އެމެރިކާ އާއި އިސްރާއީލުން ގުޅިގެން ދިން ޙަމަލާއެއްގައި އީރާނުގެ ކުރީގެ ސުޕްރީމް ލީޑަރު އާޔަތުﷲ ޢަލީ ޚާމަނާއީ އަވަހާރަކޮށްލުމާ ގުޅިގެން، އޭނާގެ ދަރިކަލުން މުޖްތަބާ ޚާމަނާއީ އީރާނުގެ އާ ސުޕްރީމް ލީޑަރުގެ މަޤާމަށް ޢައްޔަންކޮށްފިއެވެ. މިއީ މެދުއިރުމަތީގައި ހިނގަމުންދާ ހަނގުރާމައިގެ ތެރޭގައި އީރާނުން ދޫނުދީ ހަރުކަށި ސިޔާސަތުތަކުގައި ދެމިއޮންނާނެކަން އަންގައިދޭ ނިންމުމެކެވެ.
އެމެރިކާ އަދި އިސްރާއީލުން ގުޅިގެން ދިން ޙަމަލާތަކެއްގައި އީރާނުގެ ސުޕްރީމް ލީޑަރު އާޔަތުﷲ ޢަލީ ޚާމަނާއީ އަވަހާރަކޮށްލިތާ ހަފްތާއެއްހާ ދުވަސް ފަހުން، އީރާނުގެ އާ ސުޕްރީމް ލީޑަރަކަށް އޭނާގެ ދަރިކަލުން މުޖްތަބާ ޚާމަނާއީ ހަމަޖައްސާފައި ވާއިރު، މި ޙަމަލާތަކުގެ ސަބަބުން މުޅި ސަރަޙައްދު ވަނީ ބޮޑު ހަނގުރާމައެއްގެ ތެރެއަށް ވެއްޓިފައެވެ.
އުމުރުން 56 އަހަރުގެ މުޖްތަބާ ޚާމަނާއީ، ބައްޕަގެ ނައިބެއްގެ ގޮތުގައި ދީނީ ޢިލްމުވެރިން އާދީއްތަ ދުވަހު ޢައްޔަންކުރިއިރު، އޭނާއާ ޙަވާލުވެފައިވަނީ އީރާނުގެ އިސްލާމީ ޖުމްހޫރިއްޔާގެ 47 އަހަރުގެ ތާރީޚުގައި ކުރިމަތިވާ އެންމެ ބޮޑު ކާރިސާއިން ޤައުމު ސަލާމަތްކުރުމުގެ ޒިންމާއެވެ.
އީރާނުގެ އިސް ވެރިންނާއި، ބާރުގަދަ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އަދި އަސްކަރިއްޔާއިން ވަނީ ވަރަށް އަވަހަށް އާ ލީޑަރަށް ބައިޢަތު ހިފައިފައެވެ.
އެމެރިކާއާއި އިސްރާއީލުގެ ޙަމަލާތައް ފެށުނުފަހުން އީރާނުގެ ސަލާމަތީ ކަންކަން ބެލެހެއްޓުމާ ޙަވާލުވެހުންނެވި ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ ޢަލީ ލާރިޖާނީ ވަނީ އާ ސުޕްރީމް ލީޑަރާއެކު އެއްބައިވަންތަވުމަށް ގޮވާލައްވާފައެވެ.
ޕާލަމެންޓްގެ ރައީސް މުޙައްމަދު ބާޣިރް ޤާލިބާފް މި ނިންމުމަށް މަރުޙަބާ ވިދާޅުވެ، އާ ސުޕްރީމް ލީޑަރަށް ތަބާވުމަކީ "ދީނީ އަދި ޤައުމީ ވާޖިބެއް" ކަމަށް ވިދާޅުވިއެވެ.
މުޖްތަބާ ޚާމަނާއީ މީގެ ކުރިން އިންތިޚާބެއްގައި ވާދަކުރައްވާފައި ނުވި ނަމަވެސް، އޭނާއަކީ އެތައް އަހަރެއް ވަންދެން ސުޕްރީމް ލީޑަރުގެ އެންމެ އަރިސް ބޭފުޅުންގެ ތެރޭގައި ނުފޫޒުގަދަ އަދި އައި.އާރު.ޖީ.ސީ އާ ގާތް ގުޅުމެއް ބާއްވަމުން އައި ބޭފުޅެކެވެ.
ފަހަކަށް އައިސް ބައްޕަގެ މަޤާމަށް ވަޑައިގަންނަވާނެ ކަމަށް އެންމެ ބޮޑަށް ބެލެވުނު އެއް ބޭފުޅަކީ އޭނާއެވެ. އޭނާ ޢައްޔަންކުރުމުން ދައްކުވައިދެނީ އީރާނުގެ ހަރުކަށި ފިކުރުގެ ފަރާތްތަކުގެ ބާރު އަދިވެސް އޮތްކަމާއި، ހަނގުރާމައިގެ ދެވަނަ ހަފްތާއަކަށް އެޅިފައިވާއިރު، ކުރު މުއްދަތެއްގެ ތެރޭގައި އެއްބަސްވުމަކަށް ނުވަތަ މަޝްވަރާއަކަށް ދިއުމުގެ ޝައުޤުވެރިކަން ސަރުކާރުގައި ކުޑަކަމެވެ.
އަލްޖަޒީރާގެ ޢަލީ ހާޝިމް ސިފަކުރެއްވި ގޮތުގައި ޚާމަނާއީ އަކީ އޭނާގެ "ބައްޕަގެ ގޭޓްކީޕަރ" އެވެ.
