރަތްމަންދޫ ރައްޔިތުން ބޭނުންވާނަމަ އެކަން ވަރަށް އަވަހަށް ގޮތެއް ނިންމަން ބޭނުންވަނީ. ނިންމިއްޖެނަމަ ބަދަލުވާ ރަށުގައި މިއަހަރު ނުވަތަ އަންނަ އަހަރު ވީހާވެސް އަވަހަށް ގެތައް އަޅައިދޭން ފަށާނަން" ރައީސް މުއިއްޒު ވިދާޅުވިއެވެ.
ރައީސް އިތުރަށް ވިދާޅުވި ގޮތުގައި، ގެތައް އަޅަން ފަށާތާ އެއް އަހަރުގެ ތެރޭގައި ރައްޔިތުން ބަދަލުކުރުން ނިންމާލެވޭނެއެވެ. އެހެންނަމަވެސް ފުރަތަމަ ކޮން ރަށެއްކަން ކަނޑައެޅުން މުހިންމުކަމަށް އެމަނިކުފާނު ފާހަގަކުރެއްވިއެވެ.
ރަތްމަންދޫގެ ރެޖިސްޓަރޑް އާބާދީއަކީ 240 މީހުން ނަމަވެސް، އެކިއެކި ސަބަބުތަކާހުރެ ރަށުން މީހުން ފައިބައިގެން މިވަގުތު ރަށުގައި ދިރިއުޅެނީ 100 މީހުންނަށްވުރެ މަދު އަދަދެކެވެ. މިފަދަ ކުދި އާބާދީތަކުގެ ދިރިއުޅުމުގެ ފެންވަރު ރަނގަޅުކުރުމަށް ސަރުކާރުން ކުރާ މަސައްކަތުގެ ތެރޭގައި ހިޖުރަކުރުމުގެ ފުރުޞަތު ފަހިކޮށްދިނުމަކީ މުހިންމު ސިޔާސަތެއްކަމަށް ސަރުކާރުން ދެކެއެވެ.
ކޮމެންޓު ފޮނުވާ