ސޮމާލިއާގެ ދައުލަތާ ދެކޮޅަށް ހަނގުރާމަކޮށް، އެ ގައުމުން ވަކިވެގަނެގެން އުޅޭ "ސޮމާލީލޭންޑް" އަކީ މިނިވަން މުސްތަގިއްލު ގައުމެއްގެ ގޮތުގައި ބަލައިގަތުމަށް އިޒްރޭލުން ނިންމި ނިންމުމަކީ ބައިނަލްއަގުވާމީ ގާނޫނުތަކާ ހިލާފު އަމަލެއް ކަމަށް ބުނެ، ދިވެހި ސަރުކާރުން އެކަން ހަރުކަށި އިބާރާތުން ކުށްވެރިކޮށްފިއެވެ. މިކަން ހާމަކުރެއްވީ ސައުދީ އަރަބިއްޔާގެ ޖިއްދާގައި ކުރިއަށްދިޔަ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ހާރިޖީ ވަޒީރުންގެ 22 ވަނަ އެކްސްޓްރާއޯޑިނަރީ ބައްދަލުވުމުގައި ވާހަކަފުޅު ދައްކަވަމުން ދިވެހިރާއްޖޭގެ ފޮރިން މިނިސްޓަރު ޑރ. އަބްދުالله ހަލީލެވެ.
އިޒްރޭލުގެ މި ނިންމުމާ ގުޅިގެން މެމްބަރު ގައުމުތަކުގެ މެދުގައި މަޝްވަރާކުރުމަށް ބޭއްވުނު މި ބައްދަލުވުމުގައި މިނިސްޓަރު ހަލީލް ވިދާޅުވީ، ސޮމާލިއާގެ ބައެއްގެ ގޮތުގައި އޮތް ސަރަހައްދެއް ވަކި ދައުލަތެއްގެ ގޮތުގައި އިޒްރޭލުން ބަލައިގަތުމަކީ ސޮމާލިއާގެ މިނިވަންކަމާއި ސިޔާދަތަށް ސީދާ ގޮތުން އަރައިގަތުން ކަމަށެވެ. އަދި މިއީ އދ. ގެ ޗާޓަރާއި ބައިނަލްއަގުވާމީ މުއާހަދާތަކާ ކަނޑައެޅިގެން ފުށުއަރާ، ޣައިރު ގާނޫނީ ނިންމުމެއްކަން ފާހަގަކުރައްވައި، ދިވެހި ސަރުކާރުން އެކަމާ މެދު ނުހަނު ކަންބޮޑުވާކަން މިނިސްޓަރު ހާމަކުރެއްވިއެވެ.
މީގެއިތުރުން، މެދުއިރުމަތީގެ ސަރަހައްދީ މަސްރަހަށް ރިއާޔަތްކުރައްވައި މިނިސްޓަރު ވިދާޅުވީ، ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ލާއިންސާނީ ޖަރީމާތައް އިތުރުވެފައިވާ ދަނޑިވަޅެއްގައި، ބައިނަލްއަގުވާމީ ގާނޫނުތަކަށް އިޒްރޭލުން އިހުތިރާމް ނުކުރުމަކީ މުޅި ދުނިޔޭގެ ހަމަޖެހުމަށް އޮތް ނުރައްކަލެއް ކަމަށެވެ. އަދި ބައިނަލްއަގުވާމީ ގާނޫނީ ނިޒާމު ބަލިކަށިވެގެން ދިއުމަކީ، ގާނޫނީ ހަމަތަކަށް ބަރޯސާވާ ރާއްޖެ ފަދަ ކުދި ޖަޒީރާ ގައުމުތަކުގެ ސަލާމަތާއި ރައްކާތެރިކަމަށް އޮތް ބޮޑު ގޮންޖެހުމެއްކަމަށް ވެސް މިނިސްޓަރު ފާހަގަކުރެއްވިއެވެ.
ކޮމެންޓު ފޮނުވާ