ރަޝިއާ ސިފައިން ޔޫކުރެއިންއަށް އަރާ އެގައުމު ހިފައިފާނެކަމުގެ ބިރު ހީވެފައި ވާއިރު، ދުނިޔޭގެ އެކި ގައުމުތަކުން އެގައުމުގައި ތިބޭ ގައުމުތަކުގެ ރައްޔިތުން ޔޫކުރެއިން ދޫކޮށް ދިއުމަށް އިލްތިމާސް ކުރަމުން ދާއިރު، ޔޫކުރެއިންގައި ތިބި ދިވެހި ކިޔަވާ ކުދިންތަކަކަކަށް ސަރުކާރުގެ ކަމާ ގުޅުން ހުރި ބައެއް މުވައްސަސާތަކުން އެކަށީގެންވާ އެހީތެރިކަން ފޯރުކޮށް ދެމުން ނުދާކަމުގެ ޝަކުވާ ބައެއް ދަރިވަރުން ކޮށްފިއެވެ.
ޔޫކުރެއިންގެ ކާރކިވް ސިޓީގައި ތިބޭ ދިވެހި ކުދިންގެ ފަރާތުން، އާންމު ކޮށްފައިވާ ބަޔާނެއްގައި ބުނެފައިވަނީ، ރަޝިއާއިން ޔޫކްރެއިންއަށް ހަމަލާ ދީފި ހާލަތެއްގައި ޔޫކުރެއިން ވައިގެ ސަރަހައްދުތައް ބަންދުކޮށް، އަދި ބޯޑަރުތައް ބަންދު ކޮށްފާނެ ކަމަށް ބެލެވޭތީ، ފެށުނީއްސުރެ އެސިޓީގައި ތިބި ކިޔަވާކުދިން ތިބީ ވަރަށް ކަންބޮޑު ވެފައި ކަމުގައެވެ. އެ ކުދިން ތިބި ސިޓީއަކި ރަޝިއާގެ ބޯޑަރާއި އެންމެ ކައިރީގައި އޮތް އެއް ސިޓީކަމުން، ރަޝިއާއިން ޔޫކުރެއިންއަށް އަރައިފިނަމަ، އެސީޓީއަކީ އެންމެ ބޮޑު އަސަރެއް ކުރާނެ ސިޓީކަމުގައިވެސް ކާރކިވް ސިޓީގައި ތިބި ކުޔަވާކުދިންގެ ފަރާތުން ސޯޝަލް މީޑިއާގައި އާންމު ކޮށްފައިވާ ބަޔާނުގައި ބުނެފައި ވެއެވެ.
މިބަޔާނުގައި ބުނެފައިވާ ގޮތުން ފުރަތަމަ ދުވަހުން ފެށިގެންވެސް ޔޫކުރެއިންގައި ގޯސްވަމުން އައިސްފައިވާ ހާލަތާއި ގުޅޭގޮތުން ސަރުކާރުގެ އެއްވެސް މުވައްސަސާއެއްގެ އެއްވެސް އޮފިޝަލަކު ދަރިވަރުންނާ ގުޅާފައެއް ނުވެއެވެ. އަދި ދަރިވަރުންނަށް ޖެހުނީ ޔޫކްރެއިންއާއި އެންމެ ކަރީގައި ހުންނަ ދިވެހި އެމްބަސީއެއްގެ ކޮންޓެކްތައް ހޯދާއިގެން އެފަރާތަކާއި ގުޅަން ކަމަށާއި، މިގޮތުން ކުރި މަސައްކަތްތަކުން، ޔޫކްރެއިންއާއި އެންމެ ކައިރީގައި ހުންނަ އެމްބަސީ ހުންނަނީ ޖާރމަނީގެ ބާރލިންގައިކަން އެގުނު ކަމަށެވެ.
