ރާއްޖޭގައި "ރިޓްޒް ބިއުޓީ ސެލޫން" ހިންގި ނޭޕާލް ރައްޔިތެއް ކަމުގައިވާ ރަޖަނީ ޝްރެސްތާ ޑީޕޯޓްކުރެވުނީ ހުއްދަ ނެތި ވިޔަފާރިކުރުމާއި ވަޒީފާ ދިން ފަރާތަށް ފިލައިގެން އުޅުމުގެ ސަބަބުން ކަމަށް އިމިގްރޭޝަނުން މިއަދު ހާމަކޮށްފިއެވެ.
އިމިގްރޭޝަން ކޮންޓްރޯލަރު މުޙައްމަދު ޝައްމާން ބައެއް މީޑިއާތަކަށް މައުލޫމާތު ދެއްވަމުން ވިދާޅުވީ ފުލުހުންނާއި އިމިގްރޭޝަނުގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން ރަޖަނީއާ ސުވާލުކުރުމުން، އަމިއްލައަށް ވިޔަފާރިކުރާ ކަމަށް އެއްބަސްވެފައިވާ ކަމަށެވެ. ރަޖަނީ ރާއްޖެ ގެނައި ފަރާތުން އޭނާ ގެއްލިގެން އުޅޭ ކަމަށް ރިޕޯޓުކޮށްފައިވާ ކަމަށްވެސް ޝައްމާން ފާހަގަކުރެއްވިއެވެ.
ރަޖަނީ ޑީޕޯޓްކުރެވުނީ އޮޅުވާލައިގެން ކަމަށް ބުނެ ސޯޝަލް މީޑިއާގައި ފެތުރެމުންދާ ވާހަކަތަކުގައި ވަނީ، އޭނާ ގެނައި ފަރާތުން މުސާރަ ނުދޭތާ ގިނަ ދުވަސްތަކެއް ވެފައިވާތީ، އެހެން ތަނަކަށް ވަޒީފާ ބަދަލުކުރުމުގެ މަސައްކަތް ކުރަމުންދަނިކޮށް ޑީޕޯޓްކުރެވުނު ކަމަށެވެ. އަދި އިމިގްރޭޝަނުގެ އޮފިސަރަކާއި ވަޒީފާދޭ ފަރާތް ގުޅިގެން މިކަން ކުރި ކަމަށްވެސް ތުހުމަތުކޮށްފައިވެއެވެ.
އެހެންނަމަވެސް، އިމިގްރޭޝަން ވިދާޅުވަނީ މިއީ އާންމުކޮށްވެސް އޮފިސަރުން ޢަމަލުކުރާ ގޮތް ކަމަށެވެ. ތުހުމަތުކުރެވޭ ފަރާތް އެތަނުގައި ހުރިކަން ޔަޤީންކުރުމަށް އިމިގްރޭޝަނުގެ ތަޙްޤީޤީ ޓީމުން ޢަމަލުކުރާ އުސޫލު ކަމަށް ފާހަގަކޮށްފައިވެއެވެ.
ރަޖަނީ އިމިގްރޭޝަނުގެ ބެލުމުގެ ދަށަށް ގެންދިއުމާ ގުޅިގެން މައްސަލަ ލޭބަރ ރިލޭޝަންސް އޮތޯރިޓީއަށް ހުށަހަޅާފައިވާ ކަމަށާއި، އެ މައްސަލަ ބަލަމުންދަނިކޮށް ޑީޕޯޓްކޮށްފައިވާ ކަމަށްވެސް ސޯޝަލް މީޑިއާގައި ފާހަގަކޮށްފައިވެއެވެ.
ރިޓްޒް ސެލޫނުން އާންމުކުރާ ޓިކްޓޮކް ވީޑިއޯތަކުގެ ސަބަބުން ދިވެހިންގެ މެދުގައިވެސް އެތަނަށް ވަރަށްބޮޑު މަޤްބޫލުކަމެއް ލިބިފައިވާކަން ފާހަގަކުރެވެއެވެ.
