މިއަހަރުގެ ދެވަނަ ކުއާޓަރާ ހަމައަށް ޓޫރިޒަމް ދާއިރާއިން ޖީއެސްޓީ އާއި ގްރީން ޓެކްސް ނުދައްކާ 170 ފަރާތެއްގެ ނަން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ހާމަކޮށްފިއެވެ. މި ފަރާތްތަކަކީ އެއް ލައްކައަށްވުރެ ގިނަ ރުފިޔާ ދައްކަންޖެހޭ ފަރާތްތަކެވެ. މީރާއިން މި ލިސްޓު އާންމުކުރީ މިދިޔަ ބުރާސްފަތި ދުވަހުއެވެ. ލިސްޓުގައި ބައެއް ކުންފުނިތަކާއި މަޝްހޫރު ގެސްޓުހައުސްތަކާއި ފަތުރުވެރިކަމުގެ ޚިދުމަތްދޭ ގެސްޓުޝޮޕު ފަދަ ތަންތަން ހިމެނެއެވެ.
މީރާއިން ބުނެފައިވަނީ މި ފަރާތްތަކުގެ ނަން ހާމަކުރުމުގެ ކުރިން ފައިސާ ދެއްކުމަށް ތަކުރާރުކޮށް ހަނދާންކޮށްދީ، ތަފާތު ނޯޓިސްތައް ފޮނުވައި، އިތުރު މުއްދަތުތަކާއި ފުރުސަތުތައް ދިންކަމަށެވެ. އަދި އެއްފަހަރާ ފައިސާ ދެއްކެން ނެތް ފަރާތްތަކަށް އިންސްޓޯލްމަންޓު އުސޫލުން ބަހާލައިގެން ފައިސާ ދެއްކުމުގެ ފުރުސަތުވެސް ދީފައިވާ ކަމަށް މީރާއިން ބުނެއެވެ. މިފަދަ އެއްބަސްވުމެއް ހަދައި ފައިސާ ދައްކާނަމަ، އެންފޯސްމަންޓުގެ އިތުރު ފިޔަވަޅުތައް ނާޅާނެ ކަމުގެ ޔަގީންކަންވެސް މީރާއިން ދީފައިވެއެވެ.
މީރާއިން އިތުރަށް ހާމަކޮށްފައިވަނީ ފާއިތުވި ތިން މަސް ތެރޭގައި ޖުމްލަ 44,390 އެސްއެމްއެސް، 22,761 ފޯނުކޯލް އަދި 30,550 ނޯޓިސް ޓެކްސް ދައްކާ ފަރާތްތަކަށް ފޮނުވާފައިވާ ކަމަށެވެ. މީގެ އިތުރުން 397 ފަރާތަކަށް އިންސްޓޯލްމަންޓް ޕްލޭންތަކުގެ ދަށުން ބަހާލައިގެން ފައިސާ ދެއްކޭނެ ލުއިގޮތްތައް ހަމަޖައްސައިދީފައިވާ ކަމަށްވެސް މީރާއިން ބުނެފައިވެއެވެ.
