މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ކުރެހުމުގެ މުބާރާތެއް ބޭއްވުމަށް ހަމަޖައްސައި، އެ މުބާރާތުގައި ބައިވެރިވުމުގެ ފުރުސަތު މި މަހުގެ ނިޔަލަށް ހުޅުވާލައިފިއެވެ.
"ގުޅިގެން މީރާ" އިނީޝިއޭޓިވްގެ ދަށުން ބާއްވާ މި މުބާރާތުގެ މަޤްޞަދަކީ މީރާއާއި އާންމު ރައްޔިތުންނާއި، ޓެކްސް ދައްކާ ފަރާތްތަކާއި، ސްޓޭކްހޯލްޑަރުންނާ ދެމެދު އޮންނަ ގުޅުން އިތުރަށް ބަދަހިކުރުމެވެ.
"ގައުމު ބިނާކުރުމުގައި ޓެކްސްގެ ދައުރު" މި މައުލޫއަށް ބައިވެރިންގެ ކުރެހުންތައް ބިނާކުރަންވާނީ ގައުމު ބިނާކުރުމުގައި ރައްޔިތުންނާއި މީރާއާ ދެމެދު އޮންނަ ގުޅުން ދައްކުވައިދޭ ގޮތަށެވެ. މުބާރާތް ކުރިއަށްދާނީ ތިން އުމުރުފުރައަކަށް ބަހާލައިގެންނެވެ: 13-15 އަހަރާ ދެމެދު، 16-18 އަހަރާ ދެމެދު، އަދި 18 އަހަރުން މަތީގެ އުމުރުފުރާއެވެ.
ކޮންމެ އުމުރުފުރައަކުން އެއްވަނަ ހޯދާ ފަރާތަކަށް 5،000 ރުފިޔާ، ދެވަނަ ހޯދާ ފަރާތަކަށް 3،500 ރުފިޔާ، އަދި ތިންވަނަ ހޯދާ ފަރާތަކަށް 2،000 ރުފިޔާގެ ފައިސާގެ އިނާމު ދެވޭނެއެވެ. މާލޭގައި ދިރިއުޅޭ ފަރާތްތަކުން މީރާގެ ހެޑް އޮފީހަށް ކުރެހުންތައް ހުށަހަޅަންވާނެ އެވެ.
އަތޮޅުތަކުގައި ދިރިއުޅޭ ފަރާތްތަކަށް އެ ރަށެއްގެ މީރާގެ ކަލެކްޝަން ސެންޓަރު ނުވަތަ ބްރާންޗް އޮފީހަކަށް ކުރެހުންތައް ހުށަހެޅިދާނެއެވެ.
