ދުނިޔޭގެ ފަހުގެ އާކިޓެކްޓުން ކުރަހާ އަދި ޑިޒައިން ކޮށްފައިވާ އެންމެ އާދަޔާ ޚިލާފު ބިނާތައް ނުވަތަ އިމާރާތްތަކަކީ، އާދާޔާ ޚިލާފަށް އުސްކޮށް، ޖައްވުގައި ދައުރުކުރަމުންދާ ވިލާތައްވެސް ފަސްދީ، އިމާރާތް ޖައްވަށް އަރައިގެންދާ އިމާރާތެއް ފަދައިން ބިނާ ކޮށްފައިވާ އުސް ބިލްޑިންގތަކެވެ.
މިގޮތުން އިމާރާތްކޮށްފައިވާ މިފަދަ ބިލްޑިންތަކަކީ، ގައުމުތަކުން ތަފާތު އެކި ކަންކަމުގައި ބޭނުންކުރަމުންދާ ތަންތަނެވެ. މިގޮތުން، ޓޫރިސްޓުން ތިބޭ ހޮޓާތަކުގެ ގޮތުގައާއި، އެޕާރޓްމަންޓްތަކުގެ ގޮތުގައާއި، ވިޔަފާރީގެ މަރުކަޒުތަކުގެ ގޮތުގައާއި، އަދި މީގެއިތުރުން ޝޮޕިންގެ ސެންޓަރު ތަކުގެ ގޮތުގައިވެސް ދުނިޔޭގެ ތަރްގިވެފައިވާ ގައުމުތަކުގައި ހުރި މި އިމާރާތްތައް ބޭނުން ކުރެވެމުން ދެއެވެ.
1 ބުރުޖު ޚަލީފާ، ދުބާއި
ޔުނައިޓެޑް އަރަބި އެމިރޭޓްސްގެ، ދުބާއީގެ ޑައުންޓައުންގައި ހުންނަ ބުރުޖު ޚަލީފާއަކީ މިހާރު ދުނިޔޭގައި ހުރި އެންމެ އުސް އިމާރާތެވެ. މި ބިނާގެ އުސްމިނަކީ 2,717 ފޫޓެވެ. އަދި މި އިމާރާތުން ދުނިޔޭގެ އެންމެ އުސް އިމާރާތުގެ ރެކޯޑޫ ދަމަހައްޓަމުން ދާތާ ވަނީ 10 އަހަރު ފާއިތުވެފައެވެ.
ޖައްވުގެ ދެތެރެއަށް އުހަސ ދެމިގެން ގޮސްފައިވާ، 163 ބުރީގެ މި އިމާރާތުގައި ޓޫރިސްޓު ހޮޓެލްތަކާއި، އަދި ފަތުރުވެރި އެހެނިހެން މަންޒިލްތަކާއި، އެޕާރޓްމަންޓްތަކުގެ އިތުރުން އޮފީސްތައްވެސް ހިމެނޭ މި އިމާރާތް ނިންމާ ލެވިފައިވަނީ، އިމާރާތްކުރަން ފެށިތާ 6 އަހަރު ދުވަހުގެ ތެރޭގައި، 2010ވަނަ އަހަރުއެވެ.
މި އިމާރާތުގައި، ދުނިޔޭގެ އެންމެ އުހުގައި އޮންނަ ފަތާ ފެންގަޑު އޮތުމުގެ އިތުރުން، ދުނިޔޭގެ އެންމެ އުސް އެލެވޭޓަރ (ލިފްޓް)ވެސް ހުންނަނީ މި އިމާރާތުގައެވެ.
2. ޝަންގހާއި ޓަވަރ، ޗައިނާ
އުސް މިނުގައި 632 މީޓަރު ހުންނަ، ޗައިނާގެ ޝަންގހާއީ ޓަވަރަކީ ދުނިޔޭގެ ދެވަނައަށް އެންމެ އުސް އިމާރާތެވެ.
2015ވަނަ އަހަރު ބިނާކުރެވުނު، ޝަންގހާއީގެ ޕުޑޮންގ އަވަށުގައި ހުންނަ މި ބިޔަ ބިލްޑިންގގައި 128ބުރި ހުރެއެވެ. އަދި މި އިމާރާތުގައި ގިނަ އަދަދެއްގެ އޮފީސްތައް ހުންނައިރު، މީގެ އިތުރުން، ކައިރީގައި އޮންނަ ހުއާންގޕު ކޯރު ބަލާލެވޭ ގޮތަށް ހަދާފައި އޮންނަ ރީތި އޮބްޒަވޭޝަން ޑެކް (ދުރު ބަލާލުމަށް ހަދާފައި އޮންނަ ފުރާޅެއް) އެއް އޮވެއެވެ.
