މޯލްޑިވްސް އިމިގްރޭޝަނުން ހިންގި އޮޕަރޭޝަނެއްގައި މާލޭގެ ގެއަކުން ގަވާއިދާ ޚިލާފަށް ވިޔަފާރިކުރަމުންދިޔަ 15 ބިދޭސީން ހައްޔަރުކޮށްފިއެވެ. މި މަޢުލޫމާތު އިމިގްރޭޝަނުން ހާމަކޮށްފައިވަނީ މިއަދު 'އެކްސް' ޕްލެޓްފޯމްގައި ކުރި ޕޯސްޓެއްގައެވެ.
އިމިގްރޭޝަނުން ބުނިގޮތުގައި މިދިޔަ ހޮނިހިރު ދުވަހު ހ. ބިއަންކާ ގޭގައި ހިންގި މި އޮޕަރޭޝަނަކީ ސާފުތާހިރުކަމެއްނެތި ބިދޭސީންތަކެއް ވިޔަފާރިކުރަމުންދާކަމުގެ މަޢުލޫމާތު ލިބުމާ ގުޅިގެން ކުރިއަށް ގެންދިޔަ އޮޕަރޭޝަނެކެވެ. މި އޮޕަރޭޝަނުގައި ހައްޔަރުކުރެވުނު 15 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެންދެވިފައެވެ. އަދި އެ ގޭގައި ހިންގަމުންދިޔަ ވިޔަފާރި ހުއްޓުވުމަށް ނޯޓިސްވެސް ދެވިފައިވާކަމަށް އިމިގްރޭޝަނުން ބުނެފައިވެއެވެ.
މި އޮޕަރޭޝަނަކީ އިމިގްރޭޝަނުން މިދިޔަ މަހުގެ މެދުތެރޭގައި ތަޢާރަފުކުރި 'އިމިގްރޭޝަން ވޮޗް' ޕޯޓަލްގެ ދަށުން ކުރިއަށްގެންދާ އޮޕަރޭޝަންތަކުގެ ތެރެއިން އެއް އޮޕަރޭޝަނެވެ. މި ޕޯޓަލްގެ ދަށުން ލިބޭ މަޢުލޫމާތުތަކުގެ އަލީގައި އިމިގްރޭޝަނުން ވަނީ ގިނަ ތަންތަން ބަލައި، ގަވާއިދާ ޚިލާފު ބިދޭސީން ހައްޔަރުކޮށްފައެވެ.
ސަރުކާރުގެ އަމާޒަކީ ކުރިއަށް އޮތް ދެ އަހަރު ދުވަހުގެ ތެރޭގައި ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމެވެ. މި މަސައްކަތުގައި އިމިގްރޭޝަނުން ވަނީ ކަމާގުޅުންހުރި އެހެނިހެން އިދާރާތަކާއެކު ގުޅިގެން މަސައްކަތްކުރަން ފަށާފައެވެ.
