މުދަލު ޒަކާތުގެ ގޮތުގައި މި އަހަރުގެ ޖުލައި މަހާ ހަމައަށް 66.2 މިލިއަން ރުފިޔާ ލިބިފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ޝާއިޢުކޮށްފައިވާ ތަފާސް ހިސާބުތަކުން ދައްކައެވެ. މީގެ ތެރޭގައި 5،446 އެމެރިކާ ޑޮލަރު ހިމެނެއެވެ.
މިއީ މިދިޔަ އަހަރުގެ މި މުއްދަތާ އަޅާބަލާއިރު 7.6 މިލިއަން ރުފިޔާގެ އިތުރުވުމެކެވެ. މިދިޔަ އަހަރު މި މުއްދަތުގައި މުދަލު ޒަކާތުގެ ގޮތުގައި ލިބިފައިވަނީ 58.6 މިލިއަން ރުފިޔާއެވެ.
ޖުލައި މަހަށް އެކަނި ބަލާއިރު، މި އަހަރު ލިބުނު އަދަދު ވަނީ މިދިޔަ އަހަރަށްވުރެ ދެގުނަ އިތުރުވެފައެވެ. މި އަހަރުގެ ޖުލައި މަހު 15.4 މިލިއަން ރުފިޔާ ލިބިފައިވާއިރު، މިދިޔަ އަހަރުގެ ޖުލައި މަހު ލިބިފައިވަނީ 7.3 މިލިއަން ރުފިޔާއެވެ.
2016 ވަނަ އަހަރުން ފެށިގެން މުދަލު ޒަކާތް ބަލައިގަންނަނީ މީރާއިންނެވެ. މީގެ ކުރިން މުދަލު ޒަކާތް ބަލައިގަތީ އިސްލާމިކް މިނިސްޓްރީންނެވެ. މިހާރު މީރާގެ އޮންލައިން ޕްލެޓްފޯމްތައް މެދުވެރިކޮށް ނުވަތަ މީރާއަށް ސީދާ ގޮސްގެން މުދަލު ޒަކާތް ދެއްކޭނެއެވެ.