މި އިމާރާތުގައި ހަރުކުރެވިފައި ހުންނަ ލިފްޓަކީ ސިކުންތަކުގެ 20.5 މީޓަރު ބާރުމިނުގައި ދަތުރުކުރާ ލިފްޓެކެވެ.
3. މައްކާގައި ހުންނަ ރޯޔަލް ކްލޮކް ޓަވަރ، ސައުދީ އަރަބިއާ
ސައުދީ އަރަބިއާގެ މައްކާގައި ހުންނަ ރޯޔަލް ކްލޮކް ޓަވަރުގެ އުސްމިނުގައި 601 މީޓަރު ހުރެއެވެ. މި ޓަވަރުގައި ހުންނަ ގަޑިއަކީ، މިހާރު ދުނިޔޭގައި، މިގޮތަށް ފާޅުކޮށް ފެންނަ ގޮތަށް ހުރި އެންމެ ބޮޑު ގަޑިއެވެ. އަދި މި ޓަވަރަކީ، އިތުރު އެއްވެސް ސަޕޯޓެއް ނެތި އެންމެ އިމާރާތެއް ގޮތަށް، އެންމެ އުސްކޮށް ބިނާ ކޮށްފައިހުރި، ދުނިޔޭގެ 5 ވަނައަށް އެންމެ ސުއް އިމާރާތެވެ.
މި ޓަވަރުގައި ފަސް ބުރިއަށް ހަދާފައި ހުންނަ ޝޮޕިންގ މޯލްއެއް ހުންނައިރު، ހޮޓަލެއްގެ އިތުރުން ނަމާދުކުރާ މިސްކިތްތައްވެސް މި ޓަވަރުގައި ހުރެއެވެ. މިއި ކޮންމެ މިސްކިތެއްގައިވެސް 10 ހާހަށްވުރެ ގިނަ މީހުންނަށް ނަމާދު ކުރެވޭނެ ޖާގަ ހުރެއެވެ.
4. ޕިންގ އަން ފައިނޭނަސް ސެންޓަރ، ޗައިނާ
ދުނިޔޭގައި މިހާރު ހުރި 4 ވަނައަށް އެންމެ އުސް އިމާރާތްކަމުގައިވާ ޕިންގ އަން ފައިނޭނަސް ސެންޓަރއަކީ، 2017ވަނަ އަހަރު ޗައިނާގެ ޝެންޒެންގައި ބިނާ ކުރެވުނު އިމާރާތެކެވެ.
115 ފަންގިފިލާ ހުންނަ މި އިމާރާތުގައި 599 މީޓަރު ހުރެއެވެ. މިއިމާރާތުގައި އޮފީސްތަކާއި، ހޮޓާތަކާއި، ރީޓެއިލް ވިޔަފާރި ކުރާ ޖާގަތަކާއި، އަދި މަތީ ފަންތީގެ ޝޮޕިންގ މޯލްތައްވެސް ހުރެއެވެ.
5. ލޮޓް ވާރލްޑް ޓަވަރ، ސައުތު ކޮރެއާ
ލޮޓް ވާރލްޑް ޓަވަރަކީ މިހާރު ދުނިޔޭގައި ހުރި 5 ވަނައަށް އެންމެ އުސް އިމާރާތެވެ. މި ޓަވަރުގެ އުސްމިނުގައި 555 މީޓަރު ހުރެއެވެ. ސައުތު ކޮރެއާގެ ވެރިރަށް ސޯލްގެ ސޮންގޕާ ޑިސްޓްރިކްޓުގައި ހުން މި ޓަވަރުގައި 123 ފަންގިފިލާ ހުރެއެވެ. އަދި ބިމުގެ އަޑިއަށް ހަބުރި ހުރެއެވެ. އިމާރާތުގައި ހޮޓާތަކާއި، އޮފީސްތަކުގެ އިތުރުން ރީޓެއިލް ވިޔަފާރިކުރާ ފިހާރަތައްވެސް ހުރެއެވެ.
މި ބިލްޑިންގ އިމާރާތްކޮށް ނިންމާފައިވަނީ، ޑިޒައިންކުރުމާއި، އެހެނިހެން ތައްޔާރީތަކަށް 13 އަހަރު ހޭދަވެގެން ދިއުމަށްފަހު 2017ވަނަ އަހަރުއެވެ.
