ފުލުހުންގެ އެސިސްޓެންޓް ކޮމިޝަނަރ، މުހައްމަދު ރިޔާޒް އާއި އިންޓެލިޖެންސްގެ އިސްވެރިޔާ، ސުޕްރިޑެންޓް އޮފް ޕޮލިސް ފަރީދު އިސްމާއިލް މަސްއޫލިއްޔަތުތަކުން އެކަހެރިކޮށްފިއެވެ.
މައުލޫމާތު ލިބިފައިވާ ގޮތުގައި މި ދެބޭފުޅުން މަޤާމުގެ މަސްއޫލިއްޔަތުތަކުން އެކަހެރި ކޮށްފައިވަނީ އިއްޔެއެވެ. އޭސީޕީ ރިޔާޒު ހުންނެވި ކްރައިމް އިންވެސްޓިގޭޝަންގެ ހެޑްގެ މަގާމުން އޭނާ ދުރުކޮށް އެ މަގާމަށް ވަގުތީ ގޮތުން ޗީފް ސުޕްރިޓެންޑެންޓް އަހްމަދު ނާފިޒް ވަނީ ހަމަޖައްސަވާފައެވެ. އަދި ފަރީދުގެ ބަދަލުގައި ވަގުތީ ގޮތުން ހަމަޖައްސަވާފައިވަނީ ސުޕްރިޓެންޑެންޓު އޮފް ޕޮލިސް އިސްމާއީލް ޝަމީމްއެވެ.
މިދެ ބޭފުޅުން ވެސް މަގާމުން އެކަހެރި ކޮށްފައިވާއިރު، އެހެން މަސްއޫލިއްޔަތެއް ހަވާލުކޮށްފައިވާ ކަމެއް އަދި އެނގިފައެއް ނުވެއެވެ. މި ސަރުކާރުގެ އިސް ބޭފުޅުންގެ ފާޑުކިޔުން އިދިކޮޅުގައި ތިބިއިރު ރިޔާޒަށް ވަރަށް ބޮޑަށް އަމާޒުވިއެވެ. ހާއްސަކޮށް ކުރީގެ ރައީސް ޔާމީންއާ ގުޅޭ ގޮތުން ރިޔާޒު އިސްވެ ހުންނަވައި ހިންގެވި ތަހުގީގުތަކާ ގުޅޭ ގޮތުން ފާޑުކިޔުން ބޮޑުވިއެވެ.
މިސަރުކާރުން މިހާތަނަށް ކޮމިޝަނަރ އޮފް ޕޮލިސްގެ މަގާމަށް ބޭފުޅަކު އައްޔަން ކޮށްފައެއް ނުވާއިރު، ފުލުހުންގެ އިދާރާ ހިންގުމާ މިހާރު ހަވާލުވެވަޑައިގެން ހުންނެވި ޑެޕިއުޓީ ކޮމިޝަނަރު އޮފް ޕޮލިސް އަބްދުލް މަންނާން ޔޫސުފް އާއި ޑެޕިއުޓީ ކޮމިޝަނަރު އޮފް ޕޮލިސް އަލީ ރަޝީދު ވަނީ މިމަހުގެ 25 ވަނަ ދުވަހު ރިޓަޔާވާން ނިންމަވާފައެވެ.
މިސަރުކާރުގެ މިނިސްޓަރ އޮފް ހޯމްލޭންޑް ސެކިއުރިޓި އެންޑް ޓެކްނޮލޮޖީ، އަލީ އިހުސާން ވިދާޅުވީ، ކޮމިޝަނަރ އޮފް ޕޮލިސް އަށް ބޭފުޅަކު އައްޔަން ކުރުމުގެ މަސައްކަތް ވަރަށް ބާރަށް ކުރައްވަމުން އަންނަ ކަމަށެވެ.
ފުލުހުންގެ ހިދުމަތުގެ ގާނޫނު ބުނާ ގޮތުން ކޮމިޝަނާ ކަމަށް އައްޔަން ކުރެވޭނީ ފުލުހުންގެ ހިދުމަތުގެ ވަޒީފާގައި އެސިސްޓަންޓް ކޮމިޝަނާ އޮފް ޕޮލިސްގެ ރޭންކުން ފެށިގެން މަތީ ރޭންކެއްގައި ހުރި މީހަކަށެވެ. އެކަމަށް ކުރިމަތިލާން ހުޅުވާލުމުން، ކުރިމަތިލާ ފަރާތްތަކާ ފުލުހުންގެ ބޯޑުން އިންޓަވިއުކޮށް ހޯމް މިނިސްޓަރަށް ހުށަހަޅާ ނަންތަކުގެ ތެރެއިން، މިނިސްޓަރުގެ ލަފާގެ މަތިން ކޮމިޝަނަރު އައްޔަން ކުރައްވާނީ ރައީސުލްޖުމްހޫރިއްޔާއެވެ.
One Response
ސީދާ ޕޮލިސްއިން ބޭރުކޮށްލަންޖޭހޭ ދެ ގެރިތީ.އަލްހަމްދުލިއްލާހި ބޮޑު މުސީބާތަކުން ސަލާމަށްވީ،ޕާޓީކުދިން ކޮޅުގޮވައިގެން އަވަހަށް ރައްކާވޭ