ރަމަޞާން މަހުގެ ރޭތައް އިޙްޔާކޮށް ދިރުވުމުގެގޮތުން ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމުގެ މައުމޫނު ފައުންޑޭޝަނުން ޚާއްސަ ޖަލްސާއެއް ބާއްވަން ނިންމައިފިއެވެ.
"އެންމެ މާތް މައްސަރު" މިނަމުގައި ބާއްވާ މިޖަލްސާ އޮންނާނީ ރަމަޟާން މަހުގެ 27 ވިލޭރޭގައެވެ. އެއީ އަންނަ ހޯމަދުވަހުގެ ރެއެވެ.
މައުމޫނު ފައުންޑޭޝަނުން ވިދާޅުވީ މިއީ މައުމޫން ފައުންޑޭޝަނާއި އިސްލާމީ އެހީތެރިކަމުގެ ގުޅުން ގުޅިގެން ބާއްވާ ޚާއްޞަ ޖަލްސާއެއްކަމަށެވެ. ޖަލްސާ އޮންނާނީ ބަރާތީ ހޯލް ނުވަތަ ކުރީގެ ރާނބާ ރެސްޓްރޯންޓްގައިކަމަށްވެސް އެފައުންޑޭޝަނުން ވިދާޅުވެއެވެ.
މި ޖަލްސާގައި ކުރީގެ ރައީސުލްޖުމްހޫރިއްޔާ އަދި މައުމޫން ފައުންޑޭޝަންގެ ޗެއަރމަން، ރައީސް އަލްއުސްތާޛު މައުމޫން އަބްދުލްޤައްޔޫމް ވާހަކަފުޅު ދައްކަވާނެއެވެ.
ރައީސް މައުމޫނަކީ އެމަނިކުފާނު ރާއްޖޭގެ ވެރިކަމުގައި ހުންނެވި ދުވަސްވަރު ރަމަޟާން މަހުގެ ރޭތައް އިޙްޔާކޮށް ދިރުވުމުގެ ގޮތުން ޚާއްސަ މަސައްކަތްޕުޅުތަކެއް ސިލްސިލާގޮތެއްގައި ކުރެއްވި ވެރިއެކެވެ. އެމަނިކުފާނުގެ ސީދާ އިސްނެންގެވުމުގެ މަތިން އޭރު ކޮންމެ ރަމަޞާންމަހެއްގައިވެސް ސަރުކާރުގެ ފަރާތުން ޚާއްސަ އިހްޔާ ޖަލްސާތަކެއް އިސްލާމީ މަރުކަޒުގައި އައީ ބާއްވަމުންނެވެ. އެމަނިކުފާނު ވެރިކަމުން ވަކިވެވަދައިގަތުމުން އެޖަލްސާތައް މެދުކެނޑުނެވެ. އެހެންނަމަވެސް އަނެއްކާވެސް ސަރުކާރުން އިޙްޔާ ފޯރަމްގެ ނަމުގައި ފަހުން އެޖަލްސާތައް ފެށިއެވެ.
ވެރިކަމުން ވަކިވެވަޑައިގަތްފަހުންވެސް ރައީސް މައުމޫން ގެންދަވަނީ ކޮންމެ ރަމަޟާން މަހެއްގައި މައުމޫނު ފައުންޑޭޝަންގެ ފަރާތުން މިފަދަ ޖަލްސާތައް ބާއްވަމުންނެވެ.
