ތިލަދުންމަތީ ދެކުނުބުރީ ހަނިމާދޫގައި 50 އެނދުގެ ހޮސްޕިޓަލެއް އިމާރާތްކޮށް ހިންގުމަށްޓަކައި 20,000 އަކަފޫޓުގެ ބިމެއް 50 އަހަރަށް ދޫކުރުމަށް އެ ރަށު ކައުންސިލުން ނިންމައިފިއެވެ. މި ނިންމުން ނިންމާފައިވަނީ ކައުންސިލްގެ ހަތަރުވަނަ ދައުރުގެ 154 ވަނަ އާންމު ބައްދަލުވުމުގައެވެ.
ހަނިމާދޫ ކައުންސިލްގެ ނައިބު ރައީސް ފިރާގު މުހައްމަދު ވިދާޅުވި ގޮތުގައި، މި މަޝްރޫޢު ކުރިއަށް ގެންދާނީ މަރުހަލާތަކަކަށް ބަހާލައިގެންނެވެ.
ފުރަތަމަ މަރުހަލާގައި ހޮސްޕިޓަލް އިމާރާތްކޮށް ހިންގުމަށް ޝައުގުވެރިވާ ފަރާތްތައް ހޯދުމަށްފަހު، އެ ފަރާތްތަކުގެ ޑިމާންޑް ދެނެގަނެވޭނެއެވެ. އަދި އިތުރު ވިޔަފާރި ކުރުމަށް ބޭނުންވާނަމަ، ކައުންސިލާ އެއްބަސްވެވޭ ގޮތެއްގެމަތިން އިތުރު ބިމެއް ދޫކުރުމަށްވެސް ވިސްނާފައިވެއެވެ.
ފިރާގުގެ ވިދާޅުވީ، ހަނިމާދޫ ވައިގެ ބަނދަރު ޒަމާނީ ފެންވަރަށް ތަރައްޤީކުރުމުގެ މަސައްކަތް ނިމުމަކާ ކައިރިވެފައިވުމާއި، ރަށުގައި މިހާރުވެސް ސިޓީ ހޮޓަލެއް ހިންގަމުންދިއުމާއި، ފަތުރުވެރިކަމުގެ ވިޔަފާރިއަށް ދޫކޮށްފައިވާ ބިންތަކުގެ އަމަލީ މަސައްކަތް ފެށުމަށް ތައްޔާރުވަމުން އަންނާތީ، ރަށަށް ހޮސްޕިޓަލެއްގެ މުހިންމުކަން އިތުރުވެފައިވެއެވެ.
ހޮސްޕިޓަލް އެޅުމަށް ބިން ދޫކުރުމުގައި ކައުންސިލްގެ ވިސްނުމަކީ ބަނދަރު ސަރަހައްދުން ބިން ދޫކުރުމެވެ. މި މަޝްރޫޢުއަށް ބޭނުންވާ ފަންނީ އެހީ ހޯދުމާއި، އުސޫލުތަކާއި ގަވާއިދުތައް އެކުލަވާލުމުގެ މަސައްކަތް ކައުންސިލުން ކުރިއަށް ގެންދާއިރު، ކަންކަން ހަމަޖެހުމުން ބިމަށް ކުރިމަތިލުމަށް އިޢުލާންކުރާނެކަމަށް ފިރާގު ވިދާޅުވިއެވެ.
