މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން، އިންކަމް ޓެކްސް ބަޔާން ހުށަހަޅާފައިނުވާ، ބޮޑު އަދަދުން ޓެކްސް ދައްކާ ފަރާތްތަކުގެ ލިސްޓެއް އާންމުކޮށްފިއެވެ. މި ލިސްޓު އާންމުކުރެވިފައިވަނީ ޓެކްސް ބަޔާން ހުށަނާޅާ އަދި ފައިސާ ނުދައްކާ ފަރާތްތަކުގެ ނަން ހާމަކުރުމަށް އޮންނަ އުސޫލުގެ ދަށުންނެވެ.
މީރާއިން އާންމުކުރި ލިސްޓުގައި 43 ވިޔަފާރިއެއްގެ ނަން ހިމެނިފައިވެއެވެ. މީގެ ތެރޭގައި ރާއްޖޭގެ ބޮޑެތި ކުންފުނިތަކާއި، ރާއްޖޭގައި އެކި މަޝްރޫޢުތައް ހިންގަމުންދާ ބޭރުގެ ކުންފުނިތައްވެސް ހިމެނެއެވެ. ޗައިނާގެ ޗައިނާ އިންޖިނިއަރިންގ ކޯޕަރޭޝަނާއި ސަޢޫދީ ބިން ލާދިން ގްރޫޕްވެސް މި ލިސްޓުގައި ހިމެނިފައިވާކަން ފާހަގަކުރެވެއެވެ.
މީރާއިން މަޢުލޫމާތު ދީފައިވާ ގޮތުގައި، ބޮޑެތި އަދަދުތަކުން ޓެކްސް ދައްކާ ފަރާތްތަކުގެ ގޮތުގައި ގިންތިކުރެވެނީ އަހަރެއްގެ ތެރޭގައި ޖުމްލަ އާމްދަނީ 200 މިލިއަން ރުފިޔާ ނުވަތަ އެއަށްވުރެ އިތުރުވާ ފަރާތްތަކާއި، އެފަރާތްތަކާ ގުޅުން އޮންނަ ވިޔަފާރިތަކެވެ. އަދި މިދިޔަ އަހަރުގެ އިންކަމް ޓެކްސް ބަޔާން ހުށަހަޅައި ފައިސާ ދެއްކުމުގެ ސުންގަޑިއަކީ މި އަހަރުގެ ޖޫން 30 ވަނަ ދުވަސް ކަމުގައި މީރާއިން ބުނެފައިވެއެވެ.
