އދ.ގެ ކުރިއަށް އޮތް ދައުރުގެ ސެކެރެޓަރީ ޖެނަރަލްގެ މަޤާމަށް އަންހެނަކު އިންތިހާބު ކުރަންވީ ވަގުތު ޖެހިއްޖެކަމަށާއި، އެމަޤާމަށް ވަޑައިގަންވަންޖެހޭނީ އަންހެން ބޭފުޅެއްކަމަށް ރާއްޖޭގެ ފޮރިން މިނިސްޓަރ އަދި އދ.ގެ ޢާއްމު މަޖިލީހުގެ ނިމިދިޔަ 76ވަނަ ދައުރުގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވީ މަޝްހޫރު ފޯބްސް މަޖައްލާއަށް ދެއްވި އިންޓަވިއުއެއްގައެވެ. ޝާހިދުވަނީ މިމަހުގެ 12ވަނަދުވަހު އޭނާގެ ޢާއްމު މަޖިލީހުގެ ދައުރު ހަމަވުމާ ގުޅިގެން ދެއްވި ވަދާޢީ ތަޤުރީރުގައިވެސް މިކަން ފާހަގަކުރައްވާފައެވެ. އެގޮތުން އދ.ގެ 70 އަހަރުވީ ތާރީޚުގައި އެމަޖިލީހުގެ އިސްލީޑަރަކަށް ނުވަތަ ސެކްރެޓެރީ ޖެނަރަލަކަށް އަންހެނަކު ހޮވިފައި ނުވާކަމަކީ ލަދުގަންނަން ޖެހޭކަމެއްކަމަށް ޝާހިދުވަނީ ވިދާޅުވެފައެވެ. އަދި ވަރަށްބޮޑު ގޯހެއްގެގޮތުގައި ޝާހިދު ސިފަކުރެއްވިއެވެ. ޝާހިދު ވިދާޅުވީ ކުރިއަށް އޮތް ދައުރަކީ އދ.ގެ ސެކްރަޓަރީ ޖެނަރަލަށް އަންހެނަކު ގެންނަންވީ ވަގުތުކަމަށާ، އެމަޤާމަށް އެކަށީގެންވާ ވަރަށްގިނަ އަންހެން ބޭފުޅުން ދުނިޔޭގެ އެކި ޤައުމުތަކުގައި އެބަތިއްބެވިކަމަށެވެ. ޝާހިދުވަނީ އދ.ގެ ޢާއްމު މަޖިލީހުގެ އޭނާގެ ދައުރު ނިމުމާއެކު ރާއްޖެ ވަޑައިގެން ދެން ކުރައްވާނެ އެންމެ މުހިންމު އެއް މަސައްކަތަކީ އދ.ގެ ސެކްރެޓަރީ ޖެނެރަލްގެ މަޤާމަށް އަންހެނަކު ގެނައުމަށް ކުރަންޖެހޭ މަސައްކަތްކަމަށް ވިދާޅުވެފައެވެ.
ޝާހިދަކީ ރާއްޖޭގެ ފޮރިން މިނިސްޓަރުގެ ޙައިސިއްޔަތުންނާއި އދ.ގެ ޢާއްމު މަޖިލީހުގެ ރައީސްގެ ޙައިސިއްޔަތުންވެސް، އަންހެނުން ބާރުވެރިކުރުވަން ގިނަ މަސައްކަތްޕުޅުތަކެއް ކުރައްވާފައިވާ ބޭފުޅެކެވެ.
އދ.ގެ މިހާރުގެ ސެކްރެޓަރީ ޖެނަރަލަކީ އެންޓޯނިއޯ ގުޓަރޭޒެވެ. އދ.ގެ 77 އަހަރުވީ ތާރީޚުގައި 9 ބޭފުޅަކު ސެކްރެޓަރީ ޖެނެރަލްގެ މަގާމު އަދާކުރައްވާފައިވެއެވެ. ސެކްރެޓަރީ ޖެނަރަލްގެ އެންމެފަހުގެ އިންތިޚާބު ގުޓަރޭޒް ކާމިޔާބު ކުރެއްވިއިރު ހަތް އަންހެން ބޭފުޅަކު ވާދަކުރެއްވިއެވެ.
