މި ޚިދުމަތް ފެށިގެން ދިޔައީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މުލީ ރައްޔިތުންނާ ބައްދަލުކުރެއްވުމަށް ބޭއްވި ބައްދަލުވުމުގެ ތެރެއިންނެވެ. މިއީ ރައީސް މުޢިއްޒުގެ ސަރުކާރުން ރައްޔިތުންނަށް ޚިދުމަތްތައް ގާތުން ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން އެޅުނު އިތުރު ފިޔަވަޅެކެވެ.
ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމަކީ ރައީސް މުޢިއްޒުގެ ސަރުކާރުގެ މުހިންމު އަމާޒެއްކަން ފާހަގަކުރެވެއެވެ. މި ސިޔާސަތުގެ ދަށުން މުޅި ރާއްޖެއަށް މި ޚިދުމަތް ފުޅާކުރުމުގެ މަސައްކަތް ވަނީ މިދިޔަ ނޮވެމްބަރު 16 ވަނަ ދުވަހު ރަސްމީކޮށް ފަށާފައެވެ.
މި ޚިދުމަތް މުލީގައި ފެށުމާއެކު، އެރަށުގެ ރައްޔިތުންނާއި އަދި ކައިރި ރަށްރަށުގެ ރައްޔިތުންނަށްވެސް މާލެއަށް ދަތުރުކުރުމަކާ ނުލައި ޕާސްޕޯޓުގެ ޚިދުމަތް ލިބިގެންދާނެއެވެ. މިއީ ރައްޔިތުންގެ ވަގުތާއި ޚަރަދު ސަލާމަތްވެގެންދާނެ ކަމެއްކަމަށް ސަރުކާރުން ފާހަގަކުރެއެވެ.
ސަރުކާރުގެ މި މަޝްރޫޢުގެ ދަށުން ކުރިއަށް އޮތް ތަނުގައި އިތުރު ރަށްރަށުގައިވެސް މި ޚިދުމަތް ފެށިގެންދާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މަޢުލޫމާތު ދެއެވެ.
ކޮމެންޓު ފޮނުވާ