ކިތަންމެ ރީތި މިސްކިތްތަކެއް ހުރިނަމަވެސް، އެ މިސްކިތްތަކަށް އަރާ ނަމާދުކޮށް، މިސްކިތްތައް ފަޅުފިލުވާން އަރާނެ ބަޔަކު ނުވާނަމަ އެއީ ބިރުވެތިވާން ޖެހޭކަމެއް ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"އަވަދިނެތި ވުމަކީ ނަމާދު އެޅުމަށް އޮތް އުޒުރެއް ނޫން" މިމައުޟޫއަށް ޚާއްސަ ކުރެވުނު މިއަދުގެ ހުކުރު ޚުޠުބާގައި ވިދާޅުވީ ދިވެހިރާއްޖެއަކީ ސައްތައިން ސައްތަ އިސްލާމީ ގައުމެއްކަމުގައި ވީހިނދު ރާއްޖޭގެ ހުރިހާ ކަންކޮޅެއްގައިވެސް މިސްކިތްތައް ވަރަށް ގިނަ ކަމުގައެވެ. އެހެންނަމަވެސް ހިތާމައަކީ އެ މިސްކިތްތަކަށް އަރައި ނަމާދު ކުރާ މީހުންގެ އަދަދު މަދުވުން ކަމުގައި މިއަދުގެ ޚުޠުބާގައި ވިދާޅުވެފައި ވެއެވެ.
ރީތި މިސްކިތްތަކެއް ކިތައްމެ ބައިވަރު އަދި ކައިރީގައި ބިނާކުރެވުނަސް، އެ މިސްކަތަކުގެ ފަޅުފިލުވާން އަރާނެ ބަޔަކު ނުވާނަމަ އެއީ އަހަރެމެން އެކަމާ ބިރުގަންނަން ޖެހޭ ކަމެކެވެ.
މިއަދުގެ ޚުޠުބާގައި ވިދާޅުވެފައި ވެއެވެ.
ޚުޠުބާގައި އިތުރަށް ވިދާޅުވީ ނަމާދަކީ އެންމެހާ މުސްލިމުންގެ މައްޗަށް ފަރުޟު ކުރައްވާފައިވާ ކަމަކަށް ވާއިރު، ހުކުރު ޖަމާއަތަށް ސަމާލުކަންދޭ ފަދައިން ފަރުޟު ފަސް ނަމާދަށް ވެސް ސަމާލުކަން ދޭންވާނެ ކަމުގައެވެ. އަދި ނުކުޅެދުންތެރިކަން ހުންނަ މީހުންނާއި އުމުރުން ދުވަސްވެފައިވާ މީހުން ނަމާދަށް ފަރުވާތެރިވާ މަންޒަރަކީ ނުހަނު އުފާވެރިކަން ހިތަށް ގެނުވާ މަންޒަރެއްކަމުގައިވެސް ޚުޠުބާގައި ވިދާޅުވެފައި ވެއެވެ.
އަދި ޚުޠުބާގައި ވިދާޅުވެފައިވަނީ ނަމާދަކީ އިސްލާމްދީނު ތަނބު ކަމަށާއި، އެއީ ކޮންމެ މުކައްލަފަކު ކުރުން ވާޖިބު އަޅުމަކެއް ކަމުގައެވެ.
