މ .އަތޮޅު ރަތްމަންދޫ ރައްޔިތުން އެހެން ރަށަކަށް ބަދަލުކުރުމަށް ނިންމުމާއި ގުޅިގެން، އެ ރަށުގެ ރައްޔިތުންނަށް މުލީގައި ގޯތި ދިނުމަށް މުލީ ކައުންސިލުން ނިންމައިފިއެވެ.
ރަތްމަންދޫ ރައްޔިތުން އެހެން ރަށަކަށް ބަދަލުކޮށްދިނުމަށް އެދި އެ ރަށުގެ ގިނަ ބަޔަކު ރައީސުލްޖުމްހޫރިއްޔާއަށް ޕެޓިޝަނެއް ހުށަހެޅުމާ ގުޅިގެން، ސަރުކާރުންވެސް ވަނީ ރަތްމަންދޫ ރައްޔިތުން އެހެން ރަށަކަށް ބަދަލުކުރުމަށް ނިންމައި، އެ ނިންމުން އާންމުކޮށްފައެވެ. ނަމަވެސް ބަދަލުކުރާނެ ވަކި ރަށެއް ސަރުކާރުން އަދި ކަނޑައަޅައި އިޢުލާންކޮށްފައެއް ނުވެއެވެ.
މިދިޔަ ހަފްތާގެ ތެރޭގައި މުލީ ކައުންސިލުން ނިންމި މި ނިންމުން، މިހާރުވަނީ ރަސްމީކޮށް ރަތްމަންދޫ ކައުންސިލަށް އަންގައިފައެވެ.
މުލީ ކައުންސިލްގެ ރައީސް ޝަމްއޫނު ރަމީޒު ބައެއް މީޑިއާތަކަށް މައުލޫމާތު ދެމުން ވިދާޅުވީ، މުލީ ރައްޔިތުން ތިބީ ރަތްމަންދޫ ރައްޔިތުންނަށް ހޫނު މަރުޙަބާއެއް ކިޔުމަށް ތައްޔާރަށް ކަމަށެވެ. އަދި ރަތްމަންދޫ ރައްޔިތުންގެ ތެރެއިން މުލީއަށް ބަދަލުވުމަށް ބޭނުންވާ ފަރާތްތަކަށް ގޯތި ދިނުމުގެ އިތުރުން، ގޯތީގައި ގެދޮރު އިމާރާތްކުރުމަށް ބޭނުންވާ އެހީތެރިކަން ފޯރުކޮށްދިނުމަށް ދެ ރަށުގެ ކައުންސިލާއި ސަރުކާރުގެ ކަމާބެހޭ ފަރާތްތަކާ ގުޅިގެން މަސައްކަތް ކުރުމަށްވެސް ކައުންސިލުން ތައްޔާރަށް ތިބި ކަމަށް ޝަމްއޫން ވިދާޅުވިއެވެ.
މުލީއަކީ މެދުރާއްޖޭގައި ތަރައްޤީގެ ހަބަކަށް ވަމުންދާ ރަށެކެވެ. ރަށުގެ އެއާޕޯޓް ހުޅުވައި، ހޮސްޕިޓަލް ތަރައްޤީކުރުމުގެ ބޮޑު މަޝްރޫޢެއް ފެށިފައިވާއިރު، ސްކޫލާއި ބޭންކިންގ ޚިދުމަތް ފަދަ އަސާސީ ޚިދުމަތްތައްވެސް ރަށުގައި ޤާއިމުވެފައިވެއެވެ. ރަތްމަންދޫއާއި މުލީއަކީ އެއް އަތޮޅުގައި އޮތް، ގާތްކައިރީގައި އޮތް ދެ ރަށް ކަމުން، ރަތްމަންދޫ ރައްޔިތުންނަށް މުލީއަށް ބަދަލުވުމަކީ ފަސޭހަ ކަމަކަށް ވާނެ ކަމަށް ޤަބޫލުކުރެވެއެވެ.
ރަތްމަންދޫއަކީ މިހާރުވެސް މުލީއާއެކު އެއް އިދާރީ ދާއިރާއެއްގައި ހިމެނޭ، ގާތްގަނޑަކަށް 240 މީހުން ދިރިއުޅޭ ރަށެކެވެ.
ކޮމެންޓު ފޮނުވާ