މާލޭގައި ހުރި ބައުވެ ވީރާނާވެފައިވާ ގެއެއްގައި ގަވާއިދާ ޚިލާފަށް ދިރިއުޅެމުންދިޔަ 3 ބިދޭސީން މިއަދު ހެނދުނު ކުރެވުނު ރެއިޑެއްގައި އިމިގްރޭޝަނުގެ ބެލުމުގެ ދަށަށް ގެނެވިއްޖެއެވެ. މި ރެއިޑު ކުރެވުނީ "އިމިގްރޭޝަން ވޮޗް" އަށް ލިބުނު މަޢުލޫމާތަކާ ގުޅިގެންނެވެ.

ރެއިޑު ކުރެވުނު ގޭގައި ދިރިއުޅުމަށް އެކަށީގެންނުވާ ވަރަށް ބައުވެ ހަލާކުވެފައިވާކަމަށް އިމިގްރޭޝަނުން ބުނެފައިވެއެވެ. އަދި މި ގޭގައި ވިޔަފާރީގެ ބޭނުމަށް އެކި ބާވަތުގެ ކާބޯތަކެތި ތައްޔާރުކުރަމުންދާކަމުގެ މަޢުލޫމާތު ލިބިފައިވާކަމަށްވެސް އިމިގްރޭޝަނުން ހާމަކޮށްފައިވެއެވެ.

ރެއިޑުގައި ގިނަ އަދަދެއްގެ ކާބޯތަކެތި ފެނިފައިވާކަމަށާއި، މިއީ އާންމުކޮށް ފިހާރަތަކުން ގަނެއުޅޭ ބާވަތްތަކެއްކަން ފާހަގަކުރެވިފައިވާކަމަށް އިމިގްރޭޝަނުން މަޢުލޫމާތު ދީފައިވެއެވެ. މިކަން ވަނީ ކަމާބެހޭ އެހެން އިދާރާތަކުގެ ސަމާލުކަމަށް ގެނެވިފައެވެ.

މި މައްސަލައާ ގުޅޭގޮތުން އިތުރު ތަޙުޤީޤުތައް ކުރިއަށްދާކަމަށާއި، ގަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީންނާ ދެކޮޅަށް ޤާނޫނީ ފިޔަވަޅު އެޅޭނެކަމަށް އިމިގްރޭޝަނުން ބުނެފައިވެއެވެ. އަދި މިފަދަ މަޢުލޫމާތު ލިބޭނަމަ ކަމާބެހޭ ފަރާތްތަކަށް އަންގައިދިނުމަށް އާންމުންނަށް އިލްތިމާސްކޮށްފައިވެއެވެ.