ހދ. ހިރިމަރަދޫ ރައްޔިތުން އެދިވަޑައިގަތް ގޮތަށް އެ ރަށުގެ ރައްޔިތުން އެހެން ރަށަކަށް ބަދަލުކުރުމުގެ މަޝްވަރާތައް ސަރުކާރުން ފަށާފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.
މިކަން ކުރިއަށް ގެންދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުންނެވެ. ހިރިމަރަދޫ ރައްޔިތުން އެދިވަޑައިގަންނަވަނީ ކ. ތުލުސްދޫއަށް ބަދަލުވުމަށެވެ. މި މަސައްކަތް ކުރިއަށް ގެންދާނީ ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވުޒާރާއިންނެވެ.
ވަޒީރު އާދަމް ޝަރީފް އިތުރަށް ވިދާޅުވެފައިވަނީ ރަށެއްގެ ރައްޔިތުން އަމިއްލައަށް ބޭނުންވެގެން އާބާދީ އެހެން ރަށަކަށް ބަދަލުކުރަން އެދޭނަމަ، އެކަން ސަރުކާރަށް ހުށަހެޅުމުގެ ފުރުޞަތު އޮންނާނެ ކަމަށެވެ. މިހާތަނަށް ދެ ރަށަކުން މިކަމަށް އެދިފައިވެއެވެ. އޭގެ ތެރޭގައި ހިރިމަރަދޫގެ އިތުރުން ވ. ރަކީދޫ ހިމެނެއެވެ. އާބާދީ ބަދަލުކުރުމުގައި ސަރުކާރުގެ ސިޔާސަތަކީ ރައްޔިތުން އަމިއްލައަށް އިސްނަގައިގެން، ރައްޔިތުންގެ ދިރިއުޅުން އެންމެ ރަނގަޅުވާނެ ގޮތަކާމެދު ވިސްނައިގެން ކުރާ ކަމެއްގެ ގޮތުގައި އެކަން ކުރުން ކަމަށް ވަޒީރު ވިދާޅުވެފައިވެއެވެ. މިކަމުގައި ސަރުކާރުން ނުފޫޒެއް ނުފޯރުވާނެ ކަމަށްވެސް އެމަނިކުފާނު ވިދާޅުވިއެވެ.
ވަޒީރު އިތުރަށް ފާހަގަކުރައްވާފައިވަނީ ފެންވަރު ރަނގަޅު ޚިދުމަތްތައް ފޯރުކޮށްދެވޭނީ ކުދި އާބާދީތައް އެހެން ރަށްރަށަށް ބަދަލުކޮށްގެން ކަމަށް ރައްޔިތުން ޤަބޫލުކުރާ ކަމަށެވެ. ގިނަ ރައްޔިތުން ދެކޭގޮތުގައި އެހެން ތަނަކަށް ހިޖުރަކުރުމުގެ ސަބަބުން ކުރިއެރުންތަކެއް ލިބިދާނެ ހާލަތްތައް އެބަހުރި ކަމަށް ވަޒީރު ވިދާޅުވިއެވެ.
ހިރިމަރަދޫއަކީ ރާއްޖޭގެ އެންމެ އާބާދީ މަދު ރަށްތަކުގެ ތެރޭގައި ހިމެނޭ ރަށެއް ކަމަށާއި، އެންމެ ފަހުގެ ބޯހިމެނުމުން ދައްކާގޮތުގައި އެރަށުގެ އާބާދީއަކީ 293 ކަމަށްވެސް ވަޒީރު ފާހަގަކުރެއްވިއެވެ.
