ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހއ. ކަނޑާލިފިނޮޅަކީ އެ އަތޮޅު ވަށަފަރުގެ ބައެއްގެ ގޮތުގައި އަދި ރ. އުނގުލަކީ އެ އަތޮޅު އުނގޫފާރުގެ ބައެއްގެ ގޮތުގައި ހަމަޖައްސަވައި، އެކަން ރަސްމީކޮށް އިޢުލާނުކުރައްވައިފިއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ބޭނުންކުރައްވައިގެން ނިންމެވި މި ނިންމެވުމަކީ، އެ ދެ ރަށުގެ ރައްޔިތުންނާއި ކައުންސިލްތަކުގެ އެދުމާއި އުންމީދުތަކާ ގުޅިފައިވާ މުހިންމު ބަދަލެކެވެ. ރައީސް އޮފީހުން ހާމަކުރި ގޮތުގައި ކަނޑާލިފިނޮޅު ވަށަފަރުގެ ބައެއްގެ ގޮތުގައި ހަމަޖެއްސެވީ ސީދާ އެ ރަށު ރައްޔިތުންގެ އެދުމުގެ މަތިންނެވެ. ހަމައެއާއެކު، އުނގޫފާރުގެ އިޚްތިޞާޞްގެ ތެރެއަށް އުނގުލު އިތުރުކޮށްދެއްވީ، އެ ރަށުގެ ރައްޔިތުންނަށް އިޤްތިޞާދީ ފުރުޞަތުތައް ފަހިކޮށްދެއްވުމުގެ ވަޢުދު ފުއްދެވުމުގެ ގޮތުންނެވެ. އުނގޫފާރަކީ ސަރަޙައްދީ ތަރައްޤީގައި މުހިންމު ދައުރެއް އަދާކުރާ، އަދި ގިނަ ރަށްތަކެއްގެ ރައްޔިތުން ޚިދުމަތް ހޯދާ މަރުކަޒީ ރަށެއްކަން ފާހަގަކުރައްވައި، އެ ރަށުގެ ތަރައްޤީއަށްޓަކައި އިޤްތިޞާދީ މަސައްކަތްކުރާނެ ފަޅުރަށެއް ހޯއްދަވައިދެއްވާނެކަމަށް ރައީސް މީގެ ކުރިން ވަނީ ވިދާޅުވެފައެވެ.
މި ބަދަލުތަކާއެކު، ދިވެހިރާއްޖޭގައި މީހުން ދިރިއުޅޭ ރަށްތައް ކަނޑައެޅުމުގެ ޤަރާރުގެ ޖަދުވަލަށް އިޞްލާޙު ގެނެސް، އަދާހަމަކޮށްފައިވާ ލިސްޓު މިހާރު ވަނީ ދިވެހި ސަރުކާރުގެ ގެޒެޓުގައި ޝާއިއުކޮށްފައެވެ. މިއީ ރަށްރަށުގެ އިޚްތިޞާޞް ކަނޑައެޅުމާއި، ވަސީލަތްތައް ބޭނުންކުރުމުގެ ބާރު ކައުންސިލްތަކަށް ދިނުމުގެ ސިޔާސަތުގެ ދަށުން އެޅުއްވި މުހިންމު ފިޔަވަޅެއްކަމަށް ބެލެވެއެވެ.
ކޮމެންޓު ފޮނުވާ