ހދ. ހިރިމަރަދޫ ރައްޔިތުން އެހެން ރަށަކަށް ބަދަލުވުމުގެ މައްސަލަ އަވަސްކޮށްދިނުމަށް އެދި ހިރިމަރަދޫ ކައުންސިލުން ލޯކަލް ގަވަމެންޓް މިނިސްޓަރު އާދަމް ޝަރީފް އުމަރާ ބައްދަލުކޮށްފައެވެ. މި ބައްދަލުވުން ބޭއްވުނީ މިދިޔަ ސެޕްޓެމްބަރު 9 ވަނަ ދުވަހުއެވެ.
ހިރިމަރަދޫގެ ރައްޔިތުން ބަދަލުވާން ބޭނުންވަނީ ކ. ތުލުސްދޫއަށް ކަމަށް ކައުންސިލުން މިނިސްޓަރަށް އަންގާފައިވާއިރު، ތުލުސްދޫއިން ވެސް ވަނީ މިކަމަށް މަރުހަބާ ކިޔާފައެވެ. މިނިސްޓަރު ރޭ އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ހިރިމަރަދޫ ކައުންސިލްގެ ރައީސް މުހައްމަދު ވަހީދު، މި މައްސަލަ އަވަސްކޮށްދިނުމަށް އެދިވަޑައިގެންފައިވާ ކަމަށެވެ.
ހިރިމަރަދޫގެ ނެރު ތިލަވުމުގެ ސަބަބުން ރައްޔިތުންނަށް ދިމާވަމުންދާ ގިނަ ތަކުލީފުތައް ވެސް ވަނީ ކައުންސިލްގެ ރައީސް މިނިސްޓްރީގެ ސަމާލުކަމަށް ގެނެސްދެއްވާފައެވެ. މިނިސްޓަރު ވިދާޅުވެފައިވަނީ ނެރުގެ މައްސަލަ ހައްލުކުރުމަށް ސަރުކާރުގެ ގުޅުންހުރި ފަރާތްތަކާއެކު މަސައްކަތްކުރައްވާނެ ކަމަށެވެ. ނަމަވެސް ރަށުން މީހުން ބަދަލުކުރުމާ މެދު މިނިސްޓްރީން ނިންމާފައިވާ ގޮތެއް މިނިސްޓަރު ހާމައެއް ނުކުރައްވައެވެ.
ހދ. އަތޮޅުގެ އެންމެ ކުޑަ ރަށް ކަމަށްވާ ހިރިމަރަދޫގެ ރަޖިސްޓްރީގައި 584 މީހުން ތިބި ނަމަވެސް، 2022 ވަނަ އަހަރުގެ ބޯހިމެނުމުން ދައްކާ ގޮތުގައި މިހާރު އެރަށުގައި ދިރިއުޅެނީ 293 މީހުންނެވެ. މީގެ ތެރެއިން 260 މީހުންނަކީ ދިވެހިންނެވެ.