"އެމެރިކާއާއި އިސްރާއީލާ މެދު އޭނާ ގެންގުޅުއްވާނީ ބައްޕަގެ ސިޔާސަތެވެ. އެހެންކަމުން އަޅުގަނޑުމެން އުންމީދުކުރަނީ ކުރިމަތިލުމަށް ލޯބިކުރާ ލީޑަރަކަށެވެ. މެދުމިނުގެ ސިޔާސަތަކަށް އުންމީދެއް ނުކުރަން،" އޭނާ ވިދާޅުވިއެވެ.
"އެހެންނަމަވެސް، މި ހަނގުރާމަ ނިމުމަކަށް އައިސް، އޭނާ ދުނިޔޭގައި ހުރެ ޤައުމު ހިންގުމުގެ ޤާބިލުކަން ހުރެއްޖެނަމަ، އީރާނަށް އާ މަގުތަކެއް ހޯދުމުގެ ބޮޑު ފުރުޞަތެއް އޮންނާނެ،" ހާޝިމް ވިދާޅުވިއެވެ.
އެމެރިކަން ޔުނިވަރސިޓީ އޮފް ބެއިރޫތުގެ ޕަބްލިކް ޕޮލިސީ ފެލޯ ރާމީ ޚޫރީ ވިދާޅުވީ ޚާމަނާއީ ޢައްޔަންކުރުމުން ދައްކުވައިދެނީ "މެދުކެނޑުމެއްނެތި ކުރިއަށްދިއުން" ކަމަށާއި، ހަނގުރާމަ ނިމުމަކަށް ގެނައުމަށް އާ ސުޕްރީމް ލީޑަރު މަޝްވަރާއަށް ބާރުއަޅުއްވާނެތޯ ބަލަންޖެހޭ ކަމަށެވެ.
ކޮންމެ ގޮތެއްވިޔަސް، އޭނާ ޢައްޔަންކުރުމަކީ "ގޮންޖެހުމުގެ ޢަމަލެއް" ކަމަށް އޭނާ ވިދާޅުވިއެވެ. އީރާނުން "އެމެރިކާއާއި އިސްރާއީލަށް އަންގަނީ، 'ކަލޭމެން ބޭނުންވީ އަހަރެމެންގެ ނިޒާމު ނައްތާލަންތޯ؟ އެހެންވިއްޔާ… މިއީ އަވަހާރަކޮށްލި އޭނާގެ ބައްޕައަށްވުރެ ހަރުކަށި މީހެކޭ’،" އޭނާ ވިދާޅުވިއެވެ.
ސުޕްރީމް ލީޑަރު ހޮވުމާ ޙަވާލުވެފައިވާ އެސެމްބްލީ އޮފް އެކްސްޕާޓްސްގެ މެމްބަރެއް ކަމަށްވާ ހައިދަރީ އަލެކާސިރު ވިދާޅުވީ، ކެންޑިޑޭޓް ހޮވާފައިވަނީ އީރާނުގެ އެންމެ އިސް ލީޑަރަކީ ދުޝްމަނުން ތަޢުރީފުކުރުމުގެ ބަދަލުގައި "ދުޝްމަނުން ރުޅިއަންނަ" މީހަކަށް ވާންޖެހޭނެ ކަމަށް ކުރީގެ ޚާމަނާއީ ދެއްވާފައިވާ ލަފާގެ މަތިން ކަމަށެވެ.
"ބޮޑު ޝައިޠާނާ [އެމެރިކާ] ވެސް ވަނީ އޭނާގެ ނަން ފާހަގަކޮށްފައި،" އިސް ދީނީ ޢިލްމުވެރިޔާ ވިދާޅުވީ، މުޖްތަބާ ޚާމަނާއީ އީރާނުގެ ލީޑަރުކަމަށް ގެނައުމަކީ އޭނާއަށް "ޤަބޫލުކުރެވޭނެ" ކަމެއް ނޫންކަމަށް އެމެރިކާގެ ރައީސް ޑޮނަލްޑް ޓްރަމްޕް ކުރިން ވިދާޅުވެފައިވާ ވާހަކައަށް އިޝާރާތްކުރައްވަމުންނެވެ.
އިސްރާއީލުގެ އަސްކަރިއްޔާއިން މީގެ ކުރިން ވަނީ އާ ލީޑަރަކަށް "ތިބާއަށް ޙަމަލާދޭން އަހަރެމެން ފަސްނުޖެހޭނަން" ކަމަށް އިންޒާރުދީފައެވެ.
އާދީއްތަ ދުވަހު ޓްރަމްޕް އަނެއްކާވެސް ވަނީ އީރާނުގެ އާ ސުޕްރީމް ލީޑަރަކަށް ހޮވާ މީހަކަށް ނުފޫޒު ފޯރުވާނެ ކަމަށް ވަޢުދުވެވަޑައިގެން، ވޮޝިންޓަންގެ ރުހުމަކާ ނުލައި އެ މަޤާމަށް ހޮވާ ކޮންމެ މީހަކުވެސް "ގިނަ ދުވަހަކު ނުހުންނާނެ" ކަމަށް ވިދާޅުވެފައެވެ.
ޚާމަނާއީގެ ދަރިކަލުން މި މަޤާމަށް ހޮވުމަކީ ޓްރަމްޕް ވަރަށް ބޮޑަށް ރުޅިގަދަވާނެ ކަމެއްކަން ޔަޤީނެވެ.
ކޮމެންޓު ފޮނުވާ