ދުބާއީގެ ރިއަލް އެސްޓޭޓް ކުންފުނި، ސަމަނާ ޑެވެލޮޕާސް އިން ދުނިޔޭގެ ނަން މަޝްހޫރު ލަގްޒަރީ ބްރޭންޑް، އެލީ ސާބްއާ ގުޅިގެން ހދ. ހަނިމާދޫ ކައިރީގައި 598 މިލިޔަން އެމެރިކާ ޑޮލަރުގެ އަގުބޮޑު ރިސޯޓެއް ތަރައްގީ ކުރުމަށް ނިންމާއިފިއެވެ.
ދުބާއީގެ މަދީނަތު ސަރަހައްދުގައި ބޭއްވުނު ހާއްސަ ހަރަކާތެއްގައި އިއުލާން ކުރެވުނު މި ރިސޯޓަކީ 507،651 އަކަފޫޓުގެ ބޮޑު ސަރަހައްދެއްގައި ތަރައްގީ ކުރެވޭ މަޝްރޫއެކެވެ. ހަނިމާދޫ އިންޓަނޭޝަނަލް އެއަރޕޯޓުން 20 މިނެޓުގެ ދުރުމިނުގައި އަދި ހުޅުލެއިން ފުރައިގެން ސީޕްލޭނުން 45 މިނެޓުން ވާސިލުވެވޭ މި ރިސޯޓުގައި 190 ޔުނިޓު ހިމެނޭނެއެވެ. މީގެ ތެރޭގައި ބީޗްފްރަންޓް ވިލާތަކާއި، ވޯޓަރ ބަންގަލޯ އަދި ޕޫލްސައިޑް އެޕާޓްމަންޓްތައް ހިމެނެއެވެ. މި ހުރިހާ ޔުނިޓެއްގެ ޒަމާނީ ޑިޒައިން ތައްޔާރުކުރަނީ އެލީ ސާބް ކުންފުނިންނެވެ.
މި ރިސޯޓުގައި މެހުމާނުންނަށް ޚިދުމަތް ދިނުމަށް ޒަމާނީ ވަސީލަތްތަކެއް ޤާއިމު ކުރެވޭނެއެވެ. އޭގެ ތެރޭގައި ސްޕާއަކާއި ވެލްނަސް ސެންޓަރެއް، އަރަބި އަދި ޖަޕާނީ ކަނޑުގެ މަހުން ތައްޔާރު ކުރެވޭ ކާނާއަށް ޚާއްސަ ރެސްޓޯރަންޓްތަކެއް، ޑައިވިންގ ސެންޓަރަކާއި މޫދު ކުޅިވަރުގެ އިންތިޒާމުތައް އަދި ގިނަ އަދަދެއްގެ ޕޫލްތަކާއި ފިޓްނަސް ސެންޓަރެއް ހިމެނެއެވެ.
ތިމާވެށި ރައްކާތެރިކުރުމަށް ޚާއްސަ އިސްކަމެއް ދެވޭ މި މަޝްރޫއުގައި މުރަކަ އާލާކުރުމުގެ ޕްރޮގްރާމްތަކެއް ވެސް ހިންގުމަށް ވަނީ ރޭވިފައެވެ. 2029 ވަނަ އަހަރު އޮޕަރޭޝަނަށް ނެރުމަށް ހަމަޖެހިފައިވާ މި ރިސޯޓަކީ ދެ ކުންފުންޏަށް ވެސް އިތުރު ކުރިއެރުންތަކެއް ހޯދައިދޭނެ މަޝްރޫއެއް ކަމުގައި ދެ ކުންފުނީގެ ވެރިން ވިދާޅުވެފައިވެއެވެ. ރާއްޖެފަދަ ލަގްޒަރީ އަދި މަތީ ފަންތީގެ ފަތުރުވެރިކަމެއް އޮންނަ ޤައުމެއްގައި މަސައްކަތް ފެށުމުން ދެ ކުންފުންޏަށް ވެސް އިތުރު ފުރުސަތުތަކެއް ހުޅުވިގެންދާނެ ކަމަށް އެ ފަރާތްތަކުން ޔަގީންކުރެއެވެ.
މިހާރު ވެސް ހަނިމާދޫ އިންޓަނޭޝަނަލް އެއަރޕޯޓް ތަރައްގީކޮށް ބޮޑުކުރުމުގެ މަޝްރޫއެއް ކުރިއަށްދާއިރު، މި ސަރަހައްދަކީ ރާއްޖޭގައި ފަތުރުވެރިކަން އެންމެ މަދުން ތަރައްގީވެފައިވާ އެއް ސަރަހައްދު ކަން ފާހަގަކުރެވެއެވެ.
