އިޒްރޭލުގެ ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އިމިގްރޭޝަން ގާނޫނަށް ހުށަހަޅާފައިވާ އިސްލާހުގެ މަސައްކަތް ކުރިއަށް ނުދާތީ އެމްޑީޕީން މިއަދު ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
މީގެ ފަސް މަސް ކުރިން، ޖޫން 10 ގައި، ފަލަސްތީނުގެ ދަރިފަސްކޮޅު ނައްތާލުމަށް އިޒްރޭލުން ހިންގަމުންދާ ގަތުލުއާންމާ ދެކޮޅަށް އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް މި ބިލު ހުށަހެޅުއްވިއެވެ. މިއަދު މި ގަރާރު ހުށަހެޅުނު އިރު، ސަލާމަތީ ހިދުމަތްތަކާ ބެހޭ 241 ކޮމިޓީން އެ ބިލުގެ ދިރާސާގެ ފުރަތަމަ ބައްދަލުވުން މިއަދު ހެނދުނު 9:30 އަށް ތާވަލްކޮށްފައިވެއެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހެޅުއްވި ގަރާރުގައި ފާހަގަކުރައްވާފައިވަނީ، މި ބިލު ހުށަހެޅުނު ދުވަހު ވަޒީރުންގެ މަޖިލީހުން މިކަމަށް ނިންމުމެއް ނިންމި ނަމަވެސް، އެއްވެސް އަމަލީ މަސައްކަތެއް ސަރުކާރުން ކޮށްފައިނުވާ ކަމަށެވެ. އަދި ބިލު ކޮމެޓީގައި ހަތަރު މަހަށްވުރެ ގިނަ ދުވަސްވެފައިވާއިރު، ސަރުކާރަށް މަޖިލީހުގެ އަޣުލަބިއްޔަތު އޮތުމާއެކު ބޭނުން ކަންކަން އަވަހަށް ނިންމަމުންދާކަން ފާހަގަކުރައްވާފައިވެއެވެ. މީގެ މިސާލެއްގެ ގޮތުން، ދައުރުން ބޭރުގައި ވެސް ޖަލްސާތައް ބާއްވައިގެން ބައެއް ބިލުތައް ފާސްކޮށްފައިވާކަމާއި، މަޖިލިސް ރައީސްގެ ރަސްމީ ގެކޮޅުގެ މުވައްޒަފުންގެ އަދަދާ ގުޅޭ މައްސަލައިގައި ވެސް އަވަސް ނިންމުމެއް ނިންމާފައިވާކަން ފާހަގަކުރައްވާފައިވެއެވެ.
މުހައްމަދު އިބްރާހީމްގެ ގަރާރުގައި ވިދާޅުވެފައިވަނީ، އިސްލާމީ އުއްމަތަށް އިސްރާއީލުން ޖައްސަމުންދާ ގިލަންވެރިކަމާއި އާފާތާ ދެކޮޅަށް ކަނޑައެޅިގެން ދެކޮޅުވެރިކަން ހާމަކުރުމަށްޓަކައި، އިޒްރޭލު ޕާސްޕޯޓް މަނާކުރުމުގެ ބިލު އަވަހަށް ފާސްކުރުމަށް ސަރުކާރަށް ގޮވާލުމަށް މި ގަރާރު ހުށަހަޅުއްވާފައިވާ ކަމަށެވެ.
މިކަމާ ގުޅިގެން މިދިޔަ މަހު 21 ގައި މުހައްމަދު އިބްރާހީމް ހުށަހެޅުއްވި ކުއްލި މައްސަލަ ވަނީ މަޖިލީހުގެ ގަވާއިދުގައިވާ ޝަރުތުތައް ފުރިހަމަނުވާތީ ރިޔާސަތުން ބޭރުކޮށްލާފައެވެ.
