ނިމިގެން މިދާ 2024 ވަނަ އަހަރަކީ މިހާތަނަށް ރެކޯޑުކުރެވުނު އެންމެ ހޫނުގަދަ އަހަރު ކަމަށް ވޯލްޑް ވެދަރ އެޓްރިބިއުޝަން (ޑަބްލިއުޑަބްލިއުއޭ) އާއި ކްލައިމެޓް ސެންޓްރަލްގެ ދިރާސާއަކުން ހާމަކޮށްފިއެވެ.
މި ދިރާސާއިން ދައްކާ ގޮތުގައި މޫސުމަށް އަންނަ ބަދަލުތަކުގެ ސަބަބުން މުޅި ދުނިޔޭގެ ހޫނުމިން އަންނަނީ މަތިވަމުންނެވެ. އަދި އަންނަ އަހަރު ގާތްގަނޑަކަށް 41 ދުވަހު ނުރައްކާތެރި މިންވަރަކަށް ހޫނުމިން އިތުރުވާނެ ކަމަށާއި، މިއީ އިންސާނުންގެ އަމަލުތަކުގެ ސަބަބުން މޫސުމަށް އަންނަ ބަދަލުތަކާ ގުޅިގެން ކުރިމަތިވާ ކަމެއްކަން ވަނީ ފާހަގަކޮށްފައެވެ.
މޫސުމަށް ކުރާ ނޭދެވޭ އަސަރުތައް އެންމެ ބޮޑަށް ކުރަނީ އިކުއޭޓަރާ ކައިރި ގައުމުތަކަށެވެ. ޚާއްސަކޮށް ކުދި ޖަޒީރާ ގައުމުތަކުގެ (ސިޑްސް) ރައްޔިތުންނަށް 130 ދުވަހަށް ވުރެ ގިނަ ދުވަހު އާދަޔާ ޚިލާފު ހޫނުމިނެއް ތަޖުރިބާކުރަން ޖެހޭނެ ކަމަށް ދިރާސާއިން ދައްކައެވެ. މުޅި ދުނިޔޭގެ ނިސްބަތުން އެންމެ 0.02 ޕަސެންޓް ގްރީންހައުސް ގޭސް އުފައްދާ މި ގައުމުތަކަށް، މޫދުގެ ލޮނުގަނޑު އުފުލުމާއި، ގަދަފަދަ ސައިކްލޯންތަކާއި، ބޯކޮށް ވާރޭވެހުމާއި، ހޫނުގަދަވުމާއި، ހަނަފަސްވުން ފަދަ ގިނަ ނުރައްކާތަކަކާ ކުރިމަތިލާން ޖެހެއެވެ.
ޑަބްލިއުޑަބްލިއުއޭ އިން މިއަހަރު ކުރި 29 ދިރާސާއިން ދައްކާގޮތުގައި މޫސުމަށް އަންނަ ބަދަލުތަކުގެ ސަބަބުން މުޅި ދުނިޔޭގައި އެކި ބާވަތުގެ ގުދުރަތީ ކާރިސާތައް އިތުރުވެ، މަދުވެގެން 3،700 މީހުން މަރުވެ، އަދި މިލިއަނުން މީހުން ގެދޮރު ދޫކޮށް ދާން މަޖުބޫރުވެފައިވާކަން ވަނީ ފާހަގަކޮށްފައެވެ.
