މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ހާމަކޮށްފައިވާ ތަފާސްހިސާބުތަކުން ދައްކާގޮތުގައި، މި އަހަރުގެ އޯގަސްޓު މަހުގެ ނިޔަލަށް ދައުލަތަށް ޓެކުހުގެ ގޮތުގައި ލިބުނު އާމްދަނީ ފާއިތުވި އަހަރާ އަޅާބަލާއިރު 1.6 ބިލިއަން ރުފިޔާގެކުރިއެރުމެއް ލިބިއްޖެއެވެ. މީރާގެ އޯގަސްޓު މަހުގެ އާމްދަނީ ރިޕޯޓުގައިވާ ގޮތުން، މި އަހަރުގެ ފުރަތަމަ އަށް މަސްދުވަހު ދައުލަތަށް ލިބުނު މުޅި އާމްދަނީގެ 85.5 އިންސައްތައަކީ ޓެކުހުން ލިބުނު އާމްދަނީއެވެ.
ތަފްސީލުތަކަށް ބަލާއިރު، ފާއިތުވި އަހަރު ޓެކުހުގެ ގޮތުގައި ލިބިފައިވަނީ ޖުމްލަ 15.1 ބިލިއަން ރުފިޔާ ކަމަށްވާއިރު، މި އަހަރުގެ އޯގަސްޓު މަހުގެ ނިޔަލަށް އެ އަދަދު 16.8 ބިލިއަން ރުފިޔާއަށް އަރާފައިވެއެވެ. މިއީ 10.5 އިންސައްތައިގެ ކުރިއެރުމެކެވެ. ހަމައެހެންމެ، އިންކަމް ޓެކްސްގެ ގޮތުގައި ލިބުނު އާމްދަނީވެސް އިތުރުވެ، ނިމުނު އަހަރު ލިބުނު 4.6 ބިލިއަން ރުފިޔާ މި އަހަރު 5.4 ބިލިއަން ރުފިޔާއަށް މަތިވެފައިވެއެވެ.
މީގެއިތުރުން، ގްރީން ޓެކްސް އަދި ޖީއެސްޓީގެ ގޮތުގައި ލިބުނު އާމްދަނީވެސް ކުރިއަރާފައިވާކަން ފާހަގަކުރެވެއެވެ. ގްރީން ޓެކްސްގެ ގޮތުގައި ފާއިތުވި އަހަރު ލިބުނު 686 މިލިއަން ރުފިޔާ މި އަހަރު 719 މިލިއަން ރުފިޔާއަށްވުރެ އިތުރަށް މައްޗަށް ގޮސްފައިވެއެވެ. އަދި ޓީޖީއެސްޓީ ހިމެނޭގޮތަށް މުދަލާއި ޚިދުމަތުން ނަގާ ޓެކުހުގެ ގޮތުގައި ނިމުނު އަހަރު ލިބުނު 9 ބިލިއަން ރުފިޔާ މި އަހަރު 9.8 ބިލިއަން ރުފިޔާއަށް އިތުރުވެފައިވާކަން ހާމަވެއެވެ.
މި ތަފާސްހިސާބުތަކުން ދައްކައިދެނީ ދައުލަތުގެ ޓެކްސް އާމްދަނީ އެކި ދާއިރާތަކުން ފާހަގަކޮށްލެވޭ މިންވަރަކަށް އިތުރުވެފައިވާކަމެވެ.
