ހދ. ހިރިމަރަދޫގެ ފެނާއި ނަރުދަމާގެ މަޝްރޫޢުގެ މަސައްކަތް ނިމުމަކަށް އައިސްފިއެވެ. މީގެ ދެ އަހަރު ކުރިން ފެށުނު މި މަޝްރޫޢުގެ އިންސްޕެކްޝަނާއި ކޮމިޝަނިންގ މަސައްކަތް މިހާރު ކުރިއަށްދަނީ އިމާރާތްކުރުމާއި ބިނާވެށި ކުރިއެރުވުމާބެހޭ ވުޒާރާގެ އިސްވެރިންނާއި އެމްޑަބްލިއުއެސްސީގެ ޓެކްނިކަލް ޓީމުގެ ބެލުމުގެ ދަށުންނެވެ.
މި މަޝްރޫޢުގެ ދަށުން ހިރިމަރަދޫގައި 8.06 ކިލޯމީޓަރުގެ ދިގުމިނުގެ ފެން ހޮޅީގެ މައި ނެޓްވޯކެއް ގާއިމުކުރެވި، އާރްއޯ ފެސިލިޓީ ބިލްޑިންގއެއް އިމާރާތްކުރެވިފައިވެއެވެ. ފެން އުފެއްދުމަށް ދެ އާރްއޯ ޕްލާންޓް ބެހެއްޓިފައިވާއިރު، ފެން ރައްކާކުރުމަށް ތިން ތާނގީ ބެހެއްޓިފައިވެއެވެ. އަދި ރަށުގެ ގޭގެއަށް ފެން މީޓަރު ބަހައްޓައި، ފެނުގެ ކަނެކްޝަން ގުޅައިދެވި، ރައްކާތެރި ބޯފެން ފޯރުކޮށްދިނުމުގެ މަސައްކަތް ވަނީ ނިމިފައެވެ.
ނަރުދަމާގެ ނިޒާމުގެ ދަށުން 5.02 ކިލޯމީޓަރުގެ ދިގުމިނުގެ މައި ނެޓްވޯކެއް ގާއިމުކުރެވި، 1.12 ކިލޯމީޓަރުގެ ޕަންޕިންގ ލައިނެއް އަޅާފައިވެއެވެ. މީގެ އިތުރުން ތިން ޕަންޕިންގ ސްޓޭޝަނާއި އެއް ސީ އައުޓްފޯލް ގާއިމުކުރެވިފައިވެއެވެ. ރަށުގެ ގޭގޭގައި ޖަންކްޝަން ބަހައްޓައި، ނަރުދަމާގެ ކަނެކްޝަން ގުޅައިދެވި، ނަރުދަމާގެ ޚިދުމަތް ފޯރުކޮށްދިނުމުގެ މަސައްކަތްވެސް ވަނީ ނިންމާލެވިފައެވެ. މި މަޝްރޫޢު ނިމުމުން ހިރިމަރަދޫގެ ރައްޔިތުންނަށް ފެނާއި ނަރުދަމާގެ ޚިދުމަތް ލިބިގެންދާނެއެވެ.
