ނ. ހޮޅުދޫން ފެނުނު ދިވެހި އަންހެން މީހާގެ މަރުގެ މައްސަލަ ތަޙުޤީޤު ކުރުމަށް ފުލުހުންގެ ޚާއްޞަ ޓީމެއް އެރަށަށް ފުރައިފިއެވެ. އެރަށުގައި އުމުރުން 50 އަހަރުގެ އަންހެނަކު ޒަޚަމްތަކާއެކު އޮއްވާ ފެނިގެން ފުލުހުން ދަނީ ޙަރަކާތްތެރިވަމުންނެވެ. ނިޔާވެފައި އޮއްވާ ފެނުނީ އެރަށު މާރަނގަ، ޒަކިއްޔާ މޫސާ މަނިކެވެ.
ފުލުހުން ވިދާޅުވެފައިވާ ގޮތުގައި، އެރަށުގައި ޒަޚަމްތަކާއެކު އަންހެނަކު އޮތް ކަމަށް މިއަދު ހެނދުނު 10:10 ގައި ރިޕޯޓު ލިބިގެން ފުލުހުން ޙަރަކާތްތެރިވެ، އެ މީހާ އެރަށު ޞިއްޙީ މަރުކަޒަށް ގެންގޮސްފައިވެއެވެ. އަދި އެ މީހާ ނިޔާވެފައިވާ ކަމަށް ޞިއްޙީ މަރުކަޒުން ފުލުހުންނަށް މަޢުލޫމާތު ދީފައިވާ ކަމަށްވެސް ފުލުހުން ވިދާޅުވިއެވެ. މި މައްސަލަ ތަޙުޤީޤު ކުރުމަށް މާލެއިން ޚާއްޞަ ޓީމެއް އެރަށަށް ދިއުމަށް މިހާރު ފުރާފައިވާ ކަމަށް ފުލުހުން ވިދާޅުވެފައިވެއެވެ.
މަޢުލޫމާތު އެނގޭ މީހަކު ކިޔައިދިން ގޮތުގައި އޭނާގެ ހަށިގަނޑު ފެނުނު އިރު ކައިރީގައި ވަޅިއެއް އޮތްއިރު، އޭނާގެ ކަރުގައި ވަޅި އަޅާފައިވެސް ހުއްޓެވެ. އޭނާގެ ހަށިގަނޑު ފެނުނީ ގޭގައި އޮއްވާއެވެ. އެއީ ބޮޑު ޢާއިލާއަކާއެކު ދިރިއުޅެމުން އަންނަ މީހެއް ކަމަށް ވެއެވެ. އަދި އެ މީހާއަކީ ނަފްސާނީ މައްސަލައެއް ހުންނަ މީހެއް ކަމަށްވެސް އެރަށުން ބައެއް މީހުން ބުނެފައިވެއެވެ. އެ އަންހެން މީހާގެ ދެ ކުދިން ތިބޭއިރު، އޭނާއަށް މާމަ ކިޔާ ދެ ކުދިންވެސް ތިބޭ ކަމަށް މަޢުލޫމާތު ލިބެއެވެ.
ފުލުހުން ވިދާޅުވެފައިވަނީ، އިތުރު މަޢުލޫމާތު ލިބުމުން ހިއްސާ ކުރާނެ ކަމަށާއި، މިވަގުތު ސީންގައި ފުލުހުން ދަނީ ޙަރަކާތްތެރިވަމުން ކަމުގައެވެ.