އަދި ބާލިންގައި ހުންނަ އެމްބަސީގެ އެދުމުގެ މަތިން، ޔޫކުރެއިންގައި ތިބި ދަރިވަނުންނަށް އެމަޖެންސީ ހާލަތެއްގައި އެހީތެރިކަން ފޮރުކޮށް ދިނުމަށާއި، އަދި އެމްބަސީގެ އޮފިޝަލުންނާއި މުޢާމަލާތު ކުރުމަށް ފަސޭހައަކަށް ސޯޝަލް މީޑިއާ ގުރޫޕެން ހަދާފައިވާ ކަމަށާއި، އެހެންނަމަވެސް މި ގުރޫޕުގައިވެސް އެއްވެސް އޮފިޝަލަކު ދަރިވަރުންނާއި މުޢާމަލާތު ކޮށްފައި ނުވާކަމަށްވެސް މިބަޔާނުގައި ބުނެފައި ވެއެވެ. އެހެންނަމަވެސް މު ގުރޫޕް ހެދިތާ 3ވަނަ ދުވަހު، ޔޫކްރެއިންގެ ހާލަތާއި ގުޅޭގޮތުން ހުރި ޚަބަރުތަކުގެ ސްކްރީން ޝޮތްތައް މި ގުރޫޕަށް ލުމުން ލިބިފައިވާ ޖަވާބަކީ، "އިތުރު ކަންކަން ހިނގަމުންދާ ވަރަކަށް، އަންނަމުންދާ ބަދަލުތައް މޮނިޓަރ ކުރަމުން ދާކަމަށް،" ކަމުގައެވެ.
އިތުރު ކަންކަން ހިނގަމުންދާ ވަރަކަށް، އަންނަމުންދާ ބަދަލުތައް މޮނިޓަރ ކުރަމުން ދާކަމަށް،..
ޔޫކުރެއިންގެ ކާރކިވް ސިޓީގައި ތިބި ކިޔަވާކުދިންގެ ފަރާތުން އާންމު ކޮށްފައިވާ މި ބަޔާނުގައި ބުނެފައިވަނީ، މި ސްކްރީކް ޝޮޓުތައް ގުރޫޕަށް ލީފަހުން، ހުރިހާ ދަރިވަރުންގެ އެމަރޖެންސީ ކޮންޓެކްޓެއް ޖެހުމަށް ގޫގުލް ފޯމެއް ފޮނުވާފައިވާ ކަމުގައެވެ. އަދި މިހާތަނަށް އެމްބަސީ ސްޓާފުންނާއި އެންމެ ފަހުން ކޮށްފައިވާ މުޢާމަލާތަކީ މިއީ ކަމުގައާއި، "ގާތުން ހާލު ބެލުމަށް" އެއްވެސް އޮފިޝަލަކު ކިޔަވާކުދިންނާ ގުޅާފައި ނުވާކަމަށްވެސް މި ބަޔާނުގައި ބުނެފައިވެއެވެ.
މިބަޔާނުގައި އިތުރަށް ބުނެފައިވަނީ، ޔޫކުރެއިންގައި ކިޔަވަން ތިބިު ކުދިންގެ ޔުނިވަރސީޓިން ނިންމި ނިންމުމަކީ ކޮބައިކަމެއްވެސް، އަދި ހުރި ދަތިތަކަކަކީ ކޮބައި ކަމެއްވެސް، އަދި މިހާރު އެއަރ ޓިކެޓްގެ އަގު އުފުލި، ފާއިތުވެދިޔަ 24 ގަޑިއިރުގެ ތެރޭގައި ޓިކެޓްގެ އަގު 2،500 ޑޮލަރަށް އަރައިގެން ގޮސްފައިވާއިރު، އެނބުރި ގައުމަށް ދިއުމަށް މާލީ ހާލަތު ތަންދޭތޯވެސް ނުވަނަތަ ނޫންތޯވެސް ރަސްމީ ފަރާތްތަކުން ސާފު ކޮށްފައި ނުވާކަމުގައެވެ.
އަދި މީގެ އިތުރުން، ހާލަތު ވަޒަން ކުރުމަށް ކޮށްފައިވާ މަސައްކަތްތަކާއި ގުޅޭގޮތުން އެމްބަސީގެ އޮފިޝަލުން ރަގަޅު ނޫން މައުލޫމާތު ފޯރުކޮށް ދެމުންދާތީ އެކަމާ ހިތާމަކުރާ ކަމަށްވެސް މިބަޔާނުގައި ބުނެފައި ވެއެވެ. އަދި ޔޫކުރެއިންގެ ހާލަތާއި ގުޅޭގޮތުން ސަރުކާރުގެ ފަރާތުން ހުރި ކަންބޮޑުވުންތަކުގެ ގޮތުގައި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ކުރައްވާފައިވާ ޓުވީޓަށް އިޝާރާތްކޮށް ބަޔާނުގައި ބުނެފައިވަނީ، ނަޝީދުގެ ޓުވީޓުން ހާމަވެގެން ދިޔަ ކަމަކީ، ސަރުކާރަށް ރާއްޖެ ޒިޔާރަތްކުރާ ފަތުރުވެރިންގެ މުހިންމުކަމާއި ރަޝިއާއެކު އޮތް ގުޅުން ކިޔަވާކުދިންނަށްވުރެ މުހިންމުކަމް ބޮޑުވެފައި ވާކަން ކަމުގައެވެ.
