ބޯހިޔާވަހިކަން ފޯރުކޮށްދޭން ކަމަށް ބުނެ ކޭޕާކުން އެޕާޓްމަންޓްތައް ވިއްކުމުގައި އެތައް ބަޔަކަށް ލަނޑުދިން މައްސަލާގައި ތުހުމަތު ކުރެވޭ އާބަންކޯގެ މުވައްޒަފަކު އެކޯޕަރޭޝަންއިން މިއަދު ސަސްޕެންޑް ކޮށްފިއެވެ.
އާބަންކޯއިން މިއަދު މީޑިއާތަކާއި ހިއްސާކުރި ސްޓޭޓްމަންޓެއްގައި ވިދާޅުވެފައިވަނީ، އެ ކޯޕަރޭޝަންގެ ޕްރޮގްރެސިވް ޑިސިޕްލްނަރީ އެކްޝަން ޕޮލިސީގެ ދަށުން, ކޭޕާރކް މައްސަލައިގެ ތަހުޤީޤު ކުރިއަށްދާ މުއްދަތުގައި, ކުރެވިފައިވާ ތުހުމަތުތަކަށް ރިޢާޔަތްކޮށް, އެ ކޯޕަރޭޝަންގެ މުވައްޒަފު އަބްދުލް ނާފިއު މުހަންމަދު 14 ދުވަހުގެ މުއްދަތަށް ސަސްޕެންޑް ކޮށްފައިވާކަމުގެވެ. އަދި ފުލުހުންނާއި އެ ކޯޕަރޭޝަންގެ އިންޓަރނަލް އޮޑިޓުން މި މައްސަލަ ތަހުޤީޤުކޮށް ނިމުމުން, އެ މުވައްޒަފަށް އިތުރަށް ފިޔަވަޅެއް އަޅަން ޖެހިއްޖެނަމަ އެ ފިޔަވަޅު އަޅާނެ ކަމަށްވެސް އާބަންކޯއިން ވިދާޅުވެފައި ވެއެވެ.
ކޭޕާކުން އެޕާޓްމަންޓްތައް ވިއްކުމުގައި އެތައް ބަޔަކަށް ލަނޑުދިން މައްސަލާގައި ކުރިޔަށްދާ ތަހުގީގުގެ ބޭނުމަށް ފުލުހުންވަނީ ކިހާތަނަށް ތުހުމަތު ކުރެވޭ ގިނަ ބައެއްގެ ޕާސްޕޯޓުވެސް ހިފަހައްޓާފައެވެ.
އޭގެ ތެރޭގައި، ކޭޕާކް ރެޒިޑެންސްގެ އެޕާޓްމަންޓްތައް ހަންބޯގެ ނަމުގައި ހަދާފައިވާ ފޯޖް ލިޔުންތަކެއް ބޭނުން ކޮށްގެން އެޕާޓްމަންޓްތައް ވިއްމުން ގެންދާކަމަށް ތުހުމަތުކުރެވޭ މައްސަލަ އާއި ގުޅިގެން ޕާސްޕޯޓު ހިފަހައްޓާފައި ހަސަން މަމްދޫހު (މަންޑޭ)ގެ އިތުރުން އޭނާއާއި ގާތް ގުޅުމެއް އޮންނަ ފަރާތްތައްވެސް ހިމެނެއެވެ.
ހުޅުމާލޭގެ ސެންޓްރަލް ޕާކުގެ ހުޅަނގު ފަރާތުގައި 14 ބުރިއަށް އިމާރާތް ކޮށްފައިވާ ކޭ ޕާކް ރެޒިޑެންސް އަކީ 110 އެޕާޓްމަންޓްގެ އިމާރާތެކެވެ. މީގެތެރޭގައި ހިމެނެނީ ދެ ކޮޓަރި އާއި ތިން ކޮޓަރީގެ އެޕާޓްމެންޓްތަކެވެ. ކޭޕާކް ރެސިޑެންސް ބިލްޑިން ހިމެނޭ ބިމަކީ 21،000 އަކަފޫޓްގެ ބިމެކެވެ. އެ ބިލްޑިންގުގައި މީހުން ދިރިއުޅޭ އެޕާޓްމެންޓްތައް ހުންނާނީ 11 ބުރިއެއްގައެވެ. އިމާރާތުގެ ބޭސްމަންޓް ޕާކިން އަށް ހާއްސަ ކޮށްފައިވާއިރު ފުރަތަމަ ދެ ބުރި ހާއްސަކޮށްފައި އޮންނާނީ ކޮމާޝަލް ބޭނުން ތަކަށެވެ. މި ކޮންޑެމީނިއަމްގެ މަސައްކަތް ފެށީ 2017 ވަނަ އަހަރުއެވެ.
ކޭ-ޕާކު ރެސިޑެންސް ތަރައްގީ ކުރަމުންދާ ކުންފުނި، ހަންބޯ ކޮމްޕެނީ ޕްރައިވެޓް ލިމިޑެޓުގެ 95 ޕަސަންޓް ހިއްސާދާރަކީ އަދި މެނޭޖިން ޑިރެކްޓަރަކީ ޗައިނާގެ ވިޔަފާރިވެރިއެއް ކަމަށްވާ ޖިން ޝިހޫއެވެ. މައިނޯރިޓީ ހިއްސާދާރަކީ މަންޑޭއެވެ. އެއީ ފަސް ޕަސެންޓް ހިއްސާއެވެ.
