އިމިގްރޭޝަންގެ ނަމުގައި ދައުރުކުރެވެމުންދާ ބުޅާ މަހުގެ ކާނާ ވިއްކި ކަމަށް ބުނާ ތަންތަނުގެ ލިސްޓަކީ ދޮގު މެސެޖެއް ކަމަށް އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވިދާޅުވެއްޖެއެވެ.
މި މެސެޖް ފެތުރިފައިވަނީ އިއްޔެ މާލޭގައި ބުޅާ މަހުގެ ކާނާ ވިއްކި ކަމަށް ތުހުމަތުކުރެވޭ ބަންގްލަދޭޝްގެ މީހަކު ހައްޔަރުކުރުމަށްފަހުގައެވެ. 32 އަހަރުގެ އަރަފާތު ހޮސައިން ހައްޔަރުކުރެވުނީ އިއްޔެ ހެނދުނު އެވެ. އޭނާ މިހާރު ވަނީ އިމިގްރޭޝަންގެ ބެލުމުގެ ދަށުގައެވެ.
އިމިގްރޭޝަނުން ކުރި ކަމަށް ބުނާ އެކްސް ޕޯސްޓެއްގެ ސްކްރީންޝޮޓެއްގެ ގޮތުގައި ސޯޝަލް މީޑިއާގައި މެސެޖެއް ދައުރުވެފައިވެއެވެ. މި ޕޯސްޓުގައި ބުޅާ މަހުގެ ކާނާ ވިއްކި ބައެއް ތަންތަން ލިސްޓުކޮށްފައިވެއެވެ.
މި ފޭކު ޕޯސްޓުގައި، ފަހަކަށް އައިސް މި ތަންތަނުން ކައިފައިވާ މީހުން މެޑިކަލް އެހީއަށް އެދުމަށް އިމިގްރޭޝަނުން އިރުޝާދު ދީފައިވެއެވެ.
ނަމަވެސް އިމިގްރޭޝަން ކޮންޓްރޯލަރު މި ޕޯސްޓަކީ އިދާރާގެ ނަމުގައި ދައުރުކުރެވޭ ދޮގު ލިސްޓެއް ކަމަށް ވިދާޅުވެފައިވެއެވެ. އިމިގްރޭޝަނުން ވަނީ އޭގެ ކުޑައިރުކޮޅެއް ފަހުން މިއީ ދޮގު މަޢުލޫމާތެއް ކަމަށް ބުނެ، އެންމެން ޒިންމާދާރުކަމާއެކު ޢަމަލުކުރުމަށް އިލްތިމާސްކޮށްފައެވެ.
ބިދޭސީންނާ ގުޅޭ ގޮތުން ފަހަކަށް އައިސް ކުރެވުނު ރެއިޑްތަކުން ކާބޯތަކެތި ތައްޔާރުކުރާ ގޮތާ ގުޅޭ ގޮތުން ކަންބޮޑުވާންޖެހޭ ޙަޤީޤަތްތަކެއް ހާމަވެފައިވާތީ، ސަރުކާރުގެ އިދާރާތަކުން ސައްޙަ އަދި ވަގުތުން މަޢުލޫމާތު ދިނުމަށް ޢާންމުން ގޮވާލަމުންދެއެވެ.
ބިދޭސީން ހިންގާ ޣައިރު ޤާނޫނީ ވިޔަފާރިތައް އަމާޒުކޮށްގެން ކުރެވުނު ރެއިޑްތަކުން، ކާބޯތަކެތި އުފައްދަން އެއްގޮތަކަށްވެސް އެކަށީގެންނުވާ ގިނަ ތަންތަން މިހާތަނަށް ފާހަގަކުރެވިފައިވެއެވެ.
