މި ހަފްތާގެ ބުދަ އަދި ބުރާސްފަތި ދުވަހު އިމިގްރޭޝަންގެ މާލޭ އޮފީހުން ޕާސްޕޯޓުގެ ޚިދުމަތް ދޭން ހަމަޖެހިފައިވާކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ. މި ދެ ދުވަހަކީ ސަރުކާރު ބަންދު ދުވަސްތަކެއް ނަމަވެސް، މި މަހުގެ 4 އަދި 5 ވަނަ ދުވަހު ދިވެހި ޕާސްޕޯޓުގެ ޚިދުމަތް ދިނުމަށް ވަނީ ނިންމާފައެވެ.
އިމިގްރޭޝަނުން އިތުރަށް ބުނެފައިވަނީ ޕާސްޕޯޓަށް އެދި އިމުގާ ޕޯޓަލް މެދުވެރިކޮށް 24 ގަޑިއިރު ހުށަހެޅުމުގެ ފުރުޞަތު އޮންނާނެ ކަމަށެވެ. އަދި ޕާސްޕޯޓާ ހަވާލުވުމަށް ކިއުބީ މެދުވެރިކޮށް ނަންބަރު ދޫކުރާނީ ހެނދުނު 8:30 އިން މެންދުރު 14:00 އަށް ކަމަށްވެސް ވަނީ އަންގާފައެވެ.
ބުދަ ދުވަހަކީ ޤައުމީ ދުވަސް ކަމަށްވެފައި، ބުރާސްފަތި ދުވަސް ސަރުކާރުން ވަނީ ޤައުމީ ދުވަހުގެ މުނާސަބަތުގައި ބަންދުކުރުމަށް ނިންމާފައެވެ. މީގެ އިތުރުން، ފަހުން ރާއްޖެއަށް ކުރިމަތިވި ގަދަ ވިއްސާރައާ ގުޅިގެން އޮގަސްޓް 14 ވަނަ ދުވަސްވެސް ވަނީ ސަރުކާރު ބަންދު ދުވަހެއްގެ ގޮތުގައި ހަމަޖައްސާފައެވެ.
