ކުރީގެ ނައިބު ރައީސް އަހުމަދު އަދީބު ދައުލަތައް ދައްކަންޖެހޭ އެއް މިލިއަން ރުފިޔާ އެއް މަސްދުވަހުގެ ތެރޭގައި ދެއްކުމަށް އިއްޔެ ސިވިލް ކޯޓުން ހުކުމް ކޮށްފިއެވެ.
މި ފައިސާއަކީ އެމްއެމްޕީއާރުސީގެ ހިޔާނާތުގެ މައްސަލައިގައި އަދީބުގެ މައްޗަށް އިއްވި 20 އަހަރުގެ ޖަލު ހުކުމާއި ދެ މިލިއަން ރުފިޔާގެ ޖޫރިމަނާގެ ތެރެއިން، 2020 އޮކްޓޫބަރު 5 އިން ފެށިގެން މަސްދުވަހުގެ ތެރޭގައި ދައްކަންޖެހޭ އެއް މިލިއަން ރުފިޔާއެވެ.
މި ފައިސާ މިހާތަނަށް ދައްކާފައި ނުވާތީ، ދައުލަތުން ވަނީ އަލުން މި ފައިސާ ދެއްކުމަށް އަދީބުގެ މައްޗަށް ހުކުމްކޮށްދިނުމަށް އެދި މައްސަލަ ހުށަހަޅާފައެވެ. އަދީބުގެ ފަރާތުން މި މައްސަލައިގައި ބުނެފައިވަނީ އެއްފަހަރާ މި ފައިސާ ދެއްކުމަކީ ދަތިކަމެއް ކަމަށާއި، ފައިސާ ދެއްކުމުގެ ގޮތެއް ހުށަހެޅުމަށް ހަތް ދުވަހުގެ މުއްދަތަކަށް އެދިފައެވެ. ނަމަވެސް ދައުލަތުން މިކަމަށް އިންކާރުކުރުމާ ގުޅިގެން، ޝަރީއަތުގެ އަޑުއެހުމަކާ ނުލައި ހުކުމްކޮށްދިނުމަށް އެދިފައިވެއެވެ.
ސިވިލް ކޯޓުން މި މައްސަލަ ނިންމީ ދައުލަތުން އެދުނު ގޮތަށް، މަސްދުވަހުގެ ތެރޭގައި އެއް މިލިއަން ރުފިޔާ ދެއްކުމަށެވެ. އަދި މި ހުކުމާމެދު ހިތްހަމަނުޖެހޭނަމަ، މަސްދުވަހުގެ ތެރޭގައި ހައިކޯޓުގައި އިސްތިއުނާފުކުރުމުގެ ފުރުސަތު ދީފައިވެއެވެ.
އެމްއެމްޕީއާރުސީގެ ހިޔާނާތުގެ މައްސަލައަކީ ދުނިޔޭގެ ސަމާލުކަން ލިބުނު މައްސަލައެކެވެ. އަލް ޖަޒީރާއިން މި މައްސަލައާ ގުޅޭ ތަފްސީލީ ޑޮކިއުމެންޓްރީއެއް ވެސް ގެނެސްދީފައިވެއެވެ. 2018 ގައި އިބްރާހީމް މުހައްމަދު ޞާލިޙް ވެރިކަމާ ހަވާލުވިއިރު، އަދީބާއި އެމްއެމްޕީއާރުސީގެ ކުރީގެ ވެރިޔާ އަބްދުﷲ ޒިޔަތު ތިބީ ޖަލުގައެވެ. ނަމަވެސް ފަހުން ޞާލިޙް އެ ދެ މީހުން ގޭ ބަންދަށް ބަދަލުކޮށް، އޭގެ ފަހުން މާފު ދެއްވިއެވެ.
