އިންޑިއާއިން ރާއްޖެއަށް ކަނޑައަޅާ އާ ސަފީރުގެ މަގާމަށް ޖީ ބާލާސުބްރަމާނިއަން އައްޔަންކުރަން ނިންމައިފިއެވެ.
އިންޑިއާ ސަފީރުކަމުގެ މަގާމުގައި މިހާރު ހުންނެވީ މުނޫ މަހާވަރެވެ. އޭނާ އެ މަގާމަށް އައްޔަން ކުރީ ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި 2021 ގައެވެ. މުނޫ މަހާވަރުގެ މަގާމުގެ މުއްދަތު ހަމަވާނީ މި މަހުގެ ނިޔަލަށް ކަން އެނގިފައިވެއެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނެއްގައި ބުނީ މިވަގުތު ނައިޖީރިއާގެ ސަފީރު ކަމުގައި ހުންނެވި ބާލާސުބްރަމާނިއަން ރާއްޖެއަށް ކަނޑައަޅާ ސަފީރަކަށް ހަމަޖައްސާފައިވާ ކަމަށެވެ.
އަދި ވަރަށް އަވަހަށް މަގާމުގެ މަސްއޫލިއްޔަތާ ހަވާލުވެވަޑައިގަންނަވާނެ ކަމަށް އެ ބަޔާނުގައިވެއެވެ.
ބާލާސުބްރަމާނިއަނަކީ 1998 ވަނަ އަހަރުން ފެށިގެން އިންޑިއާގެ ހާރިޖީ ދާއިރާއަށް ހިދުމަތް ކުރައްވަމުން އަންނަ ބޭފުޅެކެވެ. އޭނާ ވަނީ މޮސްކޯ އާއި ބެންކޮކުގައި ހުންނަ އިންޑިއަން މިޝަންގެ ޑެޕިއުޓީ ޗީފްގެ މަގާމު ވެސް އަދާ ކުރައްވައިފައެވެ.
