ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ހަރުދަނާ ޚާރިޖީ ސިޔާސަތު މުޅި ދުނިޔެއިން މިއަދު ބަލައިގަނެފައިވަކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ. ފޮރިން މިނިސްޓްރީގެ އިމާރާތް ފަތުހުﷲ ޖަމީލްގެ ނަމަށް ބަދަލުކޮށް ހުޅުވުމަށް މިއަދު ބޭއްވި ރަސްމިއްޔާތުގައި މިނިސްޓަރ ޝާހިދުވަނީ ރާއްޖޭގެ ޚާރިޖިއްޔާއިން ހޯދަމުންދާ ކާމިޔާބީތަކުގެ މައްޗަށް އަލި އަޅުވާލާފައެވެ.
ފޮރިން މިނިސްޓްރީގެ އިމާރާތް މަރުހޫމް ފަތުހުﷲ ޖަމީލުގެ ނަމަށްބަދަލުކޮށް، ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ޝާހިދު ވިދާޅުވީ ރާއްޖެ ބައިނަލް އަގުވާމީ ގޮތުން ހޯދަމުންދާ ކަމިޔާބީތަކަކީ މީގެ އެތައް އަހަރެއްކުރިން މަރުހޫމް ފަތުހުއްﷲ ޖަމީލް ކުރެއްވި މިންނެތް ބުރަ މަސައްކަތުގެ ނަތީޖާ ކަމަށެވެ. އެމަނިކުފާނުގެ ސިޔާސަތުގައި ހިފަހައްޓައި، އެސިޔާސަތުގެ ދަށުން ރައީސް ޞާލިހު ބައްޓަން ކުރައްވާފައިވާ ޚާރިޖީ ސިޔާސަތަކީ މިއަދު މުޅި ދުނިޔެ ބަލައި ގަނެފައިވާ ހަރުދަނާ ސިޔާސަތެއްކަމަށް ޝާހިދު ވިދާޅުވިއެވެ.
މަރުހޫމް ފަތުހުﷲ ޖަމީލަށް ފޮރިން މިނިސްޓްރީގެ އިމާރާތް ޚާއްސަ ކުރުމަކީ އެމަނިކުފާނުގެ ޚިދުމަތުގެ އަގު ވަޒަންކޮށް، އެމަނިކުފާނުގެ ހަނދާން ތާއަބަދަށް ފެންނަން ހުންނާނޭހެން ބެހެއްޓުންކަމަށް ޝާހިދު ވިދާޅުވިއެވެ. އަދި މިއީ ރައީސް ޞާލިހު ވެރިކަމައި ހަވާލުވެ ޚިދުމަތްތެރިންގެ އަގުވަޒަން ކުރުމަށް ދެއްވާފައިވާ ޚާއްސަ އިސްކަމުގެ ތެރެއިން ކުރެވިގެންދިޔަ މުހިންމު މަސައްކަތެއް ކަމަށެވެ.
މިއިމާރާތަކީ ފަތުހުﷲ ޖަމީލުގެ އަމިއްލަ ކުރެހުމެއްގެ މައްޗަށް ފަރުމާކޮށްގެން 3 ރިޔަލެއް އެކުލެވޭ ދިވެހިންގެ މިނިވަންކަމާއި ސިޔާސަދަތު ދައްކުވައިދޭ ވަރަށް ފުރިހަމަ އިމާރާތަކެއްކަމަށް މިނިސްޓަރ ޝާހިދު ވިދާޅުވިއެވެ. އަދި އިމާރާތުން ރަމްޒުކޮށްދެނީ ރާއްޖެއަކީ ޚާރިޖީ ދާއިރާގައި ކިތަންމެ ގަދަ ކަނޑެއްގައި ދަތުރުކުރެވޭނެ ހިކުމަތާއި، ފެންވަރުހުރި ޤައުމެއްކަމުގައެވެ.
ރައީސް ޞާލިހު ވެރިކަމާއި ހަވާލުވިއިރު ރާއްޖެއަކީ ދުނިޔެއާިއި ބީރައްޓެހި، އެކަހެރި ވެފައިވާ ޤައުމަކަށް ވީނަމަވެސް މިއަދު ދުނިޔެއިން ރާއްޖެ ބަލައި ގެންފައިވާކަމަށް މިނިސްޓަރ ވިދާޅުވިއެވެ. ދުނިޔޭގެ އެތައް ޤައުމަކުން ވޯޓު ދީގެން ރާއްޖެއަށް އދ.މަތީ މަޤާމެއްގެ ޝަރަފް ލިބުމަކީ ރާއްޖޭގެ ޚާރިޖީ ސިޔާސަތާއި، ރައީސް ޞާލިހުގެ ހިކުމަތްތެރި ވިސްނުން ދުނިޔެ ބަލައި ގެންފައިވާކަމުގެ ހެއްކެތް ކަމުގައި މިނިސްޓަރ ޝާހިދު ވިދާޅުވިއެވެ.
މަރުހޫމް ފަތުހުﷲ ޖަމީލުގެ އިމާރާތުގައި ކުރީގެ ވަޒީރުކަން ކުރައްވައި ދުނިޔެ ދޫކުރައްވާފައިވާ ބައެއް ބޭފުޅުންގެ ނަންފުޅުތަކުން ބައެއް މާދަންކަތަށް ނަން ދެއްވާފައިވެއެވެ. އެގޮތުން ހަސަން ފަރީދު މާލަމަކާއި، އަލް އަމީރު މުހައްމަދު އަމީންއާއި، އިބްރާހިމް ފާމުދޭރި ކިލޭގެ ފާނާއި، އޮނަރަބަލް އަހުމަދު ޒަކީ އިތުރުން ޑރ.އަބްދުއް ސަމަދު އަބްދުﷲ ގެ ނަމުން ބައެއް މާލަންތަކަށް ނަން ދެއްވާފައިވެއެވެ.
