ރ. އުނގޫފާރު ކުނިގޮނޑުތެރޭގައި މީހެއްގެ ކަނދުރާގައި ޖަހައި ހަމަލާދިން މައްސަލައެއްގައި އުނގޫފާރު ކޯޓުން 14،400 ރުފިޔާގެ ބޮޑު ޖޫރިމަނާއެއް ކޮށްފިއެވެ.
މި ހަމަލާ ދީފައިވަނީ މިދިޔަ އަހަރުގެ ނޮވެންބަރު 11 ވަނަ ދުވަހު ހެނދުނު، ކުނިގޮނޑުތެރޭގައި ދެ މީހެއްގެ މެދުގައި ދެބަސްވުމެއް ހިނގި ވަގުތެއްގައެވެ. ހަމަލާ ދިނީ އެ އަތޮޅު ދުވާފަރު މީހަކަށެވެ. ދައުލަތުން އުނގޫފާރުގެ މީހާގެ މައްޗަށް އަނިޔާ ދިނުމުގެ ދައުވާ އުފުލީ މެޑިކަލް ރިކޯޑްތަކުން މިކަން ސާބިތުވި ކަމަށްވުމުންނެވެ.
މިދިޔަ މެއި މަހު ކޯޓަށް ހުށަހެޅި މި މައްސަލަ މިދިޔަ ހަފުތާގައި ނިމުނުއިރު، ދައުވާ ލިބުނު މީހާ ވަނީ ކުށަށް އިންކާރުކޮށްފައެވެ. ނަމަވެސް ދައުލަތުން ހުށަހެޅި ހެކިތަކުން ކުށް ސާބިތުވިއެވެ. ކުށް ސާބިތުވި ފަހުން ދައުވާ ލިބުނު މީހާ އާއި ހަމަލާ ލިބުނު ފަރާތުން ވެސް އެދުނީ ލުއި އަދަބެއް ދިނުމަށެވެ. މި މައްސަލައިގައި މިދިޔަ އަންގާރަ ދުވަހު އުނގޫފާރު ކޯޓުގެ އިސް މެޖިސްޓްރޭޓް ރިމާހް މުހައްމަދު ހުކުމްކުރެއްވީ ތިން މަސް ދުވަހުގެ ތެރޭގައި 14،400 ރުފިޔާގެ ޖޫރިމަނާ ދައްކަން ޖެހޭ ކަމަށެވެ.
ކޮމެންޓު ފޮނުވާ