އެމްޑީޕީން ވަނީ އުފަލާއި ހިތާމަޔާ، ކާމިޔާބީއާއި ނާކާމިޔާބީ ވެސް ތަޖްރިބާކޮށްފައިކަމަށް ކުރީގެ ފޮރިން މިނިސްޓަރު ޢަބްދުﷲ ޝާހިދު ވިދާޅުވެއްޖެއެވެ، އެމްޑީޕީގެ ސަރުކާރުގައި ރައީސް ޞާލިޙާއި ވަރަށް އަރިސްކޮށް އުޅުއްވި ޢަބްދުﷲ ޝާހިދު މިހެން ވިދާޅުވީ، އެމްޑީޕީގެ 13 މެންބަރުން ވެރިކަންކުރާ ޕާޓީ، ކޮންގްރެސް ޕާޓީއާއި ގުޅިވަޑައިގަތުމުން ކުރެއްވި ޓްވީޓެއްގައެވެ.
އެމްޑީޕީގެ ދިދައާއި، ޅެން ބައިތަކާއެކު ޝާހިދު ކުރެއްވި ޓްވީޓެއްގައި ވިދާޅުވީ، އެމްޑީޕީ އަކީ ޑިމޮކްރެޓިކް އުސޫލުތަކުގެ މައްޗަށް ބިނާކޮށް ދިވެހިރައްޔިތުންގެ އުންމީދުތައް ޙާސިލުކޮށް ދިނުމަށް އުފެދި ކުރިއަށްދާ ރާއްޖޭގެ އެންމެ ދުވަސްވީ އެންމެ ފަޚުރުވެރި ޕާޓީކަން މިއަދުވެސް ހަނދާން ކުރާކަމަށެވެ.
އެމްޑީޕީ ވަނީ އުފަލާއި ހިތާމަޔާ، ކާމިޔާބީއާއި ނާކާމިޔާބީ ވެސް ތަޖްރިބާކޮށްފައިކަމަށާއި، މިދަނޑިވަޅަކީ އަނެއްކާވެސް އައު ހިތްވަރަކާ އައު ޖޯޝަކާއި އެކު ރައްޔިތުންނާއި. ޤައުމުގެ ޙައްޤުގައި ސާބިތުވެ ތިބެންވީ ވަގުތުކަމަށް ޝާހިދު ވިދާޅުވިއެވެ. އައު އުންމީދުތަކާއި އައު ލަނޑުދަނޑިި ތަކަކާއި އެކު ނިކުންނަންވީ ދަނޑިވަޅުކަމަށާއި، އެމްޑީޕީގެ ރަންރީދޫ ލަޝްކަރު ތިބޭނީ އަބަދުވެސް ވަރުގަދަ ޢަޒުމުގައި ހިތްވަރުގެ ކަމަރުބަނދެގެން ކުރިޔަށް މިސްރާބު ޖަހައިގެންކަމަށް ޝާހިދު ވިދާޅުވިއެވެ.
ހޫނުން ކެކި ހީނަރުވެދިޔަސް ބަލިވެ ބައެއްގަސް
ހޫނުން ހަމަ ތިޔަދޭށެ ދިރުން އާވެ ހަޔާތުން
އުންމީދުގެ އަލިކަން މިގެނައި ކޮންމެ ޝުޢާއެއް
އުންމީދު އުފައްދައިފިޔެ އުންމީދުގެ ސިއްރުން
– ޝާހިދު "އެކްސް"ގައި ލިޔުއްވިއެވެ.
އެމްޑީޕީ ދޫކުރައްވާ ޕީއެންސީއާއި ގުޅިވަޑައިގެންނެވި މެންބަރުންގެ ތެރޭގައި ރައީސް ޞާލިޙާއި ވަރަށް އަރިސްކޮށް އުޅުއްވި މެންބަރުންވެސް ހިމެނިވަޑައިގަންވައެވެ.
