ފޯއް ތައްޔާރުކުރަމުން ދިޔަ މުޑުދާރުތަނެއް ރެއިޑްކޮށް ބިދޭސީންތަކެއް އަތުލައިގެންފި އެވެ.
އިމިގްރޭޝަނުން މިއަދު ބުނީ ގަވާއިދާ ހިލާފަށް އުޅޭ ބިދޭސީންނާ ގުޅޭގޮތުން މާލެ ސިޓީ ކައުންސިލުން ހިއްސާ ކުރި މައުލޫމާތާ ގުޅިގެން، އިއްޔެ ހިންގުނު ހާއްސަ ރެއިޑުގައި، މ.ރީތި އޯކިޑްގެ ބަލައި ފާސްކޮށް، ގަވާއިދާ ހިލާފަށް އުޅެމުންދިއަ 02 ބިދޭސީއަކު ވަނީ އިމިގްރޭޝަން ބެލުމުގެ ދަށަށް ގެނެވިފައި ކަމަށެވެ.
އަދި ރެއިޑްކުރި ތަނަކީ، ދިވެހިން އާންމުކޮށް ދުފުމުގައި ބޭނުންކުރާ ފޯއް، ވިޔަފާރިއަށް ތައްޔާރުކުރަމުންދާ ތަނަކަށްވެފައި، ސާފުތާހިރުކަން އިންތިހާއަށް ދަށް ކަމަށް ފާހަގަވެފައިވާ ތަނެއްކަމުން، އެކަން ވާނީ ކަމާބެހޭ އިދާރާތަކުގެ ސަމާލުކަމަށް ގެނެވިފައި ކަމަށްވެސް އިމިގްރޭޝަނުން ވަނީ ބުނެފައި އެވެ.
އިމިގްރޭޝަނުން ވަނީ އެތަނުގެ ފޮޓޯތަކެއްވެސް އާންމުކޮށްފައި އެވެ. ފޮޓޯތަކުން ފެންނަ ގޮތުގައި ފޯއް ކޮށައި ތައްޔާރުކުރަމުންދަނީ ވަރަށް ވެސް މުޑުދާރު ތަނެެއްގެ ތެރޭގައި އެވެ. އެގޮތުން ފާހަނާއެއްގެ ދޮރުމަތީގައި ވެސް ކޮށާފައި ހުރި ފޯއްތަކެއް ހުރި މަންޒަރު އިމިގްރޭޝަނުން އާންމުކުރި ފޮޓޯތަކުން ފެނެއެވެ.
