އާސަންދައިގެ ޚިދުމަތް މެދުކެނޑުމެއް ނެތި ރައްޔިތުންނަށް ލިބޭކަން ކަށަވަރުކުރުމަށް ގޮވާލައި، އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) މަޖިލީހަށް ހުށަހެޅި ކުއްލި މައްސަލަ، ޝަރުތު ހަމަނުވާ ކަމަށް ބުނެ މަޖިލީހުގެ ރިޔާސަތުން ބަލައިނުގަތުމަށް ނިންމިއެވެ.
މި މައްސަލައިގައި ބަޔާންކޮށްފައިވަނީ، ރައްޔިތުންނާ ސީދާ ގުޅުންހުރި މިފަދަ މުހިންމު ޚިދުމަތެއް، ދައުލަތުން ފައިސާ ނުދިނުމުގެ ސަބަބުން ހުއްޓާލަން ޖެހޭ ހިސާބަށް ދިޔަނުދިނުމަށް އަވަސް ފިޔަވަޅުތަކެއް އެޅުމަށެވެ. އަދި މަޖިލީހުގެ ރައީސް ޢަބްދުﷲ ވިދާޅުވެފައިވަނީ ކުއްލި މައްސަލައެއްގެ ގޮތުގައި ހުށަހަޅާ މައްސަލައިގައި ބަޔާންކުރާ ކަންކަން ވާންޖެހޭނީ ވޭތުވެދިޔަ ހަތް ދުވަހުގެ ތެރޭގައި ކުއްލިއަކަށް ހިނގާފައިވާ ކަމަކަށް ކަމަށެވެ.
2011 ވަނަ އަހަރު ފެށިގެން ހިނގަމުން އައި މި އާސަންދައިގެ ނިޒާމަކީ ދިވެހި ހުރިހާ ރައްޔިތުންނަށް އަސާސީ ޞިއްޙީ ޚިދުމަތް ފޯރުކޮށްދިނުމަށް ދައުލަތުން ފައިސާ ޚަރަދުކޮށްގެން ހިންގާ ނިޒާމެކެވެ. ނަމަވެސް، މިހާރު ހޮސްޕިޓަލްތަކާއި ކްލިނިކްތަކުން އާސަންދައިގެ ޚިދުމަތް ހޯދުމަށް ދާ ރައްޔިތުންނަށް، ޑޮކްޓަރަށް ދެއްކުމާއި ޓެސްޓްތައް ހެދުމުގެ ޚިދުމަތްތައް ހުއްޓާލަމުންދާކަމާއި، ބޭސްސިޓީއަށް ބޭސް ދޫކުރުމުގައި ލިބެމުންއައި އާސަންދައިގެ ޚިދުމަތް ނުލިބި، ރައްޔިތުން އަމިއްލަ އަތުން ޚަރަދުކުރަން ޖެހުމުގެ ކަންބޮޑުވުން އިތުރުވެފައިވެއެވެ.
ޤާނޫނުއަސާސީގައި ރަނގަޅު ފެންވަރުގެ ޞިއްޙީ ޚިދުމަތްތައް ލިބުމަކީ ކޮންމެ ރައްޔިތަކަށް ލިބިގެންވާ އަސާސީ ޙައްޤެއްކަމަށް ކަނޑައަޅާފައިވާއިރު، މިހާރުގެ ޙާލަތަކީ ތަކެތީގެ އަގު ބޮޑުވެ، ރައްޔިތުންގެ އަތްމަތި ދަތިވެފައިވާ ދަނޑިވަޅެއްގައި މުޅި އާބާދީއަށް އިތުރު ތަކުލީފެއް ކުރިމަތިވެދާނެ ކަމެކެވެ. އިޖްތިމާޢީ ޞިއްޙީ އިންޝުއަރެންސްގެ ޤައުމީ ނިޒާމުގެ ޤާނޫނުގައިވާ ގޮތުން، އާސަންދަ ހިންގުމަށް މާލީގޮތުން ދަތިވެއްޖެ ޙާލަތްތަކުގައި މާލީ ވުޒާރާއިން އެކަން ޙައްލުކޮށްދޭން ޖެހެއެވެ.
