ހދ. ހަނިމާދޫގައި މިދިޔަ ސަރުކާރުން އަޅަންފަށާފައިވާ ފިއުލް ޖެޓީއަކީ އެއްވެސް ބޭނުމެއް ނެތް ތަނެއްކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
އޭނާ މިހެން ދައުލަތުގެ މީޑިއާއިން ރޭ ގެނެސްދިން "ހަފްތާ 52″ ޕްރޮގްރާމުގައި ވާހަކަފުޅު ދައްކަވަމުންެވެ.
މިނިސްޓަރު މުއްތަލިބު ވިދާޅުވި ގޮތުގައި، މިދިޔަ ސަރުކާރުގައި އިންފްރާސްޓްރަކްޗާ މިނިސްޓްރީ އޮއްވައި، އިގްތިސާދީ ވުޒާރާއިން ވަނީ ބޮޑެތި މަޝްރޫއުތައް ހިންގާފައެވެ. މީގެ ތެރޭގައި ހަނިމާދޫ އެއާޕޯޓު މަޝްރޫއު، ގަމު އެއާޕޯޓު އަދި ފެލިވަރު މަސް ފެކްޓްރީގެ މަޝްރޫއު ހިމެނެއެވެ. މިފަދަ މަޝްރޫއުތައް ހިންގާފައިވަނީ އެކަމާ ގުޅުންހުރި މިނިސްޓްރީތަކުގެ ޓެކްނިކަލް މުވައްޒަފުންގެ ބައިވެރިވުމެއް ނެތިކަން އޭނާ ފާހަގަކުރެއްވިއެވެ.
ހަނިމާދޫއަކީ ފުން ފަޅެއް އޮންނަ ތަނަކަށްވާތީ އެތަނަށް ބޭނުންވާ ތެޔޮ ބާޖެއްގައި ވެއްދޭ ވަރުގެ ތަނެއް. މާކަނޑުގައި ގޮސް ބޯޓެއް ބާއްވައިގެން ތެޔޮ ސަޕްލައި ކުރަންޖެހޭ ވަރު ތަނެއް ނޫން އެއީ.
އޭނާ ވިދާޅުވި އެވެ.
ހަނިމާދޫގައި 15 މިލިއަން ޑޮލަރު ހޭދަކޮށްގެން އަޅާފައިވާ އެއް ކިލޯމީޓަރުގެ ފިއުލް ޖެޓީއަކީ ބޭނުމެއް ނެތް އިންވެސްޓްމަންޓެއް ކަމަށް މުއްތަލިބު ވިދާޅުވިއެވެ. އެއީ ހަނިމާދޫއަކީ ފުން ފަޅެއް އޮންނަ ރަށަކަށްވެފައި، އެތަނަށް ތެޔޮ ބާޖު ވައްދައިގެން ތެޔޮ އެޅުމުގެ ފުރުސަތު އޮތުމުންނެވެ. މިހެން އޮއްވައި، މާކަނޑަށް ގޮސް ތެޔޮ ސަޕްލައިކުރަން ޖެހޭ ވަރުގެ ތަނެއް ނޫންކަން އޭނާ ފާހަގަކުރެއްވިއެވެ.
މީގެއިތުރުން، ކުރީ ސަރުކާރުން ގިރާވަރުގެ ބިން ހިއްކުމުގެ މަޝްރޫއު ހަވާލުކޮށްފައިވަނީ މޯލްޑިވްސް ފަންޑު މެނޭޖްމަންޓް ކޯޕަރޭޝަނާކަން ފާހަގަކުރެއްވިއެވެ. މި ކުންފުނި އުފައްދާފައިވަނީ ދައުލަތުގެ ފަންޑު މެނޭޖްކުރުމަށް ކަމަށްވީ ނަމަވެސް، އިންތިހާބުގެ ދެވަނަ ބުރުގެ ތެރޭގައި އެޑްވާންސްގެ ގޮތުގައި 17.5 މިލިއަން ރުފިޔާ ދޫކޮށްފައިވާކަން މުއްތަލިބު ހާމަކުރެއްވިއެވެ. އަދި މި ސަރުކާރުން ވެސް އިތުރު ފައިސާ ދޫކުރި ނަމަވެސް، މަޝްރޫއު ކުރިއަށް ނުދާކަން ފާހަގަކުރެއްވިއެވެ.
މި ދަންނަވާ އެއްޗަކީ އެ ބޭފުޅުން ބެއްލެވީ އެއް ގޮތެއް ނެތިއްޔާ އަނެއް ގޮތުން ވެސް ޕްރޮޖެކްޓް ހިންގޭތޯއޭ ކޮންމެ ދިމާލަކުން ވިޔަސް.
މުއްތަލިބު ވިދާޅުވިއެވެ.
މުއްތަލިބު އިތުރަށް ވިދާޅުވި ގޮތުގައި، ކުރީ ސަރުކާރުން މިފަދަ މަޝްރޫއުތައް ހިންގާފައިވަނީ އެކަމާ ގުޅުންހުރި މިނިސްޓްރީތަކާ ގުޅުވުމެއްނެތި ކަމަށްވާތީ، އެއީ ރަނގަޅު ނިޔަތެއްގައި ކުރި ކަމެއްކަމަށް ނުބެލެވޭކަން ފާހަގަކުރެއްވިއެވެ.
