ޤާނޫނުތައް ތަންފީޛުވަމުންދަނީ އެންމެން އެއް ހަމައަކުން ޤާނޫނަށް ތަބާވާންޖެހޭކަން ރައީސް ޑރ. މުޙައްމަދު މުޢިއްޒު ޤަބޫލުކުރައްވާތީ ކަމުގައި އިމިގްރޭޝަން ކޮންޓްރޯލަރ މުޙައްމަދު ޝައްމާން ވިދާޅުވެއްޖެއެވެ. އޭނާމި ވާހަކަ ދެއްކެވީ ގަވާއިދާ ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރަމުންދާ މަސައްކަތަށް ލިބެމުންދާ އެއްބާރުލުމަށް ޝުކުރު އަދާކޮށް ކުރެއްވި އެކްސް ޕޯސްޓެއްގައެވެ.
ޝައްމާންގެ އެކްސް ޕޯސްޓުގައި ވިދާޅުވީ ޤާނޫނު ތަންފީޛުކުރާ އިދާރާތަކަށް ރައީސް މުޢިއްޒު ފުރިހަމަ ބާރާއި އިޚްތިޔާރު ދެއްވާފައިވާ ކަމަށާއި، ރާއްޖޭގެ މިނިވަންކަމާއި އިސްތިޤްލާލު އަދި ސަލާމަތަށް އުނިކަމެއް އަންނާކަށް ރައީސް ފުރުޞަތު ނުދެއްވާނެ ކަމަށެވެ.
އެކިއެކި ފަރާތްތަކުން ދެެއްވާ އެއްބާރުލެއްވުމަށާއި ވިދާޅުވާ ހެޔޮ ބަސްފުޅަށް ޝުކުރު ދަންނަން. ހަޤީޤަތުގައި އަޅުގަނޑަކީ ރޮކެޓް ސައިންޓިސްޓެއް ނޫން. މިއަދު ޤާނޫނުތައް ތަންފީޒު ކުރެވެމުން މިދަނީ ރާއްޖޭގެ ރައީސުލް ޖުމްހޫރިއްޔާ ޑރ @MMuizzu، ޤާނޫނަކީ އެއް ހަމަ…
— Mohamed Shamaan Waheed (@ShamaanW) August 29, 2024
އިމިގްރޭޝަނުން ފުލުހުންނާ ގުޅިގެން ހިންގަމުންދާ އޮޕަރޭޝަންތަކުގެ ތަފްސީލު ދެއްވަމުން ޝައްމާން ވިދާޅުވީ އިއްޔެގެ އޮޕަރޭޝަނުގައި 211 އޮފިސަރުން ބައިވެރިވެފައިވާ ކަމަށެވެ. މާލޭގެ އެކި ސަރަހައްދުތަކުގައި 52 ޓީމުން ހަވީރު 4:00 އިން 6:00 އަށް ހަރަކާތްތެރިވެފައިވާ ކަމަށް އޭނާ ފާހަގަކުރެއްވިއެވެ.
މި އޮޕަރޭޝަންތަކުގައި ގަވާއިދާ ޚިލާފަށް އުޅޭ ބިދޭސީންނަށް ސިސްޓަމުގެ ތެރެއަށް ވަދެ ރަނގަޅު ސައިޓުތަކުގައި މަސައްކަތްކުރުމަށް ފުރުޞަތު ދީފައިވާ ކަމަށާއި، ބައެއް ވިޔަފާރިތައް ގަވާއިދުގެ ތެރެއަށް ގެންނަން ބޭނުންވާ ފަރާތްތަކަށްވެސް ފުރުޞަތު ދީފައިވާ ކަމަށް ޝައްމާން ވިދާޅުވިއެވެ.
މިދިޔަ އަހަރުގެ ނޮވެންބަރު 17 އިން މިދިޔަ އާދީއްތަ ދުވަހާ ހަމައަށް 3,000 އަށްވުރެ ގިނަ ބިދޭސީން ޑީޕޯޓްކޮށް، 200 އަށްވުރެ ގިނަ ތަންތަން ރެއިޑްކޮށްފައިވާކަން ޝައްމާން ހާމަކުރެއްވިއެވެ.