މި ބަޔާން ނިންމާލަމުން ޔޫކުރެއިންގެ ކާރކިވް ސިޓީގައި ތިބި ކިޔަވާކުދިންގެ ފަރާތުން ބުނެފައިވަނީ، އެގައުމުގައި ބައެއް ގައުމުތަކަށް ނިސްބަތްވާ 4،00 އަށްވުރެ ގިނަ ކިޔަވާކުދިން އެބަތިބި ކަމަށާއި، އެހެންނަމަވެސް، މިކުދިން ނޭދެނީސް، އެގައުމު ދޫކޮށް ދިއުމަށް އެގައުމުތަކުން އިލްތިމާސްކޮށް އެހީތެރިކަން ފޯރުކޮށް ދެމުން ދާކަމަށާއި، އެހެންނަމަވެސް އެގައުމުގައި ތިބި މަދު ދިވެހި ކިޔަވާކުދިން އެހީތެރިކަމަށް އެދި ސަރުކާރުގެ މުއްސަސާތައް ފަހަތުން ދުވަން ޖެހުމަކީ ލަދުވެތި ވާންޖެހޭ ކަމެއް ކަމަށެވެ.
އަދި ޓިކެޓްގެ އަގު އިންތިހާއަށް އަރައިގެން ދިއުމުގެ ކުރިން، އިވެކުއޭޝަންގެ ހާލަތުގައި ދަރުވަރުންގެ ރިކުއެސްޓުތައް ބަލައިގަތުމަށް ޔުނިވަރސީޓިއަށް ބޭނުންވާނެ، އިވެކުއޭޝަންގެ ރަސްމީ ނޯޓިސް ދިނުމަށް ސަރުކާރުގެ އޮފިޝަލުންގެ ކިބައިން، އެދިފައި ވާނެކަމަށާއި، އެގޮތަށް އެދުނީ ޓީކެޓްގެ އަގު އަރައިގެން ދިއުމުގެ ކުރިން އަމިއްލައަށްވެސް ޓިކެޓް ގަނެގެން އެނބުރި ގައުމަށް ދިއުމުގެ ޝައުގުވެރިކަން ހުރެގެން ކަމުގައިވެސް މިބަޔާނުގައި ބުނެފައި ވެއެވެ. އެހެންނަމަވެސް، ޓިކެޓްގެ އަގު މިހާރު ހުރިގޮތުން، އަމިއްލަ ޚަރަދުގައި ޓިކެޓް ގަނެގެން އެބުރި ގައުމަށް ދިއުމަކީ ހުރިހާ ކުދިންނަށް ކުރެވޭ ވަރުގެ ކަމަކަށް ނުވާނެކަމުގައިވެސް ބުނެފައި ވެއެވެ.
އަދި ހަމަ މިހާލަތު މިގޮތަށް، 2014ވަނަ އަހަރު ރަޝިއާއި ޔޫކުރެއިންއާ ދެމެދު ހަގުރާމަ ހިނގިއިރުވެސް ކުރިމަތިވެފައި ވާކަމަށާއި، އެފަހަރުވެސް ބެލެނެވެރިން ފޮރިންގ މިނިސްޓްރީއަށް ގޮސް ސަލާންޖަހަން ޖެހުނުއިރު، އަދި އޭގެ 8 އަހަރުފަހުން މިހާލަތު އައިއިރު ކަންކަން ރަގަޅުވާނެ ކަމަށް އުއްމީދު ކުރެވުނު ނަމަވެސް އައި ހެޔޮ ބަދަލެއް ފެންނާން ނެތްކަމުގައި މިބަޔާނުގައި ދަރިވަރުން ބުނެފައި ވެއެވެ.
