ކުވެއިތު ފަންޑުން ކުރީ ސަރުކާރުމން ކުރިޔަށް ގެންދަން ރޭވި މަޝްރޫޢުތަކަށް ހަމަޖެއްސި ފައިސާ އަނބުރާ ގެންގޮސްފައިވާކަމަށް ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ބޮޑުތިލަދުންމައްޗަށް މިހާރު ކުރައްވަމުން ގެންދަވާ ދަތުރުފުޅުގައި ހދ. ހަނިމާދު އަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.
ރައީސް މުއިއްޒު ވިދާޅުވީ އެފައިސާ އަނބުރާ ގެންގޮސްފައިވަނީ އެ ސަރުކާރުން އެ އެހީގެ ބޭނުންކޮށްގެން ހިންގަން ރޭވި މަޝްރޫޢުތައް ލަސްކުރުމުގެ ސަބަބުން ކަމުގައެވެ.
އެމަނިކުފާނު ވިދާޅުވީ އެ އެހީގެ ބޭނުން ކޮށްގެން ހަނިމާދޫ ހިމެނޭ ގޮތަށް އިތުރު ތިން ވަރަކަށް ރަށުގައި 30 އެނދުގެ ހޮސްޕިޓަލް އެޅުމަށް ހަމަޖައްސާފައި އޮތް ކަމަށެވެ. ރައީސް ވިދާޅުވީ އޭގެ ތެރެއިން ހަނިމާދޫ ހޮސްޕިޓަލް އެޅުމަށް އޮތި ބަޔަކާއި ހަވާލުކޮށް އެއްބަސްވުމުގައި ސޮއިވެސް ކޮށްފައި ކަމުގައެވެ.
މިކަމަށް އޮތީ ކުވައިތު ފަންޑުން ހިލޭ އެހީ ހަމަޖައްސައި ދީފައި. ވަރަށް ކަނުލާ އަޑު އެއްސެވުން އެދެން. ކުވައިތު ފަންޑުން ހިލޭ އެހީ ހަމަޖައްސައި ދީފައި އޮތީ. ނަމަވެސް މިދިޔަ ސަރުކާރުން އެ ފަންޑުގެ ބޭނުން ނުކޮށް މި ޕްރޮޖެކްޓުތައް ހިންގުން ލަސް ކުރަމުން ގޮސް ކުވައިތު ފަންޑުން އެންމެ ފަހުން ފަންޑު އަނބުރާ ގެންދިޔައީ.
ރައީސް ވިދާޅުވިއެވެ.
ރައީސް މުއިއްޒު ވިދާޅުވީ، ކޮންމެ ފަނޑަކުން އެހީ ލިބުނު ނަމަވެސް، އުސޫލުތަކެއް ހުންނަ ކަމަށާއި، ފަންޑުތަކުން ދޭ އެހީ އަނބުރާ ގެންދަނީ މަސައްކަތްތަކަށް ފަރުވާ ކުޑަކުރުމުގެ ސަބަބުން ކަމުގައެވެ.
އެކަން ލަސް ކުރަމުން ގޮސް އެންމެ ފަހުން ފަންޑު އަނބުރާ ގެންދިޔައީ. ގެންދިޔައީމަ މި ރަށް ވެސް ހިމެނޭ ގޮތަށް އަނެއް ތިން ރަށަށް ވެސް މަޝްރޫއު ގެއްލުނީ. އެހެންވެގެން މިކަން ނުވެފައި މިއޮތީ.
ކުވައިތު ފަންޑުގެ އެހީ ގެއްލިގެން ދިޔައީ ކުރީ ސަރުކާރުން އެކަމަށް ފަރުވާ ކުޑަކުރުމުގެ ސަބަބުން ކަން ފާހަގަ ކުރައްވަމުން ރައީސް ވިދާޅުވިއެވެ.
ރައީސް ވިދާޅުވީ ހަނިމާދޫ އާއި ދެން އޮތް ތިން ރަށުގައި ވެސް މި މަޝްރޫއު ފެށުމަށް އެހެން ގޮތެއް ހޯދަން މަސައްކަތް ކުރައްވަމުން ގެންދަވާ ކަމުގައެވެ.