6. ވަން ވާރލްޑް ޓްރޭޑް ސެންޓަރ
އެމެރިކާގެ ނިއުޔޯކުގައި ހުންނަ ވަން ވާރލްޑް ޓްރޭޑް ސެންޓަރއަކީ، އުސްމިނުގައި 541 މީޓަރު ހުންނަ، ދުނިޔޭގެ 6 ވަނައަށް އެންމެ އުސް އިމާރާތެވެ. އަދި މިއީ، ދުނިޔޭގެ ހުޅަގު ބިތުގައި ހުރި އެންމެ އުސް އިމާރާތްވެސްމެއެވެ.
110 ފަންގިފިލާ ހުންނަ މި އިމާރާތަކީ، 2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު އެމެރިކާގެ ވާރލްޑް ޓްރޭޑް ސެންޓަރަށް ދިން ޓެރަރިސްޓް ހަމަލާގައި މަރުވެދިޔަ މީހުންގެ ހަދާނުގައި ކޮށްފައިވާ ބިނާއެކެވެ.
7. ގުއާންޒޯ ސީޓީއެފް ފައިނޭންސް ސެންޓަަރ
ގުއާންޒޯ ސީޓީއެފް ފައިނޭންސް ސެންޓަަރުގެ އުސްމިނުގައި 530 މީޓަރު ހުންނައިރު، މި މި ބިލްޑިންގ އިމާރާތްކޮށް ނިމިފައިވަނީ 2016 ވަނަ އަހަރުގެ އޮކްޓޯބަރ މަހުއެވެ.
111 ފަންގިފިލާ ހުންނަ މި އިމާރާތް ބިނާކޮށް ނިންމަން 6 އަހަރު ހޭދަވިއެވެ. މި އިމާރާތުގައި ސާވިސް އެޕާޓްމަންޓް ތަކާއި، ހޮޓާތަކާއި، އޮފީސްތަކުގެ އިތުރުން ޝޮޕިންގ މޯލްތައްވެސް ހުރެއެވެ.
8. ޓައިޖިންގ ސީޓީއެފް ފައިނޭންސް ސެންޓަރ، ޗައިނާ
ޓައިޖިންގ ސީޓީއެފް ފައިނޭންސް ސެންޓަރ އުސް އިމާރާތް ހުންނަނީ ޗައިނާގެ ޓައިޖިންގ ސިޓީގައެވެ. މި އިމާރާތުގެ އުސްމިނުގައި 530 މީޓަރު ހުރެއެވެ.
1997ވަނަ އަހަރު އިމާރާތްކޮށް ނިންމުނު މި ބިލްޑިންގގައި 97 ފަންގިފިޕާ ހުންނައިރު، 81 ލިފްޓް ބެހެއްޓިފައި ހުރެއެވެ.
9. ސިޓިކް ޓަވަރ، ޗައިނާ
ޗައިނާގެ ވެރިރަށް ބޭޖިންގގައި ހުންނަ މި އުސް އިމާރާތުގެ އުސްމިނުގައި 528 މީޓަރު ހުންނައިރު މި އިމާރާތަށް އާންމުކޮށް ކިޔާ އުޅޭ ނަމަކީ ޗައިނާ ޒުންއެވެ.
109 ފަންގިފިލާ ހުންނަ މި އިމާރާތަކީ، ބެއިޖިންގައި ހުންނަ އެންމެ އިމާރާތަށް ވާއިރު، މި އިމާރާތް ހުންނަނީ ބޭޖިންގގެ ސެންޓްރަލް ބިޒްނަސް ޑިސްޓްރިކްޓްގައެވެ.
10 ޓައިޕެ 101، ޓައިވާން
މީގެ 10 އަހަރު ކުރިން ދުބާއީގެ ބުރުޖް ޚަލީފާ ބިނާކުރުމުގެ ކުރިން ޓައިޕެ 101އަކީ ދުނިޔޭގައި ހުރި އެންމެ އުސް އިމާރާތެވެ. ޓައިވާންގެ ކެޕިޓަލް ސިޓީގައި ހުންނަ މި އިމާރާތުގެ އުސްމިނުގައި 449 މީޓަރު ހުރެއެވެ.
މިއިމާރާތް ބިނާކޮށް ނިމިފައިވަނީ 2004 ވަނަ އަހަރުއެވެ. އަދި އެއަށްފަހު 2009ވަނަ އަހަރާއި ހަމައަށް ދުނިޔޭގެ އެންމެ އުސް އިމާރާތަކީ މިއިމާރާތެވެ.
