ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕެއިން ފެށުމަށް އައްޑޫގައި ބޭއްވި ޖަލްސާގައި ވާހަކަދައްކަވަމުން، ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވީ އައްޑޫގެ އުމްރާނީ ތަރައްގީގެ ބޮޑު ބައެއް މިދިޔަ ސަރުކާރުން ނިންމާފައިވާ ކަމަށާއި، މިހާރު އެ ސިޓީއަށް ބޭނުންވަނީ އިގުތިސާދީ ދިރުމެއް ކަމަށެވެ.
އެމްޑީޕީގެ ޓިކެޓުގައި އައްޑޫ ސިޓީ ކައުންސިލަށް ވާދަކުރާ ކެންޑިޑޭޓުންގެ ކެމްޕެއިން ރަސްމީކޮށް ފެށުމަށް ބޭއްވި މި ހަފުލާގައި ނާޒިލް ފާހަގަކުރެއްވި ގޮތުގައި، އެމްޑީޕީގެ ވެރިކަމުގައި އައްޑޫގެ ތަރައްގީއަށް ކޮށްދޭން ޖެހޭ މުހިންމު އުމްރާނީ މަސައްކަތްތައް ވަނީ ކޮށްދީފަ އެވެ. އެހެންކަމުން ދެން އޮތް މަރުހަލާއަކީ ސިޓީގެ ތެރޭގައި ފައިސާ ދައުރުވާނެ ގޮތްތައް ހޯދައި، ރައްޔިތުންގެ ޖީބަށް ފައިސާ ވަންނާނެ ވަރުގަދަ އިގުތިސާދެއް އުފެއްދުން ކަމަށް އޭނާ ވިދާޅުވި އެވެ.
މިހާރުގެ ސަރުކާރަށް ފާޑުވިދާޅުވަމުން ނާޒިލް ވިދާޅުވީ، އެމްޑީޕީގެ ސަރުކާރު ނިމުނުއިރު ފަށާފައިވާ މަޝްރޫއުތައް ހުރީ ހުއްޓިފައި ކަމަށާއި، އެތަންތަނުގައި ޖަހާފައިވާ "ކަޑަތައް" ފިޔަވައި އިތުރު ކަމެއް ވެފައި ނެތް ކަމަށެވެ. އަދި މި ސަރުކާރުން ރައްޔިތުންނަށް މާލީ މަންފާއެއް ހޯދައިދެވޭނެ ކަމުގެ އުއްމީދެއް ނެތް ކަމަށް ވިދާޅުވެ، އޭނާ ވަނީ މި ސަރުކާރުން ރައްޔިތުންގެ "ޖީބަށް އެއްޗެއް ލިބޭނެ ގޮތެއް" ހަމަޖައްސައިދޭ މަންޒަރު ފެނިވަޑައިނުގަންނަވާ ކަމަށް ވިދާޅުވެފަ އެވެ.
އައްޑޫއަށް ތަރައްގީއެއް އައިސްފައިވާނަމަ އެކަން ވެފައިވަނީ އެމްޑީޕީގެ ވެރިކަންތަކުގައިކަން ފާހަގަކުރައްވައި ނާޒިލް ވިދާޅުވީ، 2018 އިން 2023 އަށް އޮތް އެމްޑީޕީގެ ސަރުކާރަށް މަސައްކަތް ކުރަން ލިބުނު ގާތްގަނޑަކަށް ތިން އަހަރުގެ ތެރޭގައި ވެސް ގިނަ ކަންތައްތަކެއް ހާސިލުކޮށްދީފައިވާ ކަމަށެވެ. އެހެންކަމުން ކުރިއަށް އޮތް އިންތިހާބުގައި ކައުންސިލް ގޮނޑިތައް އެމްޑީޕީއަށް ކާމިޔާބުކޮށްދިނުމަކީ މުހިންމު ކަމެއް ކަމުގައި އޭނާ ވިދާޅުވި އެވެ. މި ޖަލްސާގައި އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު ވެސް ބައިވެރިވެވަޑައިގެން، އެ ޕާޓީއަކީ އަބަދުވެސް ރައްޔިތުންނާ ގާތުން މަސައްކަތްކުރާ ޕާޓީއެއް ކަމަށް ވިދާޅުވި އެވެ.
ކޮމެންޓު ފޮނުވާ